འཁོར་བ་འདི་ལ་སུན་སྣང་ཆེ།
ངད་ཀྱི་དུག་རླངས་འཕྱུར་བའི་སྲིད་ས་སྟེ།།
ལས་ཀྱི་ཆབ་དྲེགས་འཐུག་པའི་གྲུ་མདོ་ནས།།
ཁམས་ཀྱི་སྣང་སྲིད་གཡོ་བའི་སྟངས་སྟབས་ངང་།།
ལུས་ཅན་སྐྱེ་འགྲོ་ཕལ་ཆེར་དུག་ལྔས་སྒུལ།།
བྱ་བྱེད་འདུ་ཤེས་མི་གཅིག་གར་སྟབས་ལ།།
ཚོར་འདུ་ཁྱེར་སོ་མོད་པའི་བྲེལ་ཟིང་གསེབ།།
མཐོ་དམན་ཕལ་གྱིས་རང་བློར་འཐད་མིན་གྱིས།།
རིགས་མཐུན་གཡོ་འགུལ་ཕྱོགས་ལ་སྣ་གཉེར་མང་།།
སྐྱེ་འགྲོ་ཕལ་གྱིས་དུག་ལྔ་རྒྱ་བསྐྱེད་གཏོང་།།
ཆེ་ཆུང་འགུལ་བའི་ལས་བྱར་རྒྱབ་སྐྱོར་ཉུང་།།
ཕན་ཚུན་འདྲ་བར་བསྡོ་ལ་དོགས་རྩོད་ཆེ།།
ཆུ་བུར་མིག་རྡོག་ཚ་མཁན་ཇེ་མང་རེད།།
ཆར་ཐིགས་གྲམ་པ་སྤུངས་པའི་རི་ངོགས་དང་།།
རྡུལ་གྱི་ས་སྒང་ཟླུམ་པོའི་གན་གཞུང་དུ།།
ཐོན་སྐྱེད་ས་བོན་འཆམ་མཐུན་མི་བསམ་པར།།
གཡུལ་ཁའི་ཐབ་མེ་གསོ་མཁན་ཇེ་མང་རེད།།
ཙག་ཙིག་བྱ་འགུལ་མེད་ན་ནུས་མེད་སྙད།།
ཁ་ཉུང་བྱ་ཉུང་བྱས་ན་ཁས་ཞན་ལབ།།
གཡོ་འགུལ་རང་ཆུས་ཙམ་ལ་ཞེན་སྐྱུག་མང་།།
དུས་རབས་འདི་ལ་ཞེན་པ་ཐེངས་དགུ་ལོག།
རང་སྣང་རང་མཐོ་ཆེ་བའི་འཇིག་རྟེན་འདི།།
མ་རྟོགས་ཉོབ་ཅན་སྡོང་པོ་དུག་གིས་བརྒྱངས།།
ཐོ་ཡོར་གདོས་བཅས་ཕྱི་ནང་སྡིག་པས་བངས།།
ཞེ་འདོད་སྒེར་ཆུས་ཆེ་བའི་འཇིག་རྟེན་བཙན།།
ལག་ལེན་སྲོ་མ་ཙམ་ལ་མི་མཐུན་ཡང་།།
ཁ་བཤད་ཤུན་སྟོང་སྐེམ་པོའི་རྩྭ་སྐྱ་ཅན།།
སྟོང་གཏམ་རླུང་བུ་འཚུབས་པའི་དུས་རབས་ལ།།
ཨ་ཧོ་གྲྭ་རྐྱང་ང་ནི་སུན་ཐག་ཆོད།།
མཐོ་དམན་ཧེ་བག་ཆེ་བའི་འཇིག་རྟེན་ནང་།།
ལས་ཉོན་རྫུན་བག་འཐུག་མིན་ཁྱད་པར་གྱིས།།
རང་ཤེས་བསམ་བློ་རྫོགས་མིན་ཚད་ཙམ་ལས།།
ཕྱི་ཚུལ་ཟོག་པོར་བདེན་རྫུན་བློས་འབྱེད་དཀའ།།
བདོག་པོ་ཤ་མིག་ཁྲ་བོས་མ་གསལ་ན།།
ཡོད་ཚད་མེད་པར་རློམ་པའི་རྫོབ་ཅན་མང་།།
བདེན་དོན་རྡོག་བརྫིས་ཆེ་བའི་དུས་རབས་འདིར།།
འཇོན་མེད་གྲྭ་རྐྱང་ང་ནི་སུན་ཐག་ཆོད།།
༢༠༢༠/༢/༢༥/ཉིན་/བསོད་ནམས་བློ་གྲོས་/ནས་ཤར་བྲིས་བྱས།