དེ་རིང་ཚོར་བའི་སྤྲིན་སྤུང་།

ད་ནངས་ཞོགས་པའི་སྐྱ་རེངས་ཤིག

ཤར་མཐའི་ཕྱོགས་ནས་དལ་དུ་འཐེན།

ཨ་སྔོན་གནམ་གྱི་ཐིག་ལེའི་འོད།

ནུབ་རི་གངས་ལ་ལྷམ་མེར་འཚེར།

དུས་བཅད་ཐུན་གྱི་རྡོ་ཏིང་ཞིག

ཐོན་འཛིན་སྦུག་ལ་ཁྲིགས་སེ་གྲགས།

གསེར་ཞག་འོ་མའི་ཞོགས་ཇ་དེ། 

ལྟོ་བའི་ཁུད་ལ་ལྟེམ་མེར་འཁྱིལ།

སྔོ་བསང་གཡུ་ཡི་མེ་ལོང་ཞིག

ཡང་སྟེང་དགུང་ནས་ཡང་སྟེང་འཕག

ཚོར་འདུ་རྩེད་འཇོ་ཡིད་ཀྱིས་འཁྲབ།

དགོད་སྒྲའི་གཏམ་གླེང་གྲོས་སུ་བཀུག

རླབས་བསྐྱོད་རླངས་འཁོར་ལག་གིས་དཀྱུས།

གནམ་མཐའི་ལྷོ་ལ་མྱུར་དུ་བགོམ།

ལབ་གླེང་ཚོར་འདུ་ཟེགས་མ་ཞིག

གཤོང་ལུང་རྒྱུད་ནས་མཁའ་ལ་ཐོན།

གཡང་རི་གངས་བྲག་རྔམ་མཐུག་པའི།

སྨུག་པོ་རི་ཡི་སྒལ་གཞུང་དང་།

དྭངས་གཙང་ཟེགས་མའི་རྫ་ཆུ་བཞུར།

སིལ་ཏོག་རྩི་ཡི་སྤང་ཁུད་འཁྱིལ།

བལ་དཀར་འཐོར་འདྲའི་རྫ་ཤུལ་གསེབ།

གཡང་དཀར་མེ་ཏོག་ཁྱུ་ཚོགས་བཞད།

གྲུ་ཁུག་ཐེམ་གྱི་ཐོག་བརྩེགས་མཛེས།

ཝ་ལ་དཀར་པོའི་ཉམས་དེ་བརྗིད།

སྤྲིན་དཀར་བང་རིམ་བསྟར་ས་སྟེ།

བསིལ་ལྗོངས་རི་བོའི་ཉག་ཀ་ནས།

ང་དང་མཆེད་པོ་དགོད་སྒྲ་ལྷང་།

སྤྲོ་སྐྱིད་དཔལ་ལ་དེ་རིང་བསྐྱོད། 

ལྷུན་པོའི་དབུ་རྩེ་གནམ་ལ་བཀན།

རྫ་རྡོ་དཀར་པོའི་ངོས་ལ་འཁྲས།

ཡལ་འདབ་གཡུ་ལོའི་ཚང་ཚིངས་མཐུག

ལྗོན་ཤིང་སྟོང་གི་གྲལ་ཁ་བསྟར།

གཡུ་གཞོང་སྤང་ལ་རང་བྱུང་བརྡོལ།

རྩི་ཏོག་སྟོང་གིས་སེར་ཕྲེང་བསྟར།

ར་བ་སྒོ་བཞིའི་ནོར་གནག་གསེབ།

གཞོན་ནུ་སྐེད་པ་ལྡེམ་ལྡེམ་འཁྱུག

དཀར་གསུམ་ཐུད་ཀྱི་དབྱར་ཤེ་རྒྱས།

གསེར་ལུང་ཕྱུག་མོའི་འདབ་ཞོལ་དུ།

གཡག་རྒོད་རོག་པོས་ངར་ལྷབ་ལྡིར།

