ཁྱིམ་ཚང་ཆུང་ཆུང་ཞིག་ལ་གནས་སྒྲུང་འདི་བཞིན་ཡོད་དོ།

ཁྱུང་བསོད་བློ།

༧    ལུང་པ་ཞིག་ནང་ལ་ཁྱིམ་ཚང་ཆུང་ཆུང་ཞིག་ཡོད་ཨ་ཕ་ལ་རྡོ་ལོ་དང་ཨ་མ་ལ་གཡུ་ལོ་འབོད་དོ།  ཁོང་གཉིས་པོ་རོང་པའི་ཞིང་ལས་པ་ཞིག་རེད་ཀྱང་ཕ་མེས་ཡང་མེས་ཀྱི་ཆོས་ལུགས་དང་།  སོ་སོའི་ཡུལ་སྲོལ་གོམ་གཤིས་སོགས་རྒྱུད་འཛིན་བྱེད་པ་ལ་ཞེན་ཆགས་ཀྱི་དམ་བཅའ་འཐུག་པོ་དང་།  རྐུ་རྫུན་གཉིས་ལ་རྒྱབ་སྟོན།  ལྷ་ཆོས་གཉིས་ལ་ཕུགས་བཅོལ་མཁན་གྱི་ཁྱིམ་ཚང་དཀྱུས་མ་འཛིན་མཁན་ཞིག་ཡིན་འགྲོ  ཁོང་གཉིས་ལ་ཕྲུ་གུ་གཉིས་ཡོད་དོ།  ཕྲུ་གུ་ཆུང་བ་ལ་ཟླ་བ་ཟེར། ཆེ་བ་ལ་སྔོ་རྡོ་འབོད་པ་དེ་གཉིས་ཡིན་ནོ།  ཕྲུ་གུ་ཟླ་བ་ནི་ཁོང་གཉིས་ཀྱི་སེམས་ཀྱི་གཅེས་ལོ་འགངས་ཆེན་ཞིག་འཛིན་ནོ།།    སྤྱིར་ཕྲུ་གུ་ཟླ་བ་དང་སྔོ་རྡོ་གཉིས་པོ་སྐྱེ་སྔ་ཕྱི་ཡིན་ལ་ལོ་ན་གཉིས་ཙམ་གྱི་ཆེ་ཆུང་ཡོད་དོ།  ཁོང་གཉིས་པོ་ཨ་མ་གཡུ་ལོ་ཡི་ཁོག་ལ་ཡོད་དུས།  ཁོང་ཕ་མ་གཉིས་ཀྱིས་ཕྲུ་གུ་གཅེས་བསྐྱང་བྱ་ཐབས་ལ་འབད་འབུང་གལ་ཆེན་མཛད་དེ།  མིག་གིས་མཐོང་ཚད་ཀྱི་བཟའ་བཏུང་གང་བྱུང་ཡོད་ཚད་ཨ་མ་གཡུ་ལོ་ཡིས་ཟ་མ་ཕོད་པར་ཁོག་གི་ཕྲུ་གུ་ལ་གཅེས་སྲུང་གལ་ཆེན་མཛད།  ཕྲུ་གུ་ཟླ་བ་དང་སྔོ་རྡོ་གཉིས་སྔ་ཕྱི་སྲིད་པའི་འགྲོས་ལྟར་ཨ་མ་གཡུ་ལོ་ཡི་ཁོག་ཏུ་ཆགས་མ་ཐག་ནས།  ཟླ་དགུ་ཞག་བཅུ་ཇེ་རིམ་དུ་ཨ་མ་གཡུ་ལོ་ཡི་གཟུགས་པོ་ལ་དཀའ་ངལ་ཆེན་པོ་འཕྲད་དེ། ཨ་མ་གཡུ་ལོ་ཡི་ངོ་གདོང་ནག་པོ་གྱུར། ཨ་མ་གཡུ་ལོ་ཡི་སྐྲ་ལོ་དུམ་དུམ་ཆད།  ཨ་མ་གཡུ་ལོ་ཡི་ལང་ཚོ་མོག་མོག་གྱུར། ཨ་མ་གཡུ་ལོ་ནི་ཉི་རེ་བཞིན་དུ་ལུས་པོ་ཇེ་ལྕི་སོང་ནས། མཐར་ཕྲུ་གུ་གཉིས་པོ་ཨ་མ་གཡུ་ལོའི་མངལ་ནས་དལ་འབྱོར་གཟུགས་བཟང་གི་ལང་ཚོ་རིམ་བཞིན་མི་ཡུལ་དུ་བུད་པ་རེད།  