ཡང་རྩེ་དྲང་ངེས་གཉིས་ལ་དཔེ་ཀློག་བྱས་པའི་ཟིན་བྲིས། 

ཁྱུང་སྨྱུག་ཐོགས།

༧ ཡང་རྩེ་ཀློང་ཆེན་དྲང་ངེས་གཉིས་ཀྱི་གཞུང་གླེགས་བམ་སྟོད་སྨད་གཉིས།   པན་ཆེན་ལི་ཤུ་སྟག་རིང་གིས་མཛད།   དྲང་ངེས་གཉིས་ཀྱི་འགྲེལ་པ་མཛད་མཁན།   ཞུ་ཡི་བླ་མ་སྐྱབས་ཀྱི་སྟོན་པ་རིན་ཆེན་འོད་ཟེར།

༧ རྫོགས་ཆེན་ཡང་རྩེ་ཀློང་ཆེན་གྱི་མདོ་ཁུངས་ནི།   རྫོགས་པ་ཆེན་པོ་སེམས་ཀློང་མན་ངག་གི་སྡེ་གསུམ་ལས།   ཀློང་ཆེན་བསྒྲགས་པ་སྐོར་གསུམ་དང་སྔགས་སེམས་མཐའ་དག་གི་ནང་ནས།   ལི་ཤུ་སྟག་རིང་གིས་མན་ངག་སྙིང་པོར་བཏུས་པ་ཡིན་ནོ།   དེ་ལ་གཉིས་ཏེ།   ལི་ཤུའི་ལོ་རྒྱུས་དང་།   དེས་མཛད་པའི་སྙན་རྒྱུད་འདི་ཉིད་ཀྱི་ལོ་རྒྱུས་སོ།   དང་པོ་ནི་སྔོན་གཉེན་ཡུལ་ཟ་ར་སྟག་སྐྱ་བྱ་བ་ན།   རྒྱལ་པོ་གཉེན་སྟག་སྤུངས་བྱ་བ་དང་།   ཡུམ་མུ་ལ་བཙན་བྱ་བ་དང་གཉིས་ལ།    འབངས་གྲོང་ཁྱེར་འབུམ་ཚོ་བརྒྱད།   ནོར་བུ་ལོངས་སྤྱོད་བསམ་དུ་མེད་པ་མངའོ།   དུས་ནམ་ཞིག་ལ་རྒྱལ་པོ་ལ་གཡུ་བྱ་ཁུ་བྱུག་གཅིག་གིས།   ཙན་དན་གྱི་ནགས་གསེབ་ན།   མ་ེཏོག་ལ་དངོས་གྲུབ་ཡོད་ཟེར་བ་བྱུང་ནས།   རྒྱལ་པོ་ནགས་གསེབ་ན་བྱོན་པས།   མེ་ཏོག་གི་སྟེང་དུ་བུ་མོ་སྐྱེ་མཆེད་ལེགས་པ་གཅིག་འདུག་ནས།   བླང་ནས་ཡུམ་ལ་ཕུལ་བས་ཤིན་ཏུ་དགྱེས་ཏེ།   མིང་ཡང་རླུང་རྒྱལ་སྟག་ཟ་ལི་ཝེར་དུ་བཏགས་སོ།   ཤིན་ཏུ་བཀྲ་ཤིས་རྫུ་འཕྲུལ་དང་ལྡན།   སྟག་གཟིགས་ཁལ་དུ་འགེལ།    ནམ་ཞིག་བྲག་རིན་ཆེན་སྤུངས་པ་ན།   མཁའ་འགྲོ་ལྔའི་སྒྲུབ་པ་མཛད་པས།   མོ་ལས་ཕོ་རུ་གྲུབ་ནས།   ཡབ་རྒྱལ་པོའི་སྤྱན་སྔར་བྱོན་པས།   ཀྱེ་སྲས་མཆོག་སྐྱེས་བུ་ཁྱད་པར་ཅན།   མོ་ལས་ཕོར་གྲུབ་ཅི་ལྟ་བུ་ཞེས་པས།   ང་ནི་འགྲོ་བའི་དོན་ལ་འོང་།   