གད་ལ་རྭ་རྩེད་སྒྱུར་བཞིན་འདུག

མེ་ཏོག་དྲི་བསུང་འཐུལ་ས་ནས།

ལྷ་འབྲི་དྲུད་མས་ངུར་རྒྱང་འཐེན།

དྭངས་གཙང་རྩྭ་ཆུ་རོལ་བཞིན་འདུག

ལྷགས་རླུང་གཤག་པའི་གནག་རྫི་ཅག

འུར་ཐག་ཁྲ་རིལ་ཀླད་ལ་སྐོར།

རྫ་སྤང་མཚམས་ནས་དལ་དུ་ཆས།

ནོར་གནག་མ་བུ་ཆ་འགྲིག་ཅན།

གཡང་ཐག་གདང་ལ་བཏགས་གྲབ་འདུག

འཕྲུལ་གྱི་རླབས་ལ་ལག་གིས་འཇུས།

རྒྱང་གི་ཐང་ཆེན་གོམ་གྱིས་བགོམ།

ཚང་ཚིངས་རི་ཡི་སྐེད་ནས་ཆས།

འདུ་འཛི་བྲལ་བའི་གཞིས་སུ་སླེབས།

གདམས་ངག་ཚན་ཁ་རྒོད་ས་སྟེ།

མན་ངག་བྱིན་ཁ་འབར་ས་ཞིག

ཉམས་ལེན་ཆར་ཆེན་འབྲུག་པ་ཡི།

རྣལ་འབྱོར་ཆེན་མོ་མཇལ་ཁ་ཐོབ།

སེམས་པ་དལ་དུ་ལྷོད་མཚམས་ནས།

ཆིབས་སུ་མྱུར་མགྱོགས་རླུང་ལ་བཅིབས།

གཡའ་རི་གངས་བྲག་ལ་ལུང་བསྡེབས།

སྨུག་མོ་རི་ཡི་རྒྱང་ནས་ཕེབས།

མར་དཀར་ནོར་བུ་སྒ་ར་ར།

བཅུད་དཀར་འོ་ཞོ་ཉི་ལི་ལི།

ཟས་ཀྱི་གཏེར་ཁ་སྤུངས་སེ་སྤུང་།

ཟད་མེད་ལོངས་སྤྱོད་འགྲིགས་སེ་འགྲིག

ལས་ཀྱིས་འབྲེལ་བའི་མཆེད་པོ་ཅག

རྩྭ་ལྗང་བལྟམས་པའི་སྤང་ཁུག་དང་།

འབྲི་གཡག་འདྲེས་པའི་ལྷས་འདབས་སུ།

ཕུན་སུམ་ཚོགས་པའི་སྐྱིད་སྒར་བཏབས།

རང་བྱུང་ལྗོན་ཤིང་དྲི་བསུང་ཞིམ།

རྫ་རྡོ་དཀར་པོ་བརྗིད་ཅིང་བདལ།

སྤང་ཐང་སྔོན་མོ་ཁོད་ཅིང་མཉམ།

“ཕུག་སྟེང་”གདོང་གི་མཚེར་ས་སྐྱིད།

མ་འོངས་ལོ་ཟླའི་ཚེ་ལྷག་ནང་།

མཐུན་པའི་མཆེད་པོ་མ་བྲལ་ན།

སྐྱིད་པའི་ཉི་མ་བཟང་བརྒྱ་ལ།

ཡང་ནས་བསྐྱོད་པའི་རེ་སྨོན་ཡོད།

དེ་རིང་བདུན་ཕྲག་ངལ་གསོ་ཉིན་མོ་ཁྱུང་ནག་སྡེ་པའི་འབྲོག་ས།

ཝ་སྨད་ཕུག་སྟེང་ཁ་ནས་/ཁྱུང་བསོད་བློས/ཤར་བྲིས་བྱས།

སྤྱི་ལོ/༢༠༡༨/༨/༢༡/ཉིན་བྲིས།