ཕྲུ་གུ་གཉིས་པོ་ལ་ཁ་ཡོད་ཀྱང་ཟ་མ་བཟའ་མི་ཤེས་ལ།  རྐང་པ་ཡོད་ཀྱང་གོམ་པ་སྤོ་མི་ཤེས།   རྣམ་དཔྱོད་ཡོད་ཀྱང་སྐད་ཆ་སྨྲ་མི་ཤེས་པའི་བྱིས་པའི་ལང་ཚོ་དམར་འབྱར་མའི་དུས་ཚིགས་ཟླ་བ་དང་ལོ་ལ་ཨ་མ་ཚེ་རིང་གིས་ཟས་ཞིམ་པོ་ལྕེ་ཡིས་བྱིན།   གོས་འཇམ་པོ་ལག་པས་ཀླུབས།  འོ་མ་མངར་མོ་ནུ་མས་སྤྲིངས་ནས་རིམ་བཞིན་བསྐྱེད་སྲིང་བྱས་པ་ཞིག་རེད།   མཚམས་ཤིག་ནས་ཕྲུ་གུ་ཟླ་བ་གོམ་པ་འཁྱའ་ཁྱོར་གྱི་ལོ་ན་སོན་ལ་ཉེ་སྐབས་ཨ་མ་གཡུ་ལོས་ངག་ནས་འཇམ་པའི་གཅེས་ཚིག་ལབ། ལག་ནས་མཛུབ་གུས་ཁྲིད་བྱ་ཡེ་བྱིའུ་ཡེ་སྨྲ་བཞིན་མེ་ཏོག་གི་ལྡུམ་རའི་དཀྱིལ་དུ།  ཕྲུ་གུ་ཟླ་བ་གོམ་ཁ་རེ་སྤོ་དུས་ཨ་མ་གཡུ་ལོ་དང་ཨ་ཕ་རྡོ་ལོ་གཉིས་པོ་དགོད་འཛུམ་ཤིག་ཤིག་གཡོ་བཞིན་ཕྲུ་གུ་ཟླ་བ་ལ་གཅེས་བསྐྱང་ཚད་མེད་བྱས།   དེ་ནས་ཕྲུ་གུ་ཟླ་བ་ལོ་ན་དྲུག་ལ་ཉེ་སྐབས་ཨ་ཕ་རྡོ་ལོ་དང་ཨ་མ་གཡུ་ལོ་གཉིས་ཀྱིས་ཕྲུ་གུ་ཟླ་བ་སློབ་ཆུང་གི་སྒོ་ལ་ཞུགས་ཐབས་འབད་འབུང་བྱས་ནས་སློབ་ཆུང་གི་ལས་དབང་བཟང་པོ་སྤྲད། དེར་སྐབས་ཕྲུ་གུ་སྔོ་རྡོ་ལོ་ན་བརྒྱད་དགུ་སོན་ཀྱང་ཨ་ཕ་རྡོ་ལོ་དང་ཨ་མ་གཡུ་ལོ་གཉིས་ཀྱིས་བ་རྟ་ནོར་གནག་གི་རྫི་བོ་ཁོ་ན་ལ་བཀོལ་སྤྱད་བྱ་རྒྱུ་འགོ་བཙུགས་ཡོད་པ་ལས།  གཞན་སློབ་གྲྭ་ཆེ་འབྲིང་གི་གོ་སྐབས་སོགས་གང་ཡང་མ་སྤྲད་ལ་ལག་གཡོག་གི་རྫི་བོ་བྱས་བཞག་པ་ཞིག་རེད།  ཨ་ཕ་རྡོ་ལོ་དང་ཨ་མ་གཡུ་ལོ་གཉིས་ལ་རྒྱུན་ལྡན་འཚོ་བའི་ཐབས་ལམ་ཀྱི་ལས་ཀ་མང་པོ་ཡོད་ཀྱང་། སློབ་ཕྲུག་ཟླ་བས་སློབ་ཆུང་འགྲིམ་སྐབས་ཀྱང་སྔ་དགོང་བར་གསུམ་ལ་ཡང་།  