སྒྲིག་འཇུག...
 
ཟིན་བྲིས་ལི་ཐོ།
སྒྲིག་འཇུག...
སྤྱི་བསྒྲགས།
སྒྲིག་འཇུག...
ཆེད་སྒྲིག་རྣམ་དབྱེ།
སྒྲིག་འཇུག...
ཟིན་ཐོ་གསར་བ།
སྒྲིག་འཇུག...
དཔྱད་གཏམ་གསར་བ།
སྒྲིག་འཇུག...
ཆེམས་གསར་བ།
སྒྲིག་འཇུག...
འཚོལ་བཤེར།
སྦྲེལ་མཐུད།
ཐོན་བྲིས་སྤྱི་བསྡོམས།
སྒྲིག་འཇུག...


 
དེ་རིང་སྔ་དྲོའི་གོམ་བསྐྱོད་ཚིག་ལ་ཕབ་པ།
[ 2018/12/3 10:39:00 | By: vase ]
 

དེ་རིང་སྔ་དྲོའི་གོམ་བསྐྱོད་ཚིག་ལ་ཕབ་པ།


བསོད་ནམས་བློ་གྲོས།


༧ གནམ་མཐའ་གཙང་བའི་གསེར་ཉིའི་འོད་ཀྱི་ཡིད་འོང་ཟེར་ཐག་ང་ཚོར་འཁྱུད།།

ཞག་དང་ཡུད་ཀྱི་བདུན་ཕྲག་ངལ་གསོ་དགོད་སྒྲའི་དཔལ་ཡོན་ཚལ་དུ་དངངར།།

ཁེར་རྒྱུགས་ཕེར་བའི་ཁེར་རྐྱང་ང་རང་འཁོར་ཆུང་དཀར་པོའི་པང་ལ་འཁྲས།།

ཁྱུང་ཆེན་འཕུར་བའི་མཁའ་ལམ་གཙང་ས་ཁྱུང་ཆུ་བཞུར་སའི་འགྲམ་ནས་བསྐྱོད།།


འཚོ་ཚིས་ཞབས་ཞུ་ཉོ་ཚོང་འབེལ་སའི་སྣ་མང་ཁྲོམ་གྱི་སྲང་དུ་སླེབས།།

ཁྱུང་ཆེན་རལ་པའི་གར་སྟེགས་གསེབ་ཀྱི་གཞོན་ནུ་སྐུ་ཁམས་ཨེ་བདེ་ཞུས།།

ཁང་བརྩེགས་སྲང་གི་བཞི་མདོའི་དཀྱིལ་གྱི་གྲོགས་པོའི་དོན་དག་ཨེ་གྲུབ་ལབ།།

དེ་ནས་བར་ཞིག་སེམས་ཀྱི་གྲོགས་པོས་མགྲོན་གྱི་སྟབས་ཀ་འགྲིག་ཡོད་གསུངས།།


ལགས་སོ་སྐད་ཀྱི་ཡ་ལན་ཞིག་དང་དམར་ཆུང་ལྕེ་ཡིས་ཨ་ལན་ཞུས།།

འོད་ཀྱི་སྐར་ཁུང་ཤར་ལ་གྱུ་བའི་ཁང་བརྩེགས་གཉིས་པའི་ཚོམས་ཆེན་ནང་།།

མཆེད་གྲོཌ་མང་པོས་གསོལ་སྟོན་བཤམས་ནས་གདན་སྟེགས་མང་པོ་གྲལ་ལ་བསྟར།།

གཞན་སྐད་རྐྱང་པའི་ངག་རྩལ་མེད་ཀྱང་ཐ་ཐོར་ངག་གིས་བཟའ་བཏུང་མངགས།། 


ཤེལ་སྒོང་འོད་ཀྱི་ཅོག་ཙེའི་འགྲམ་ནས་ང་ཚོ་ཐམས་ཅད་གྲལ་དུ་འཁོད།།

ཁ་དང་ལག་པས་ཁ་པར་རྩེད་ཞོར་ཀུ་རེའི་གཏམ་གྱིས་གླེང་མོལ་བྱས།།

དཀར་པོའི་འབྲས་ལ་གཡུ་རྒྱན་སྤུད་ནས་དཀར་ཟས་སྔོ་ཚལ་སྟབས་ཀ་བསྒྲིགས།།

གྲྭ་རྐྱང་བསམ་བློས་གྲྭ་རྐྱང་འཚོས་ནས་གང་ལ་འཚམས་པའི་འཚོ་བ་རོལ།།