འཆི་མེད་གཙུག་ཕུད་སྤྲུལ་པ་ཡིན།   ཁོ་མོ་གཉེན་གྱི་གདུང་འཛིན་པའི།   གཉེན་ལི་ཤུ་སྟག་རིང་བྱ་བ་ལགས།   རྒྱལ་པོ་ཡབ་དང་ཁོ་མོ་སྲས།   སྐྱེ་བ་བདུན་ནས་ཡབ་སྲས་འབྲེལ་གསུངས་སོ།   དེར་མི་ལོ་བརྒྱད་ཅུ་རྩ་གཉིས་སུ་རྒྱལ་སྲིད་བཟུང་།   བོན་གྱི་བསྟན་པ་དར་རོ་ཅེས་གསུངས་སོ།   དགུང་ལོ་བརྒྱ་དང་བཅུ་གསུམ་པའི་དུས་ན།   ཞང་ཞུང་སྨར་གྱི་ཡུལ་དུ་བྱོན་ནས་བོན་རྣམས་བཙལ་ཏེ།   ཁྱད་པར་དུ་བསྒྲགས་པ་སྐོར་གསུམ་དམར་ཁྲིད་དང་བཅས་པ་ཞུས་སོ།   དེ་ནས་སྐད་རིགས་མི་མཐུན་པ་སུམ་བརྒྱའི་ཡུལ་དུ་བྱོན་ཅིང་།   ལ་ལར་དཔའ་བོར་སྤྲུལ་ཅིང་མཁའ་འགྲོའི་བཅུད་རྣམས་བླང་།   རེས་འགར་མཁའ་འགྲོར་སྤྲུལ་ཅིང་གྲུབ་ཐོབ་མཁའ་སྤྱོད་རྣམས་ཀྱི་དགོངས་པ་བླང་།   རེས་རྒྱལ་པོ་མཛད་ཅིང་ཞང་ཞུང་རྒྱ་གར་བྲུ་ཤ་རྣམས་ཀྱི་མངའ་མཛད་དོ།   དགུང་ལོ་ཉིས་བརྒྱ་དང་ལྔ་བཅུ་ང་བརྒྱད་པའི་དུས་སུ།   སྟག་གཟིག་གི་ཡུལ་འོལ་མོ་ལུང་རིང་དུ་བྱོན་ནས།   ཚེ་དབང་ཐོབ་པའི་བླ་མ་ཀུན་འོད་རྒྱལ་པོ་དང་།   བླ་མ་དམུ་ཙ་ཏྲ་ཧེ་པོ་དང་།   མུ་ཆོའི་སྐུ་འཚོབ་རྒྱལ་བ་དོན་གྲུབ་དང་གསུམ་ལ།   དབང་བར་པོ་སོ་བརྒྱད་དུ་ཞུས།   ངོ་སྤྲོད་ཁྲི་སྨོན་རྒྱལ་བཞད་དུ་བཏབ།   ལུང་རྣམས་ཤམ་པོ་ལྷ་རྩེར་གཏུགས།   མེ་ཏོག་གི་གླིང་ལ་དཀའ་སྤྱད་མཛད།   ཉམས་གཡུང་དྲུང་དགུ་བརྩེགས་ཀྱི་རི་ལ་བསྐྱངས།   དགུང་ལོ་སྟོང་དང་ཉིས་བརྒྱའི་དུས་ན།   སྟག་གཟིག་ནས་བོན་གྱི་ཡང་བཅུད་ཁྲི་ཕྲག་བཅུ་གཅིག   ཁྲུང་ཁྲུང་ཀང་ཀ་བྱ་རྒོད་དུར་བྱ་བཞི་ལ་བཀལ་ནས།   དྲོ་ཐེབ་གཅིག་གིས་ཏི་ཙེ་རུ་ཕེབས།   དེ་ནས་དྲོ་ཐེབ་གཅིག་གིས་བསམ་ཡས་སུ་ཕེབས་ཅེས་སོ།   བསམ་ཡས་ལ་བྱ་དཀར་ནག་ཁྲ་གསུམ་ལས།   ཀང་ཀ་རྒྱ་གར་ཡུལ་དུ་རྒྱལ་ཕྲན་