སློབ་ཐུན་གྲོལ་གྲབས་ཡོད་དུས་ཉིན་རྟག་པར་ཨ་ཕ་རྡོ་ལོ་སློབ་ཕྲུག་ཟླ་བ་བསུ་ལ་ཆས་ཀྱིན་ཡོད་པ་དང་།  ཨ་མ་གཡུ་ལོ་ཡིས་ཁྱིམ་ནང་དུ་སྔ་དགོང་གི་ཁ་ཟས་གྲ་འགྲིག་པོར་བཟོ་ནས་སྒུག་བཞིན་ཡོད་པ་རེད།  ཕྲུ་གུ་སྔོ་རྡོ་ནི་ཉིན་རྟག་པར་གནམ་གཤིས་གྲང་དྲོ་དང་སྣང་བ་མོས་མིན་ལ་མ་ལྟོས་པར། ཇ་འཁྱགས་པ་ཞིག་དང་རྩམ་པ་སྐྱ་བོ་ཞིག་རྒྱབ་ལ་ཁྱེར་ནས་རྫ་རྩེ་དང་གངས་འཁྱགས་གསེབ་ཏུ་ནོར་རྟ་བ་གླང་གི་རྫི་བོ་ཆས་རྒྱུ་དེ་ཙམ་ལས་གཞན་ཅི་མེད།  ཕྲུ་གུ་ཟླ་བ་དང་ཨ་ཕ་རྡོ་ལོ་སྒོ་ཁར་སླེབས་གྲབས་ཡོད་དུས་ནས། ཨ་མ་གཡུ་ལོས་ཁ་ལག་ཅོག་ཙེ་ཐོག་བཟའ་ཆོག་ཆོག་སྒྲིག་ནས་ཨ་མ་གཡུ་ལོ་ཕྲུ་གུ་ཟླ་བ་བསུ་རུ་ཁྱིམ་ཚང་གི་སྒོ་ཁ་ནས་སྒུག་བཞིན་ཡོད་རེད།  ཕྲུ་གུ་ཟླ་བ་སྒོ་ཁར་སླེབས་མ་ཐག་ནས་ཨ་མ་གཡུ་ལོས་ཕྲུ་གུ་ཟླ་བ་ལ་ཨ་མ་གཅེས་གཅེས་མ་གཡང་འཁྱགས་བྱུང་ངམ།  ལྟོགས་བྱུང་ངམ་འདྲི་བཞིན་ལག་པ་གཉིས་ཀྱིས་ཨ་མ་གཡུ་ལོས་ཕྲུ་གུ་ཟླ་བ་སྤྱི་གཙུག་ཏུ་ཡར་བཅག་བཞིན།  ཨ་མ་གཡུ་ལོའི་སྐེ་ཁུག་བཅར་ནས་སྲོག་དམར་དམར་བྱེད་བཞིན་གཅེས་ནས་སློབ་ཆུང་གི་ལོ་ན་རིམ་བཞིན་སོན་པ་རེད།  དེ་རྗེས་སློབ་འབྲིང་དང་སློབ་ཆེན་གྱི་གོ་སྐབས་རིམ་པར་བཙལ་ནས་ཨ་ཕ་རྡོ་ལོ་དང་ཨ་མ་གཡུ་ལོ་གཉིས་ཀྱིས་རོང་པའི་ཞིང་ལས་ཀྱི་འཚོ་བའི་བར་གསེང་དུ་ཨར་ལས་དང་དབྱར་རྩ་སོཌ་གསོག་སྒྲུབ་ཀྱི་ཡོང་འབབས་ཕལ་ཆེར་ཕྲུ་གུ་ཟླ་བ་ལ་བསྐུར་ནས་ཕྲུ་གུ་ཟླ་བ་སློབ་ཐོན་ལ་ཉེ་བ་ཞིག་རེད།  དེ་སྐབས་སུ་ཡང་ཕྲུ་གུ་སྔོ་རྡོ་ནི་ཕྱི་ཡི་སྐུ་གཟུགས་རིང་ལ་རྩལ་སྟོབས་ཆེན་པོ་ཞིག་རྫོགས་སྡད་ཡོད་ཀྱང་།  