འཇིག་རྟེན་གཞིས་འདི་བྱིས་སྒྲུང་ཞིག

ཤ་སྐྱི་དཀར་བའི་ཉིན་རི་ནས།།

ཞི་གོར་སྤྱན་ཟུང་ཁྲ་མོ་ཡིས།། 

སྨིན་མ་ལྡེམ་པའི་སྟངས་སྟབས་ལ།།

མགྲིན་པའི་ཨོ་རྩིད་འཛར་མཐུད་མང་།།

ཚོར་བའི་བཟི་ཁ་མིད་ས་དང་།།

དུང་བའི་རླན་ཐིགས་མོད་ས་ཡི།།

ཚོར་འདུ་བསླས་པའི་གད་ཁུག་ནས།།

སེམས་མཐུན་བྱ་ཁྱུ་བཤར་ལ་བྲེལ།། 

ཟིལ་པ་ཁུར་བའི་མེ་ཏོག་ཅིག།

ཚོར་བའི་སོས་ཆེན་སྤང་ནས་ལྡེམ།། 

ཟེ་འབྲུ་ཆ་གའི་དཔུང་ཚོགས་ལ།།

རྐང་དྲུག་མགོ་བོ་ལན་གསུམ་འགུལ།།

བསླུ་བྲིད་རྫོབ་དཔུང་འཐུག་ས་སྟེ།།

འཇིག་རྟེན་སྲེད་པའི་རི་གྲོང་ནས།།

འདོད་ཡོན་རྩེད་པའི་སྟངས་སྟབས་ལ།། 

ཚོགས་དྲུག་ཕལ་ཆེར་དེ་རུ་ཕྱོགས།།

བལ་དཀར་ལྷོད་པའི་ཉག་ཀ་ལ།།

གསེར་སྐྱུག་སྙུག་མའི་ཨ་ལོང་རྒྱག། 

བྱབ་ཆུང་ལག་པས་ཐུག་རེག་མང་།། 

འཇིག་རྟེན་གཞིས་ཀ་བྱིས་སྒྲུང་ཞིག། 

ལས་ཀྱི་ཀུན་འབྱུང་རྒྱུ་མཚམས་སུ།། 

རྣམ་སྨིན་སྡུག་གིས་བསླུ་བྲིས་ཀྱི།།

རུལ་དྲི་ཤངས་ཀྱིས་མ་ཚོར་ནས།།

འཇིག་རྟེན་བྱིས་པའི་ཀླེན་ཀ་ཆགས།། 

གོས་ཆེན་དཀར་བའི་མཐའ་ངོགས་ནས།།

ས་ཆེན་བཤུམས་པའི་བཞུར་སྒྲ་ཡི།།

སྟོང་གསུམ་འཁྲུགས་པའི་ཆ་ལངས་ཤིག།

ཁམས་གསུམ་གྲོང་ནས་བསྒྲགས་པ་མང་།། 

ཁ་ཆུ་འཐུག་པའི་ཐུ་ལྭའི་འོག།

དྲི་བསུང་ཁུར་བའི་མེ་ཏོག་དག།

མགོ་བོ་གུག་བཞིན་རྒྱང་ནས་བཤར།།

སྐྱོ་བསངས་མེད་པའི་ཆུ་འཛིན་འཁྲིགས།། 

མི་སྙན་ཚེར་མའི་འཇབ་རྒོལ་གྱིས།།

མི་སྲིད་འཇིག་རྟེན་བཤུམས་སྲིད་པའི།།

མི་རུང་ཉན་བྱེད་དབང་པོར་བཀླགས།།

འཇིག་རྟེན་གཞིས་འདི་བྱིས་སྒྲུང་ཞིག།

༢༠༢༠/༢/༢༣/ཞོགས་པ་/བསོད་ནམས་བློ་གྲོས་/ནས་བྲིས།