སྒྲིག་འཇུག...
 
ཟིན་བྲིས་ལི་ཐོ།
སྒྲིག་འཇུག...
སྤྱི་བསྒྲགས།
སྒྲིག་འཇུག...
ཆེད་སྒྲིག་རྣམ་དབྱེ།
སྒྲིག་འཇུག...
ཟིན་ཐོ་གསར་བ།
སྒྲིག་འཇུག...
དཔྱད་གཏམ་གསར་བ།
སྒྲིག་འཇུག...
ཆེམས་གསར་བ།
སྒྲིག་འཇུག...
འཚོལ་བཤེར།
སྦྲེལ་མཐུད།
ཐོན་བྲིས་སྤྱི་བསྡོམས།
སྒྲིག་འཇུག...


 
གསལ་བྱེད་དབྱངས་ལ་འཁྲི་བ།
[ 2019/2/14 13:23:00 | By: vase ]
 

གསལ་བྱེད་དབྱངས་ལ་འཁྲི་བ།


བསོད་ནམས་བློ་གྲོས།


དུས་ཀྱི་མེས་པོས་གཙང་ཐིག་རྡོ་ལ་བཏབ།།

ཚོར་བའི་སྨྲེ་ངག་སྒྲ་གདངས་ཚིག་ལ་ཕབ།།

གོ་བྱེད་བརྡ་ལ་འཕྲུལ་ཡིག་སྡེ་ཚན་བགོས།།

གནའ་དེང་བོད་ཀྱི་གསལ་བྱེད་སྔ་ནས་གྲགས།།


རིགས་ཀྱི་གདོད་མའི་རྐན་ནས་བྱུང་རིམ་འཕེལ།།

རྒྱལ་རབས་སྨྱུག་རྩེའི་ལྗགས་ནས་ཐ་སྙད་གྲུབ།།

གསར་གྲུབ་དངོས་ཟོག་རེ་དང་མིང་དོན་འབྲེལ།།

གནའ་དེང་བོད་ཀྱི་གསལ་བྱེད་སྔ་ནས་གྲགས།།


གནའ་ནས་སྟོན་པ་ཆེན་པོས་བསྟན་ས་བསྐྲུན།།

གདངས་ལ་ཕྱི་ནང་གསུམ་གྱི་པོ་ཏི་བརྩེགས།།

ཚེ་སྲོག་དབྱངས་ལ་འཇུས་ནས་ཕ་མཁར་གྲུབ།།

གནའ་དེང་བོད་ཀྱི་གསལ་བྱེད་སྔ་ནས་གྲགས།།


བཟོ་རྒྱལ་གར་མའི་ཕྱག་གིས་མ་བཏབ་ལ།།

ལེགས་སྦྱར་ཐང་པོའི་ལག་གིས་མ་བཟོས་གོང་།།

གཤེན་རབ་ཐུགས་རྗེ་ཆེན་པོའི་མཐུ་བྱིན་གྱིས།།

དཔའ་བོ་འབྲུ་ལྔའི་ཆུ་འགོ་གངས་ལ་བྲུས།།


སྲོང་བཙན་སྒམ་པོ་མགོ་གཉིས་མ་དོད་ལ།།

ཐོན་མི་བྷོ་ཊས་ལད་ཟློས་མ་བྱས་གོང་།།

མེས་པོ་དུ་མ་གསལ་བྱེད་དབྱངས་ཀྱིས་འཚོས།།

གསར་གཏོད་རྫུན་གྱི་གཏམ་འཆལ་སྔ་ནས་སངས།།


རིགས་ཀྱི་ཡན་ལག་གསོ་བའི་ལག་ཆ་དང་།།

དབྱངས་ཀྱི་བླ་ཚེ་བསྲུང་བའི་གོ་ཁྲབ་བྱས།། 

ཁྲིམས་ཀྱི་བཅའ་ཡིག་མཐུད་པའི་གསེར་ཐག་སྟེ།།