ནང་གི་ཤེས་རིག་ནི་ཧ་ཅང་ཞན་པོ་ལས་གཞན་གང་ཡང་མེད།   ཕྲུ་གུ་སྔོ་རྡོ་ལ་གང་ཡང་མེད་པ་དེ་ནི།  ཨ་ཕ་རྡོ་ལོ་དང་ཨ་མ་གཡུ་ལོ་གཉིས་ཀྱིས་ཆུང་དུས་སློབ་སྦྱང་གི་གོ་སྐབས་ཉིན་གཅིག་ལ་མ་སྤྲད་པས་སྐྱོན་རེད།  ཕྲུ་གུ་སྔོ་རྡོ་ནི་ཉིན་རྟག་པར་ནོར་རྟ་བ་གླང་གི་རྫི་བོ་ཁོ་ན་བྱས་ནས་ལོ་ན་དར་མ་ཞིག་གྱུར་པ་ཙམ་རང་རེད།  དང་པོ་ནས་ཨ་ཕ་རྡོ་ལོ་དང་ཨ་མ་གཡུ་ལོ་གཉིས་ཀྱིས་ཚེ་མཇུག་གི་དཔལ་འབྱོར་འཚོ་བའི་མཐུན་རྐྱེན་དང་།  རྒས་འཁོག་སྐབས་ཀྱི་ཞབས་ཞུ་དང་ཁྱིམ་ཚང་གི་དམིགས་ཡུལ་ཡོངས་རྫོགས་ཕྲུ་གུ་ཟླ་བ་ལ་བློ་བཅོལ་ནས་འགྲོ་གྲོན་ཚོད་མེད་གཏོང་བ་རེད།   ཕྲུ་གུ་ཟླ་བ་སློབ་ཆེན་ཐོན་ནས་ཟླ་བ་གཉིས་ཙམ་ལ་ཟླ་ཕོག་གི་ཡོང་འབབ་དེ་ཨ་ཕ་རྡོ་ལོ་དང་ཨ་མ་གཡུ་ལོའི་ལག་ཏུ་སྤྲད་ཀྱང་།  ཟླ་བ་གཉིས་མཚམས་ནས་ཁོ་རང་གི་བསམ་བློ་ལ་ང་རང་གི་ཟླ་ཕོག་ནི་ང་རང་སློབ་གྲྭ་ལོ་མང་པོ་སོང་བའི་དཀའ་ལས་ཀྱི་འབྲས་བུ་རེད། དེ་ང་རང་མ་གཏོགས་སུ་གཅིག་ལ་མི་དབང་བསམ་པའི་བློ་སྐྱེས་ནས་ཟླ་བ་གཉིས་ཀྱི་མཚམས་ནས་ཨ་ཕ་རྡོ་ལོ་དང་ཨ་མ་གཡུ་ལོ་གཉིས་ལ་ང་རང་གི་ཟླ་ཕོག་ང་རང་ལ་མཁོ་འདུག  ཁྱེད་ཚོས་མ་མཐོང་ཡང་ང་རང་ལ་གསང་བའི་དགའ་ལོ་དང་སེམས་ཀྱི་རོགས་ལོ་ཡོད་དེ་ཚོ་གསོ་བསྐྱང་བྱ་དགོས་ཟེར་ནས་སྐད་ཆ་སྦོམ་པོ་བཤད།  ཨ་ཕ་རྡོ་ལོ་དང་ཨ་མ་གཡུ་ལོ་གཉིས་བློ་ཕམ་བྱུང་ཡང་ཅི་བྱ་འདི་བྱེད་མེད་པར་གྱུར།  ཕྲུ་གུ་ཟླ་བས་ང་རང་ནི་ཨ་ཕ་རྡོ་ལོ་ཁྱོད་སྔོན་མ་ང་རང་གི་ཨ་ཕ་དང་པོར་གྱུར་སྐབས་ཀྱི་ས་ཚིག་དེར་སླེབས་གྲབས་འདུག ང་རང་གི་ཟླ་ཕོག་ང་རང་ལ་མཁོ་འདུག ང་རང་གིས་འཚོ་བ་གསར་པ་ཞིག་སྤྱོད་དགོས་འདུག་ལབ་ནས་ཕྲུ་གུ་ཟླ་བའི་ཟླ་ཕོག་དེ།  