ཚངས་སྲས་མགྲིན་པ་འདར་བའི་མཆོད་ཚིག་ག་བུར་ཐིགས་པ།
•ཚོར་བའི་མེ་དཔུང་།
བོན་ཉིད་ནམ་མཁའ་ལྷ་ཡི་ལམ་ནས་བདེན་པའི་གན༵ས་ལུ༵གས་གཏན་ལ་དབབ་པའི་གཏ༵ན་ཚི༵གས་ཆེ།།
རྣ༵མ་མཁྱེ༵ན་རིག་པའི་རྒྱལ་པོ་འཆང་སྟེ་བསོད་ནམས་སྟོང་གི་འདབ་མ་བཞད་པའི་ལྷ༵་ཡི་མི༵ག །
ཐབ༵ས་ཤེ༵ས་གཉིས་ཀྱིས་རི་ཆུ་གཤག་སྟེ་བྱམས་སེམས་འབུམ་གྱི་མུ་ཏིག་མཛེས་པའི་གཡུང་སེམ༵ས་དཔ༵འ།།
ལེགས་བྱས་དཔག་བསམ་ལྗོན་པོ་བརྒྱན་ཏེ་ངོ་བོའི་སྐྱེད་ཚལ་གཙང་ཞིང་དྭངས་བའི་གཙ༵ང་ཁྲིམ༵ས་པ།།
མ་རྙོག་དྭངས་མའི་མདོག་གིས་རབ་མཛེས་དགེ༵་ལེ༵གས་ཆུ་འཛིན་དཀར་དམར་དྲྭ་བའི་ལྟོ་བ་རུ།།
ཡེ་ནས་ལྷུ༵ན་འ༵གྲུབ་འདུ་མ་བྱས་པའི་གནས་ལུགས་རང་ཤར་ར༵ང་རི༵ག་རྒྱལ་པོ་འགྲོ་བའི་མགོན།།
དབུ༵་མ༵འི་ལྟ་བ་སྣང་བའི་ལམ་ནས་རྒྱན་གྱིས་བདོག་པའི་རི༵ན་ཆེ༵ན་གསེར་ཐག་སྤུངས་སེ་སྤུངས།།
རྣམ་རྟོག་རེ་ཞིག་ཅི་ཡང་མི་མངའ་རྫོ༵གས་པ༵འི་སྐུ༵་ཡི་སྟངས་སྟབས་འགྱིང་བའི་ལང་ཚོ་སྨིན།།
ཤར་ནུབ་འཛིན་མའི་ཀློང་དུ་གཡོས་པའི་སྣ་ཚོགས་འགག་མེད་ཐོར་གཙུག་བཅིངས་པས་རྩོད་གློག་འཁྱུག །
ཕས་རྒོལ་ལོག་ལྟའི་གདོང་གི་གསེང་ན་ཟིལ་གནོན་ཁྱུང་གིི་གཤོག་ཟུང་བརྐྱངས་པའི་ཐོག་གི་མདའ།།
གཡུང་དྲུང་བསྟན་པའི་ཀ་ཆེན་གྱེན་དུ་ཡང་ཡང་འདེགས་པའི་གཉིས་དག་ཡང་རྩེར་སོན་པའི་བུ།།
ཉིན་མཚན་བརྩོན་པའི་བློ་གྲོས་མ་མོག་ཕྱི་གསལ་གསེར་གྱི་མེ་ལོང་འཆང་པས་སློབ་འབང་ཁྱུ།།
སྣ་ཟིན་སྤུ་ཟིན་ཙམ་ཞིག་མ་ཡིན་འཆ༷ད་པའི་འགྲེལ་ལ་རྟགས་དང་རྒྱུ་མཚན་ལག་གདངས་སྦྲེལ།།
མཁས་མང་འདུས་སར་གདང་རའི་དཀྱིལ་དུ་རྩོ༷ད་པར་ཞུགས་ན་ཐང་དཀར་ལྡིང་སྐོར་རྒྱག་པ་འདྲ།།
བློ་གྲོས་སྤྱན་ཟུར་འཇིངས་ཤིང་ལྡན་ཏེ་རྩོད༵མ་པའི་ནོར་ལ་གོམ་འགྲོས་བཙན་པའི་སྒྱུ་རྩལ་ཆེ།།
གང་ལྟར་ལུང་དང་རིགས་པའི་སྤུ་གྲི་གད་གདར་ཆོད་པས་སྨག་རུམ་སྟོང་གི་ཉི་གཞོན་མ།།
རླབས་ཆེན་སྙི༵ང་རྗེ༵འི་འོད་སྣང་བརྐྱངས་པའི་ལྡེམ་དགོངས་མ་ཡིན་བྱམས་བརྩེའི་གང་གྭ་སྔོ་ལྗོངས་ཟབ།།
སྐྱ་རེངས་ནུ་བོ་ཐོག་མར་འཚེར་ཚེ་སློ༵བ་མ༵འི་མདུན་ལམ་ཉག་ཅིག་བསམ་པའི་ཟློས་གར་སྐྱེན།།
དྲི་བཟང་སྤོས་ཀྱི་འཕྲུ༵ལ་ཡི༵ག་བཞད་དེ་མགུར་གྱི་དབྱིངས་སུ་ལྐུགས་ཁ་འབྱེད་པའི་ལྡེ༵་མི༵ག་འཛག །
ལུ༵གས་གཉི༵ས་དབྱངས་ཀྱི་འཕྲུལ་འཁོར་བཅིངས་ཏེ་སྤྱི་རྒྱ་རླབས་ཀྱིས་དལ་བུར་བསྐྱོད་པའི་གཙུ༵ག་གི་ནོ༵ར།།
བཤེས་གཉེས་དམ་པ་ཁྱེད་དང་མཇལ་བའི་སྐལ་བ་འདི་ནི་སྔོན་གྱི་བསགས་པའི་བདག་རྐྱེན་གྱིས།།
ཐ་ཤལ་ནུས་མེད་ཝ་མོ་ལྟ་བུའི་བདག་དང་བདག་འདྲ་སེམས་ཅན་རྣམས་ཀྱི་བསོད་ནམས་ལགས།།
མ་རིག་མུན་སེལ་དགེན་གྱི་སྐུ་ལ་བར་ཆད་མེད་ཅིང་བསམ་དོན་འགྲུབ་པའི་སྨོན་འདུན་རིང་།།
གཡུང་དྲུང་ལྷ་ཡི་དབུས་ན་སྤ་བའི་བསྟན་བསྲུང་མ་བདུད་བཙན་གྱི་ཐུགས་རྗེས་བཟུང་དུ་གསོལ།།