གནའ་དེང་བོད་ཀྱི་གསལ་བྱེད་སྔ་ནས་གྲགས།།


ཕྲ་ས་ཞིག་ནས་སྒྱུ་རྩལ་དབྱངས་ཀྱིས་མཐུད།།

བུག་ས་ཞིག་ནས་སྲོལ་རྒྱུན་ཡི་གེས་གསོས།།

བསྣོན་འཕར་ཆད་ལྷག་མང་པོའི་སྟོང་ཆ་བསྐངས།། 

གནའ་དེང་བོད་ཀྱི་གསལ་བྱེད་སྔ་ནས་གྲགས།།


འགྲོ་ཁམས་སྨག་གིས་འཐོམ་པའི་མུན་པ་ནང་།།

སྒྲོན་མེ་གངས་ལ་སྤར་བའི་ལག་རྗེས་ཏེ།།

གསལ་བྱེད་དབྱངས་ཀྱིས་ཚེམ་པའི་གསེར་ཡིག་འདི།། 

རྒྱལ་རབས་འཕོ་འགྱུར་གསེབ་ནས་གསོན་ལངས་བྱས།།


རིགས་ཀྱི་ཚེ་སྲོག་མཐུད་པའི་བདག་པོ་དང་།།

བྱམས་ཀྱིས་དབུགས་རྒྱུན་གསོ་བའི་སེམས་དཔའ་ཆེ།།

རླབས་ཀྱིས་གངས་ཅན་ཁྱབ་པའི་རིག་བདག་སྟེ།། 

གནའ་དེང་བོད་ཀྱི་གསལ་བྱེད་སྔ་ནས་གྲགས།།


གནའ་གྲུབ་བདེན་ཁའི་སྒྲོན་མེ་ཡར་ཡར་གསལ།།

གསར་གཏོད་རྫུན་གྱི་ཚིལ་མེ་མར་མར་འགྲིབ།།

བདེན་མཐས་ས་སྒང་གསལ་བའི་དུས་འདི་ལ།།

མང་ཐོས་བརྒྱ་ཡིས་མགོ་བོ་ལན་གསུམ་ལྡེམས།།


ངག་ནས་གསལ་བྱེད་འུར་འདོན་མི་ཆོག་ལ།།

ལུས་ཀྱིས་པོད་ལ་གུས་བཀུར་མ་ཆོག་དུས།།

ཡིད་ཀྱིས་རུམ་ནས་གསལ་བྱེད་བཀླག་རྒྱུ་དེ།།

ཁམས་ཀྱི་དབུ་ནག་སྟོང་གིས་གཡུག་མ་བྲ།། 


བྱིན་གྱིས་ཏི་སེ་དཀར་པོའི་མདངས་ལ་འཁྱུད།། 

རླབས་ཀྱིས་གངས་ཆུ་སྔོན་མོའི་གཞུང་ལ་བསྲེས།། 

ཉམས་ཀྱིས་རིག་གནས་བརྒྱ་ལ་ཤ་ཤེད་བཙུད།། 

གནའ་དེང་བོད་ཀྱི་གསལ་བྱེད་སྔ་ནས་གྲགས།།


ཐར་པའི་མདུན་མ་སྒྲུབ་པའི་ཐབས་ལམ་དང་།། 

འཇིག་རྟེན་འཚོ་གནས་བསྐྲུན་པའི་ཤེས་རབ་ཡོངས།།

སྐྱོན་ཡོན་ཆབ་ཀྱི་ཆུ་འགོ་དབྱངས་ལ་ཐུག། 

དེའི་ཕྱིར་ཡུན་ནས་གསོན་རྒྱུ་བསོད་སྐལ་འབོད།།


༢༠༡༩/༢/༡༤/བོད་ཚེས་དགུ་ཉིན་གྱི་ཞོགས་བྲིས།


 
 
དཔྱད་གཏམ་སྤེལ་བ།
སྒྲིག་འཇུག...
Powered by Oblog.