ཟླ་བ་གཉིས་ལ་མ་གཏོགས་ཨ་ཕ་རྡོ་ལོ་དང་ཨ་མ་གཡུ་ལོ་གཉིས་ཀྱིས་བེད་སྤྱོད་གཏོང་རྒྱུ་མ་རྙེད།  སྔོན་མ་སློབ་གྲྭ་འགྲོ་སྐབས་སློབ་ཡོན་སོགས་ཁྱིམ་ཚང་གི་སྒོར་མོ་ཚོད་མེད་དུ་བསྐུར་ཀྱང་ཟླ་ཕོག་དེས་ཁྱིམ་ཚང་ལ་ཟླ་བ་གཉིས་ཙམ་ལས་གཞན་ཕན་ཐོག་ཆེན་པོ་མ་བྱུང་།   སྔོན་མ་ནས་ཨ་ཕ་རྡོ་ལོ་དང་ཨ་མ་གཡུ་ལོ་གཉིས་ཀྱིས་ཕྲུ་གུ་ཟླ་བ་ལ་རེ་བཅོལ་ཆེན་པོ་བྱས་པའི་དམིགས་མདུན་གྱི་ཕུགས་འབྲས་གང་ཡང་ཕྲུ་གུ་ཟླ་བས་སྒྲུབ་རོགས་མ་བྱས་པས་ཨ་ཕ་རྡོ་ལོ་དང་ཨ་མ་གཡུ་ལོ་གཉིས་པོ་འགྱོད་པ་ཚད་མེད་ཤོར།  ཨ་ཕ་རྡོ་ལོ་དང་ཨ་མ་གཡུ་ལོ་གཉིས་ལ་ལྷན་སྐྱེས་སུ་མངའ་བའི་མྱེས་པོའི་ཆོས་ལུགས་དང་ཡུལ་སྲོལ་གོམ་གཤིས་སོགས་རྒྱུད་འཛིན་བྱ་དགོས་བསམ་པའི་དམ་བཅའི་དམིགས་ཡུལ་གང་ཡང་ཕྲུ་གུ་ཟླ་བས་སྒྲུབ་རོགས་མ་བྱས།  ཕྲུ་གུ་ཟླ་བའི་བསམ་བློ་ལ་ཕ་ཆོས་རྒྱུན་འཛིན་བྱེད་པའི་དད་པ་ནི་སྤུ་ཙམ་མེད།  སྲོལ་རྒྱུན་རྒྱུན་སྐྱོང་བྱེད་པའི་ལ་རྒྱ་ནི་ཉག་ཙམ་མེད།   རང་སྐད་རང་གིས་གཅེས་པའི་ཞབས་ཞུ་ནི་ཚིག་ཙམ་མེད།  ད་དུང་མི་གཞན་གྱིས་ཕྲུ་གུ་ཟླ་བ་ཁྱོད་གྲུབ་མཐའ་དང་མི་རིགས་ག་འདྲ་ཞིག་ཡིན་ཟེར་དྲི་བ་བཏང་དུས་གང་ཡང་ལན་འདེབས་མི་ཤེས་པའི་ལྷ་མེད་ཀྱི་འདྲེ་མེད་ཀྱི་མི་ཧྲེང་ཞིག་ཏུ་གྱུར་ཏོ།  མཇུག་མཐར་ཕྲུ་གུ་ཟླ་བས་ཚེ་འདི་ཡི་ཁ་ཕོར་འཚོ་བ་ཙམ་གྱི་ཆེད་དུ་ད་གཟོད་ཨ་ཕ་རྡོ་ལོ་དང་ཨ་མ་གཡུ་ལོ་གཉིས་ཀྱིས་རེ་བཅོལ་ཆེན་པོ་བྱས་པའི་སོ་སོའི་གྲུབ་མཐའ་རྒྱུད་འཛིན་དང་། སྲོལ་རྒྱུན་ལག་བསྟར་ཡོད་ཚད་བརླགས་ནས།  