གཅིག་གི་ཕྱག་ཏུ་བབས་པས།   ལྷག་བདག་སྔགས་གྲོལ་བྱུང་བའོ།   ཁྲུང་ཁྲུང་རྒྱ་ནག་ཡུལ་དུ་རྒྱལ་ཕྲན་གཅིག་གི་ཕྱག་ཏུ་བབས་པས།   ལེགས་ཏང་རྨང་པོར་བྱུང་བའོ།   བྱ་རྒོད་ཞང་ཞུང་ཡུལ་དུ་བབས་པས།   ཞང་ཞུང་སྡེ་བརྒྱད་ཡུལ་དུ་བོན་གྱི་ཆར་བབས་སོ།   ཕྱིས་མཁས་པ་མི་བཞིས་བོད་དུ་བསྒྱུར་བས།   རྒྱ་དཀར་ནག་གི་བོན་སྐོར་དུ་གྲགས་སྐད་དོ།   གཞན་ཡང་བླ་མ་ཆེན་པོ་དེ་ཡིས་བོད་ཡུལ་དུ།   གྲུབ་རྟགས་དུ་མ་ཞིག་བསྟན་ཏེ།    གཡག་རྒོད་དང་ཁྲུང་ཁྲུང་བཅིབས་པ་དང་།   ཡར་ལུང་གི་ཆུ་བོ་གྱེན་དུ་བསྒྱུར་བ་དང་།   རི་བོ་ཕྱག་གིས་ཁྱེར་བ་དང་།   ཉི་ཟླ་ཆ་ལང་དུ་བརྡེབས་པ་དང་།    བྱ་རྒོད་དུ་སྤྲུལ་ནས་འོག་མིན་བསྐོར་བ་དང་།   གཞའ་ཚོན་ལ་ཞོན་ནས་གླིང་བཞི་ཉུག་པ་ལ་སོགས་གྲུབ་རྟགས་དུ་མ་ཡོད་དོ།   གཉིས་པ་དེས་མཛད་པའི་སྙན་རྒྱུད་འདི་ཉིད་ཀྱི་ལོ་རྒྱུས་ནི།   དགུང་ལོ་ཉིས་སྟོང་སུམ་བརྒྱའི་དུས་སུ།   ཤེལ་གྱི་བྲག་དཀར་རྩེ་རྫོང་གཡུང་དྲུང་པད་མ་རིན་ཆེན་དང་།   འཁོར་ལོ་བཀའ་རྟགས་བརྩེགས་པའི་ཕྱག་རྒྱ་ཅན་གྱི་ཕུག་ན་༼དེ་ཡང་མངའ་རིས་ཀྱི་མང་ཡུལ་བྲག་སྟེང་བྱ་བ་དེ་ནའོ།༽དགོངས་པ་མཛད་ཅིང་བཞུགས་ཙམ་ན།   ལྷ་གཤེན་ཡོངས་སུ་དག་པའི་སྤྲུལ་པ་རྣལ་འབྱོར་པ་ནག་ཚེ་འཕེལ།   རྒྱལ་གཤེན་མི་ལུས་བསམ་ལེགས་ཀྱི་སྤྲུལ་པ་རྣལ་འབྱོར་བ་རྟོག་པ་ཀུན་འཇོམས།   ཀླུ་གྲུབ་ཡེ་ཤེས་སྙིང་པོའི་སྤྲུལ་པ་རྣལ་འབྱོར་བ་གཅེར་བུ་མདུང་ཐོག་དང་གསུམ་གྱིས།   བླ་མའི་ཐུགས་ཀྱི་མཛོད་བསྐུལ་ཏེ།   ཀྱེ་བླ་མ་སྙ་ཆེན་པོ་ལགས།   དུས་མཐའི་སེམས་ཅན་ཚེ་ཐུང་ཞིང་གུ་བྲེལ།   ཉམས་སུ་བླང་བའི་ལོང་མེད་པར་ཚེའི་དུས་བྱས་ནས།   འཁོར་བ་མཐའ་མེད་དུ་འཁྱམས་པ་རྣམས་ཀྱི་དོན་དུ།   ཡང་དག་པ་དོན་གྱི་གནས་ལུགས།   བཀའ་རྒྱུད་ཐམས་ཅད་ཀྱི་སྙིང་པོ།   བླ་མའི་ཐུགས་ཀྱི་དགོངས་པ།   སྙན་རྒྱུད་ཁྱད་པར་ཅན་གྱི་གདམས་ངག་ཅིག་མེད་ན།   རྒྱུད་ཐམས་ཐད་ནི་གོང་འོག་གི་དམིགས་འཁྲུགས།   