ལྷགས་ཀའི་ཆབ་རིལ།




རྟོག་པ་རྩིབ་བརྡར་བྱས་པའི་ཁུད་ཤམ་དུ།།
འཇམ་རྩུབ་ཚོར་བ་སྐྱེན་པའི་བགབ་མ་ལ།།
ཁ་བའི་ཆབ་རིལ་ཐོགས་པའི་འཁྱགས་རུམ་ནང་།།
ཆབ་ཀྱི་གྲམ་པ་གཤགས་སའི་ལྷགས་རླུང་དྲན།།


བསིལ་ཞད་གདོང་ལ་གཏད་པའི་ངར་ཤུགས་དང་།། 
བ་སྤུ་ལུས་ནས་གཟེངས་པའི་འཁྱགས་ཞད་ཀྱིས།།
ཁ་འདར་ཁོག་ལུ་རྒྱག་པའི་ཚུགས་ཀ་ལ།།
དགུན་གྱི་གྲ་ཞག་རྒྱས་དུས་བཙིར་སྐད་མང་།།


ཕ་ཝང་ཤག་ཤག་བཀས་པའི་དངངས་སྐྲག་དང་།།
ཆུ་བོ་རིལ་རིལ་ཆགས་པའི་སྐྱོ་སྣང་ལ།།
རླངས་པ་སྐྱ་ཡ་ཞིག་གི་ཚོར་བ་མང་།།
རྣོ་ཞགས་ལྷགས་ཀའི་འོབས་ཀྱིས་དར་མདུད་རྒྱག།


ལག་ཆུང་མེ་ཏོག་འཁོབ་ནས་ཁ་ནང་བཞག།
རྐང་ཆུང་གངས་ལ་ཟུག་པས་ངུ་སིད་ཤོར།།
ཡན་ལག་ཧྲག་པོ་མེད་པའི་བྱིས་དུས་ཤིག། 
ང་ཡིས་ཆབ་རིལ་ཐོགས་ནས་ངུ་མ་བགད།།


ལྷས་འདབས་ལྕི་རུག་སྒྲུག་ནས་སེན་ཁ་གས།། 
ཆ་རུ་གདང་ལ་བཏགས་པས་མཛུམ་སྐེ་ཆད།།
ལང་ཚོས་གངས་ཆར་གཤག་ནས་འཁུ་ཚོས་མོག།
ལྷས་འདབས་ལྷགས་རླུང་གསེབ་ཏུ་མི་སྣ་མང་།། 


༢༠༡༩/༩/༢༤/དགོང་མོ་ཁྱུང་བསོད་བློའི་ལག་རྩེད།