ཚོར་རྟོག་ཆུ་མིག་དགུ་བསླས།

ཚོར་བ་གཉུག་མའི་ཉག་ཀ་ནས།།

ལྕང་ཕྲན་བྱ་ཁྱུ་གཤར་ལ་བསྡེབས།།

སེམས་པ་ཁེན་སའི་གད་ཁུག་ནས།།

ཚོར་རྟོག་ཆུ་མིག་དགུ་བསླས་བསྟར།།

གྲོས་ཆར་མོལ་བའི་འབབ་ཁུགས་ནས།།

རྒུན་ཆང་བསྙལ་བའི་ཨམ་ཕྲག་ཁུད།།

སྨིན་ཟུང་ན་རོ་འཁྱུག་ཐེངས་ཀྱིས།།

དང་ཀ་བདེ་བའི་ས་རུ་བརྙབས།།

རྨི་ལམ་དཀྲོགས་པའི་ཐུན་མཚམས་ནས།།

ཟློས་གར་སྟོང་གིས་གར་མཁན་འཁྲབ།།

རྣམ་ཤེས་གསོན་ལུས་ཐེངས་དགུ་བརྗེས།།

ཨོ་མདུད་དགུ་ཡི་ཞགས་པ་གཡུག།

དགུ་ཚིག་བརྐྱངས་པའི་མཁའ་མཐའ་དང་།།

གཟའ་སྐར་གཤར་བའི་རྐྱ་བར་ནས།། 

སྨག་ཅན་གཤགས་པའི་དགུན་རེག་གིས།།

ལུག་ཆུང་ཚར་དཀར་བསྐྱེངས་སུ་བཅུགས།།

ཚོར་བ་དགུང་དུ་བཀན་ས་ནས།། 

ངོས་ལ་འཕྲེད་ཐིག་བཏབ་གྲབས་ཀྱིས།།

སྤྲིན་དཀར་སྤུངས་པའི་ཕྱེ་མ་ལ།། 

ཡིད་མཐུན་ཞེ་ཆགས་ལན་དགུ་སྐྱེས།། 

དུང་ཤོག་དཀར་པོའི་ཕུང་བ་རུ།།

སྨྱུག་སོས་གར་ལ་རྩེད་སྟབས་ཀྱིས།།

ཡིག་འབྲུ་ནག་པོའི་སྣག་ལམ་ནང་།།

བརྗོད་བྱ་གོག་མ་སྦུད་ཀྱིས་བསྐྱེལ།།

ལང་ཚོ་བརྡེབས་པའི་འཆར་ཡན་གསེབ།།

ལོ་ཟླ་བརྩེགས་བའི་ཚེ་མཁར་ནང་།།

སྐྱིད་སྡུག་སྐྱ་ཡའི་མུག་གཏམ་གྱིས།།

ཚོར་བའི་དཀར་ཤོག་རླན་ཐེངས་མང་།།

རུ་སྤུང་འཐུག་པའི་ལྔ་བདོ་རུ།།

འཕོ་འགྱུར་ཚ་བའི་དུས་ཚིག་ལ།།

ལག་འཇུ་མང་བའི་སྟབས་ཀ་ནས།།

མི་ཚེ་མགྱོགས་བྲེལ་ངང་དུ་རྫོགས།།

ངན་ངོན་འཚོ་བས་ལང་ཚོ་གསོས།། 

ལས་ཉོན་ལྗི་མོས་གཟུགས་བཞི་བརྒྱངས།། 

གསོན་ཐག་ཚེ་ལ་དབང་ཐང་མཐུད།། 

ཚེ་ལོ་ཧྲིལ་གཅིག་མགྱོགས་མྱུར་རྫོགས།།

རྒྱུ་མཐུད་འཇིག་རྟེན་ནག་པོའི་པང་།།

ལས་ཉོན་རུ་མ་བསྡེབས་ཚོད་མེད།།

ལོ་ཟླ་བརྩེགས་པའི་དཀྱོགས་མཚམས་སུ།།

ལང་ཚོའི་འགྱུར་བའི་ལོ་ཚེས་གྲབས།།

ལས་ཀླུང་རྡེབ་པའི་སྒུལ་ཤུགས་ཀྱིས།། 

གཟུགས་བཞི་དར་ལྕེ་ཟད་གྲབས་ལ།།

སེམས་པ་འཕངས་པའི་ཐུ་འོག་ནས།། 

གཞོན་ནུའི་ལང་ཚོར་འཇུངས་གེགས་བྱུང་།།

དཀར་ཆ་ཟླུམ་པོའི་ཞལ་ཁྱིམ་ལ།།

ལོ་ཟླ་ཟད་པའི་ནག་དྲེགས་ཀྱིས།།

གཉེར་མའི་ལྡེབས་རིས་མ་ཚེམས་བར།།

ཚོར་གསུམ་དབྱར་གཞུང་སྤང་ལ་བསྲེ།།

༢༠༡༩/༡༢/༣༡/སྤྱི་ལོ་༢༠༡༩/ལོ་ཡི་ཉིན་ཐ་མའི་ལག་བྲིས།