འཛུམ་ཀོང་མེ་ཏོག
ངད་ཀྱི་འཚོ་རླངས་འཕྱུར་ས་ནས།།
དྲི་འཛིན་བསུ་བའི་བསང་དུད་གཏོང་།།
འཕྱང་འཕྲུལ་གསེར་ལོ་ཐུར་དུ་བསྟར།།
དར་བུ་སོག་སླས་མིག་ལ་བཤམས།།
དཀར་ལོ་མདངས་ཀྱི་ཞི་ས་ནས།།
སྨིན་མས་འཕྲེད་ཐིག་ཟུར་ནས་བརྐྱངས།།
འཛུམ་ཀོང་འོ་མ་དཀར་པོ་ཡིས།།
མགྲིན་པའི་ཨོ་རྩིད་རླན་པར་བྱས།།
བག་ཆགས་མཐུན་འགྲིག་བྱུང་ས་རུ།།
ཚགས་ལ་འོ་རྒྱལ་མ་ཞུས་ཀྱང་།།
ཚིག་གིས་དང་ལེན་ཞུ་མཚམས་ནས།།
དཀའ་བའི་རྔུལ་ཆུ་ཞབས་བཏག་བཏེགས།།
སྒབ་མའི་ཐུ་སྣེ་བསྣོལ་ས་ནས།།
ལུག་ཆུང་ཚར་གུ་འཇམ་པོ་ཡི།།
རེག་བྱ་བཙན་པའི་ཟར་ཁ་ཞིག།
ཚོར་བ་སྐྱེན་སའི་ཁུད་ལ་སྦྱར།།
ལང་ཚོ་མིག་ལ་འཚེར་ས་ནས།།
བག་ཆགས་རུམ་པའི་ཨམ་ཕྲག་ནང་།།
གསང་རྒྱ་གཅེས་ལོའི་གུར་ཁང་མཛེས།།
མི་ཤིག་དམ་བཅའི་ཐ་རམ་རྒྱག།
ཆ་ག་གཉིས་བརྩེགས་ཅན་པོ་ཡི།།
གཡུང་དྲུང་རི་མོའི་མཐའ་ཤམ་ཅན།།
ས་མཐའི་འཛུམ་ཀོང་མེ་ཏོག་ཅིག།
གསང་རྒྱ་རལ་དུས་བརླག་མ་ཤོར།།
དཀར་མེ་སྨག་ཏུ་སྤར་ས་ནས།།
སྐར་ཁྱུ་འཁྱགས་འདར་མ་ཤོར་ཡང་།།
དང་ལེན་ཨེན་ཙམ་མ་བྱས་པས།།
ལག་རྗེས་མེད་པའི་གཏམ་རྒྱུད་མང་།།
ཉ་ཉོག་ཚིག་གིས་མ་ཚེམས་ཀྱང་།།
རྡོག་རྡོག་སེམས་ཀྱིས་མ་ཐོངས་ནས།།
ཏན་ཏན་མོལ་བའི་ཁ་ཕྲུ་ཞིག།
ཏིག་ཏིག་མཐིལ་དུ་བྱས་པ་མཚར།།
༢༠༡༩/༡༢/༡༡/ཉིན་ཕྱི་དྲོ་ཁྱུང་བསོད་བློ་ནས་བྲིས།
