ང་དང་ཁྱོད་ཁྱད་མེད།
ལྷོད་བབས་གཉོམ་ཚུགས་ཇི་ལྟར་ཆེ་ན་ཡང་།།
བཟང་ངན་གྲལ་དུ་བསྐྱོད་པའི་སྐྱ་ཐིག་ནང་།།
སོ་སོའི་ཁ་དང་ལག་པའི་སྟངས་སྟབས་འོག།
མགོ་རྣ་མི་བསམ་མཁན་ཞིག་དཀོན་པོ་རེད།།
བེམ་རྒོག་ཆེ་ཚུགས་ཇི་ལྟར་མཁས་ན་ཡང་།།
ལྟ་བ་རྟོགས་ནས་ཞེན་འཛིན་ཞིག་མདོག་དང་།།
སྤྱོད་པ་ཞིབ་ནས་རྒྱུ་འབྲས་དྲང་ཚུགས་ངང་།།
མགོ་རྣ་མི་བསམ་མཁན་ཞིག་དཀོན་པོ་རེད།།
སྟོབས་ཆེན་ཐབས་རྒྱ་ཇི་ལྟར་སྒམ་ན་ཡང་།།
དོན་ཆེན་ལས་མཐའ་བསྐྱང་བའི་གར་རྩེད་ལ།།
རླབས་ཆེན་སྒྲུབ་པའི་ལྟ་བའི་སྲོག་ཤིང་གི།
མགོ་རྣ་མི་བསམ་མཁན་ཞིག་དཀོན་པོ་རེད།།
ཚོགས་གཉིས་དགེ་རྩ་ཇི་ལྟར་བསཊ་ན་ཡང་།།
ཡིད་གཉིས་བློ་ཡི་འཛིན་པ་ཕྱགས་སུ་ཕུད།།
སྒྲིབ་གཉིས་ཐག་པའི་རྒྱ་མདུད་མ་ཞིག་བར།།
མགོ་རྣ་མི་བསམ་མཁན་ཞིག་དཀོན་པོ་རེད།།
ཁ་བཤད་སྟོང་བསམ་ཇི་ལྟར་བསྒྲགས་ན་ཡང་།།
བསམ་ཚུལ་ལྟ་བ་རིས་སུ་མེད་མདོག་དང་།།
ལྟ་ཚུལ་འཇིག་རྟེན་ཀུན་ལ་སྙོམ་ཚུགས་ཅན།།
མགོ་རྣ་མི་བསམ་མཁན་ཞིག་དཀོན་པོ་རེད།།
ཕྱི་ཡི་ཚུགས་ཀ་ཇི་ལྟར་སྒམ་ན་ཡང་།།
ནང་གི་གྲགས་འདོད་སྙེམ་བློ་མ་ལྡོག་བར།།
ལུས་ཅན་སངས་མ་རྒྱས་པའི་སེམས་ཅན་ལ།།
མགོ་རྣ་མི་བསམ་མཁན་ཞིག་དཀོན་པོ་རེད།།
ངོས་ཡག་འཁྲབ་སྟོན་ཇི་ལྟར་མཁས་ན་ཡང་།།
མྱི་ཆེན་ཁ་ལག་འགུལ་བའི་ཕྱག་རྒྱ་ལ།།
སྣ་ཚོགས་ལྷ་འདྲེའི་གོ་དོན་གབ་ཡོད་པས།།
དེང་རབས་དོན་གྱི་ཡིད་ཆེས་བྱེད་ཡུལ་དཀོན།།
ཚོར་འདུ་ཚ་གྲང་རྣམ་རྟོག་མ་འགག་བར།།
འདི་འདྲའི་ཚིག་ཉོབ་རྫོགས་སུ་མེད་པ་ལ།།
དེ་འདྲའི་གནས་ཚུལ་ཟད་དུ་མི་སྲིད་ཀྱང་།།
དཀྱུས་གཏམ་བྲི་མཚམས་དེ་རུ་འཇོག་རྒྱུ་གྱིས།།
༢༠༢༠/༢/༢༥/༥/༥/བསོད་ནམས་བློ་གྲོས/ནས།