དཔོན་ཆེན་འདྲ་བའི་ཞབས་ཞུ་མི་དགོས་གཤེན་རབ་རང་གཏོ་རང་གཡོག་ཡིན།།

ཕྱུག་ཆེན་འདྲ་བའི་རྒྱས་སྤྲོས་མི་འདོད་བཟའ་རྒྱུ་ལྷག་རྒྱུ་གཉིས་མི་དགོས།།

བག་མེད་སྤྱོད་པའི་ལོངས་སྤྱོད་དོར་ནས་དབུས་ལམ་འཚོལ་ནས་འཚོ་མཁན་ཡིན།།

ལས་དབང་སྒྲིག་གིས་ཚོམས་གཅིག་སྤུངས་ལ་བསམ་བློའི་གླེང་མོལ་གཅིག་པ་གྱུར།།


ལན་རེར་ཕྱི་ཡི་ཁ་བའི་མདངས་ལ་ཁྲ་ཆུང་མིག་གིས་བྱ་ར་ཤོར།།

ཡུན་རེར་ནང་གི་སྣ་མང་ལེའུ་དངོས་པོའི་དབྱིབས་ལ་མཚར་སྣང་ཤར།།

ཐུན་རེར་ཁ་ལག་མྱུར་མགྱོགས་མཉེན་གསུམ་ཟ་ཁང་བདག་པོ་དེ་ཉིད་གླེང་།།

སྐབས་རེར་གོང་མའི་ཡ་རབ་བཟང་སྤྱོད་ཟ་མཁས་འཐུང་མཁས་སློབ་གསོ་དྲན།།


དེ་རིང་དབུ་རྩེ་གངས་ཀྱིས་བརྒྱན་པའི་དགུན་གྱི་ཚུགས་ཀ་མ་འཆུག་གོ།

ད་ནངས་ཉི་མ་སྤྲིན་གྱིས་མ་གཡོག་ཕར་རི་ཚུར་རིར་ཉི་དྲོད་འཁྱིལ།།

དབྱར་རྩྭའི་ཕ་ས་གཡང་སྡེ་ཕྱུག་མོ་སོས་དལ་ངལ་གསོ་སྐྱིད་ཚོད་དང་།།

སྒེར་གཞིས་མཚེར་གྱི་འཚོ་བ་རོལ་བཞིན་རང་རང་ས་རུ་བཞུགས་ཡོད་ཚོད།།


བག་ཆགས་སད་པའི་ལས་དབང་བཙན་པོས་སྒྲིག་བཀོད་གཅིག་གི་གྲལ་ཀ་ནས།།

དད་དམ་གཙང་མས་ཕྱི་ནང་བངས་བས་ཞབས་ཞུ་གུས་པའི་བསྟན་བདག་དང་།།

དངོས་འབྱོར་མཆོད་པས་ཚོགས་བསགས་ཆེ་ལ་ལྷ་ཚོགས་བསྐང་བའི་སྡེ་ཚོགས་ཚོ།།

རྟེན་འབྲེལ་མཐུན་རྐྱེན་བཀའ་དྲིན་ཅན་པོ་སྐུ་བསོད་བདེ་བའི་ཁ་གཡང་འབོད།།


གོ་ལའི་ལྗོངས་ཀྱི་ལྷ་དང་བླ་མ་སྐྱ་དང་སེར་མོའི་འགྲོ་བ་ཀུན།།

བདེ་ཞིང་སྐྱིད་པའི་མདུན་མའི་ལམ་ཁ་གང་གིས་མི་འདོད་སུ་ཞིག་དཀོན།།

འདོད་དོན་འགྲུབ་པའི་སྙིང་རྗེ་སྐམ་པོ་ཁོ་བོའི་ཡིད་ཀྱི་སྦུབ་ནས་བསྐྱངས།།

ལག་ལེན་མེད་པའི་བྱམས་བརྩེའི་བཤད་གཡམ་ཁོ་བོའི་ཁ་ནས་མང་མང་བསྒྲགས།།


                                  ༢༠༡༨/༡༢/༢/ཉིན་གྱི་སྔ་དྲོ།

             ཁང་བརྩེགས་གཉིས་པའི་སྟེང་ནས་ཤར་ཤར་འཁྱུག་གོ།།


 
 
དཔྱད་གཏམ་སྤེལ་བ།
སྒྲིག་འཇུག...
Powered by Oblog.