ལུང་ཐམས་ཅད་ནི་སྟོང་པ་རྒྱས་བཏབ།   མན་ངག་ཐམས་ཅད་ནི་ཚིག་ལ་འཕྱོས་ཏེ་བསྡུས་དཀའ།   བླ་མ་རྣམས་ཀྱིས་གསུངས་པའི་དགོངས་པ་ཐམས་ཅད་ཀྱང་།   ཟབ་ཅིང་གཏིང་རིང་ལ་ཤིན་ཏུ་ཆ་འཕྲ་བས།   གོ་ཞིང་རྟོགས་པ་ནམ་ལངས་པའི་སྐར་མ་བས་ཉུང་།   དེའི་ཕྱིར་ན་སྙན་རྒྱུད་ཁྱད་པར་ཅན།   གདམས་ངག་ཚིགས་སུ་ཉུང་བ།   དོན་དུ་ཟབ་པ།   དོན་ཉམས་སུ་བླང་བདེ་བ།   བླང་ན་ཕན་ཡོན་ཆེ་ཞིང་ལྟ་དགོངས་ཁྱད་པར་ཅན་རྒྱུད་ལ་སྐྱེ་བ།   ཉོན་མོངས་པ་དང་སྡུག་བསྔལ་གྱི་གཉེན་པོར་གྱུར་པའི་སྙན་རྒྱུད་ཁྱད་པར་ཅན་གྱི་གདམས་ངག་ཅིག་ཞུ།   ཞེས་ཐུགས་ཀྱི་མཛོད་བསྐུལ་བས།   བླ་མས་ཀྱང་དེ་ལྟར་ཡིན་པར་དགོངས་ནས།   ལུང་གི་དབྱིངས་ཕྱུང་།   རྒྱུད་ཀྱི་དོན་བཀྲོལ།   མན་ངག་གི་གནད་བསྡུས།   དགོངས་པའི་ཀློང་བརྟོལ་ནས།   གང་ཟག་བློ་དངོས་གསུམ་གྱི་དོན་དུ།   བསྒྲགས་པ་སྐོར་གསུམ་དང་།   གཞན་ཡང་སྔགས་སེམས་རྒྱུད་ལུང་ཐམས་ཐད་ཀྱི་དོན་བསྡུས་ཏེ།   སྙན་རྒྱུད་ཡང་རྩེ་ཀློང་ཆེན་འདི་ནི།   བླ་མ་སྙ་ཆེན་པོའི་ཐུགས་ཀྱི་དགོངས་པ་མན་ངག་གི་གནད་ཕྱུང་པ་ཡིན་ནོ།   དེ་ལྟར་མཛད་པ་ཡང་གདུལ་བྱ་དུས་ལ་བབས་པར་དགོངས་ནས།   ཡེ་གཤེན་གཙུག་ཕུད་ལི་ཤི་སྟག་རིང་དུ་སྤྲུལ།   ལྷ་ཀླུ་མི་གསུམ་རྣལ་འབྱོར་བ་གསུམ་དུ་སྤྲུལ་ནས།   བསྟན་པའི་མདོ་བཟུང་བས།   ཕྱི་རབས་རྣམས་ལ་ལི་ཤུ་སྟག་རིང་ཤིན་ཏུ་བཀའ་དྲིན་ཆེའོ།    བོན་འདི་༼ཡོང་རྩེ་ཀློང་ཆེན༽ཀུན་བཟང་གིས་གསུངས་སམ་ལི་ཤུས་གསུངས་ཞེས་ན།   ཀུན་བཟང་གིས་རྒྱུད་ལུང་མན་ངག་གསུམ་དུ་གསུངས།   ལི་ཤུས་དེ་དག་གི་བཅུད་བསྡུད་ནས་མན་ངག་ལག་ལེན་དུ་བཀོལ་བའོ།   ལི་ཤུ་ནི་གཞན་དོན་དུ་གདུལ་བྱའི་སྣང་ངོ་ལ་རིག་འཛིན་ལྟར་སྣང་ཡང་།   ངོ་བོ་ནི་སངས་རྒྱས་ཡིན་ཏེ།   ལི་ཤུ་བསྐལ་སྟོང་སངས་རྒྱས་ཀྱི་ངོ་བོ་ཡིན་པར་ལུང་ནས་བཤད་དོ།   དེ་ལྟར་ལི་ཤུ་དང་ཀུན་བཟང་གཉིས་སུ་མེད་པའི་རང་བཞིན་དུ་ཤེས་པར་མཛོད།   

