ཆར་གྱི་བསིལ་གདུགས་འོག་ནས་ཁྱོད་རང་ཡིབ་པ།

དབྱངས་ཆར་བདུད་རྩི་ཟེགས་མའི་བསིལ་གཡབ་འོག་དང་།

མེ་ཏོག་མགོ་ལྕོགས་ལྡེམ་པའི་རྩྭ་ལྗང་གསེབ་ཏུ།

ཚོར་བ་སྐྱིད་ལ་བཀྱོན་པའི་ཁེར་རྐྱང་བ་ཞིག

གཡའ་བྲག་རྫ་སྤང་མཚམས་ནས་ཁྱོད་རང་ཡིབ་སོང་།

མཐིང་མདོག་གཡུ་གཞོང་ནང་གི་གངས་ལྟ་མེ་ཏོག

ཤ་འུ་ཕྱག་གིས་གཅེས་པར་ཡིད་ཀྱིས་བླངས་ཏེ།

རུམ་ཁའི་སེམས་ཀྱི་གསང་བ་ཁྱོད་ཀྱིས་བཤམས་ནས།

ངོས་འཇམ་རི་ཡི་སྐེད་ནས་ཁྱོད་རང་ཡིབ་སོང་།

ཨ་སྔོན་གནམ་ལ་རེག་པའི་བྲག་དཀར་ཞིག་དང་།

དོག་མོ་ས་ལ་ཟུགས་པའི་རྟིང་རྩ་རྣོ་སྟེ།

རྩི་ཏོག་ཚོམས་སུ་དཔུང་བའི་ཉག་ཀ་ཞིག་ནས།

ཟེ་འབྲུ་མེ་ཏོག་བཏུ་བཞིན་ཁྱོད་རང་ཡིབ་སོང་།

བསིལ་ལྡན་ས་སྲོད་དྲོད་ཀྱིས་ལ་ལུང་བདལ་ལ།

དགའ་སྐྱིད་དཔལ་ཡོན་འཚོ་བས་ཡུལ་ལུང་ཁྱབ་སྟེ།

རྟོག་འགྱུ་ཚོར་བའི་རི་མོ་རུག་ཏུ་བཏབས་པའི།

སྨྲང་བོན་ཆོ་རབས་གྱེར་ནས་ཁྱོད་རང་ཡིབ་སོང་།

དབྱངས་གསལ་ངག་གི་ལྷ་ཆ་ཕྱག་གིས་བཀྲོལ་ནས།

གདངས་ཐག་བྲག་ཆའི་མདུད་པ་ལྗགས་ཀྱིས་བཤིག་པའི།

རིག་པའི་ཆར་ཞོད་མཐུག་པའི་མར་ཁུ་ཞིག་སྟེ།

ཤེས་བྱའི་རིག་བརྒྱ་བགྲོ་བཞིན་ཁྱོད་རང་ཡིབ་སོང་།

སྨུག་པ་ལ་ལོངས་ལྡེབས་པའི་རི་ཁུགས་ཤིག་དང་།

རླུང་བུ་བསིལ་བསིལ་ལྡང་བའི་སྤང་ཁུགས་དེ་ནས།

དབྱར་གཞུང་ཡིད་ཀྱི་ཚོར་བ་གླུ་རུ་འཐེན་བཞིན།

བསིལ་གྲིབ་ཆར་གདུགས་འོག་ནས་ཁྱོད་རང་ཡིབ་སོང་།

བུང་བ་རྩི་ཡི་ལང་ཚོའི་མངར་ཁ་འཇིབ་སྟེ།

རུམ་ཁ་སེམས་ཀྱི་འཕེལ་དྲོད་བདེ་སར་བཀྱོན་ནས།

འཛུམ་ཁ་པད་མོ་བཞད་པའི་སྤང་ཁུགས་དེ་ནས།

དགོད་ཁའི་ལག་འཇུ་བྱེད་བཞིན་ཁྱོད་རང་ཡིབ་སོང་།

རྫ་བྲག་གཡའ་སྤང་གྲུ་སོ་རྐང་པས་གཤག་སྟེ།

བཙན་དབང་ལས་ཀྱི་རྡོག་སྣེ་ས་ལ་དྲུད་བཞིན།

དཀར་དམར་སྐྱ་ཐིག་ལམ་གྱི་གཞི་མདོ་དེ་ནས།

འོད་ཀྱི་ཐིག་གུ་ཁྱེར་བཞིན་ཁྱོད་རང་ཡིབ་སོང་།

སྤྱི་ལོ་/༢༠༡༨/༧/༡༣/ཉིན་/ཁྱུང་བསོད་བློས་ནས་ཤར་བྲིས་བྱས།