བླ་མ་སྙ་ཆེན་པོ་ལི་ཤུ་སྟག་རིང་གི་དགོངས་པ།   ཞེས་པ།   གོང་མར་གྱུར་པས་ན་བླ།   འགྲོ་བ་བུ་ལྟར་སྐྱོབ་པས་ན་མ།   སྙ་ནི་རུས་པ་རྒྱལ་པོའི་རྒྱུད་ཡིན་པས་ན་ཆེན་པོ།   ལི་ཤུ་ནི་བསྐལ་སྟོང་སངས་རྒྱས་ཀྱི་ངོ་བོ་ཡིན་པས་སོ།   ཉོན་མོངས་འཁོར་བའི་གཡུལ་ལས་རྒྱལ་བས་ན་སྟག   ཉིས་སྟོང་ལྔ་བརྒྱར་འགྲོ་དོན་མཛད་པའམ།   ཐུགས་རྗེའི་འགྲོ་དོན་རྒྱུན་དུ་མཛད་པས་ན་རིང་།   དགོངས་པ་ནི་ཉམས་གསུམ་དྲོད་བཞི་རྟགས་དྲུག་གོ །

༼ཉམས་གསུམ།༽   ༼དྲོད་བཞི།༽   ༼རྟགས་དྲུག་གོ༽         

༼༡ཉམས་གསུམ་ནི།   །སྣང་བ་དབང་དུ་འདུས་པས་འཁོར་བཅས་ལྷུན་གྱིས་གྲུབ།   །སྐུ་ལུས་ཤིང་བལ་ལྟར་ཡང་བས་ཕྱི་ཡི་ཉམས་དང་ལྡན།   །རིག་པ་འགག་པ་མེད་པས་རྩོལ་བྲལ་འཛིན་པ་ཞིག   །ཡེ་ཤེས་མཁའ་ལ་འཕུར་བས་ནང་གི་ཉམས་དང་ལྡན།   །རླུང་སེམས་ཐ་དད་མེད་པས་དབྱེར་མེད་ཐིག་ལེར་གྲོལ།   །ཟུང་འཇུག་གནད་དུ་ཚུད་པས་གསང་བའི་ཉམས་དང་ལྡན།

༼༢དྲོད་བཞི་ནི།   །འབྱུང་བ་དབང་དུ་འདུས་པས་ཕྱི་ཡི་དྲོད་དང་ལྡན།   །རླུང་སེམས་གནད་དུ་ཚུད་པས་ནང་གི་དྲོད་དང་ལྡན།   །གཉིས་མེད་དོན་ལ་བདེ་བས་གསང་བའི་དྲོད་དང་ལྡན།   །ཟུང་འཇུག་ཕྱག་རྒྱར་གྲོལ་བས་མཐར་ཕྱིན་དྲོད་དང་ལྡན།

༼༣རྟགས་དྲུག་ནི།   །སྣོད་བཅུད་སལ་ལེ་གསལ་ལགས་པས།   །མངོན་ཤེས་ལྔ་དང་ལྡན་པའི་རྟགས།   །ཐུགས་རྗེ་ལ་བྲི་བཀོལ་མི་བདོག་པས།   །འགྲོ་དྲུག་ཕ་མ་ཡིན་པའི་རྟགས།   །བརྟུལ་ཤུགས་ཀྱི་སྤྱོད་པ་སྣ་ཚོགས་མཛད།   །སྣང་བ་ལམ་དུ་སློང་པའི་རྟགས།   །མཁྱེན་སྤྱོད་༼དཔྱོད༽ཐེག་པའི་སྟོབས་མངའ་བས།   །སྡེ་སྣོད་རྒྱུད་ལས་རྫོགས་པའི་རྟགས།   །མི་མཐུན་རྐྱེན་ལ་ཐོག་རྫིས་མཛད།   །འགལ་བ་ལམ་དུ་སློང་པའི་རྟགས།   །རང་གྲོལ་ཆེན་པོའི་དགོངས་པ་གསལ།   །རྫོགས་ཆེན་གྱི་ལྟ་བ་རྫོགས་པའི་རྟགས།

སྤྱིར་མཚན་གདགས་ལུགས་ལ་མང་ཡང་།   དེ་ལ་འདྲ་བ་རྒྱུ་མཚན་དུ་བྱས་པ་ནི་དཔེ་ལས་བཏགས་པ་དང་།   འབྲེལ་བ་རྒྱུ་མཚན་དུ་བྱས་པ་ནི་དཔེ་དོན་ཟུང་འབྲེལ་ལ་བཏགས་པའོ།   འདིར་དཔེ་འདྲ་བ་རྒྱུ་མཚན་དུ་བྱས་ནས་གདགས་པ་ནི།   ཡོང་རྩེ་ཀློང་ཆེན་ཞེས་པ།   སྣང་སྲིད་ཡོངས་ཀྱི་རྩེ་མོ་ནམ་མཁའ་ཡིན་པས་ན་ཡང་རྩེ།   ནམ་མཁའི་ཀློང་དུ་སྣང་སྲིད་མི་གནས་པ་དང་མ་བྱུང་བ་མེད་པས་ན་ཀློང་།   ནམ་མཁའ་ལ་ཚད་བཟུང་མེད་པས་ན་ཆེན་པོའོ།   འབྲེལ་བ་རྒྱུ་མཚན་དུ་བྱས་ནས་བཏགས་པ་ནི།   འཁོར་འདས་བོན་ཡོང་གི་རྩེ་མོ་བླ་མེད་ཐེག་པའི་སེམས་ཉིད་ཡིན་པས་ན་ཡང་རྩེ།   བོན་ཉིད་དང་སེམས་ཉིད་ཀྱི་ཀློང་ནས་བོན་ཅན་དང་འཁོར་འདས་ཐམས་ཅད་མི་གནས་པ་དང་མ་བྱུང་བ་མེད་པས་ན་ཀློང་།   བོན་ཉིད་སེམས་ཉིད་ལ་ཚད་བཟུང་དུ་མེད་པས་ན་ཆེན་པོའོ།   

སྤྱི་ལོ་/༢༠༡༨/༩/༡༣/ཉིན་རྩེ་དྲུག་གྲྭ་བཙུན་ཚུལ་ཁྲིམས་རྒྱལ་མཚན་ནས།