ཕྲུ་གུ་ཟླ་བས་རིག་གནས་དང་ཡ་རབ་ཀྱི་དྲོད་ཁོལ་སྤུ་ཙམ་མེད་པའི་ཁྱིམ་ཚང་འཁྱགས་པ་ཞིག་བཟུང་ནས་སྡད་ཡོད་དོ།  ཨ་ཕ་རྡོ་ལོ་དང་ཨ་མ་གཡུ་ལོ་གཉིས་ཀྱིས་ཕན་ཚུན་ལབ་གླེང་འདི་འདྲ་བྱ་དགོས་བྱུང་། ངེད་གཉིས་སྔོན་མ་དཔལ་འབྱོར་ཡོད་ཚད་ཕྲུ་གུ་ཟླ་བ་ལ་བསྐུར་འགྲོ་གྲོན་ཚད་མེད་བཏང་ཡང་།  ཕྲུ་གུ་ཟླ་བས་ངེད་གཉིས་ཀྱི་དམིགས་ཡུལ་གང་ཡང་སྒྲུབ་མ་བྱུང་འདི་འདྲ་འབྲས་བུ་ངན་པ་ཞིག་ག་འདྲ་ཡིན་ན་ཞེས་སེམས་སྐྱོ་བའི་ངང་ནས་གླེང་དགོས་བྱུང་།  ཨ་ཕ་རྡོ་ལོ་ཡིས་ད་ངེད་གཉིས་འདས་ཟིན་པའི་ལོ་ཟླ་ཞིག་ལ་ནོར་འཁྲུལ་ཚབ་ཆེན་ཞིག་བྱུང་བ་གླེངས། ཕྲུ་གུ་གཉིས་པོ་སློབ་འབྲིང་མ་ཐོན་བར་དུ་ལུགས་གཉིས་པོའི་སྐད་ལ་སྦྱང་བརྡར་བྱ།  དེ་ནས་ཕྲུ་གུ་སྔོ་རྡོ་ལ་རོང་པའི་ཞིང་ས་བཟུང་བཅུག ཕྲུ་གུ་ཟླ་བ་ལ་ཚོང་ལས་སོགས་དཔལ་འབྱོར་ཙ་ཙིག་གཉེར་བཅུག་ནས་འདུག་རྒྱུ་ཡིན་ན་ཏག་ཏག་འགྲིག་ཤོད་ཡོད་སིག  ད་ཕྲུ་གུ་སྔོ་རྡོ་ལ་ཆུང་དུས་སློབ་སྦྱང་གི་གོ་སྐབས་མ་བྱུང་བས།  ཚོང་ལས་རིག་པ་ལ་གཞུག་དགོས་ན་རྩིས་ཀྱི་རྣམ་དཔྱོད་མེད།  གསར་གཏོད་རིག་པ་ལ་གཞུག་དགོས་ན་གསར་ཐོན་ཀླད་པ་མེད། ད་ནོར་གནག་རྟ་གླང་གི་རྫི་བོ་བྱེད་བཞིན་རྨོ་རྐོ་སོ་ནམ་གྱི་བྱ་བ་ཞིག་ཞོར་དུ་ཐུབ་ན་མ་གཏོགས་གཞན་གང་གི་ཕྱོགས་ནས་འཇོན་ས་མ་རེད།  ད་ཕྲུ་གུ་སྔོ་རྡོ་ལ་ཡོད་པ་ནི་གྲུབ་མཐའ་འཛིན་པའི་དད་པ་ཅུང་ཙམ་དང་།  སྲོལ་རྒྱུན་བྱེད་པའི་ཀླད་རྙིང་རན་ཙམ་དང་། རང་དོན་གཉེར་བའི་ཨུ་ཚུགས་ཅུང་ཙམ་ཡོད་པ་ཡིན་པས།  ཨ་ཕ་རྡོ་ལོ་དང་ཨ་མ་གཡུ་ལོ་གཉིས་ཀྱིས་ཚེ་སྨད་ཀྱི་འཚོ་བ་དང་རྒས་འཁོག་སྐབས་ཀྱི་ཞབས་ཞུ་ཡོད་ཚད་ཕྲུ་གུ་སྔོ་རྡོ་ལ་རེ་བཅོལ་མ་ཞུས་ཀ་མེད་རེད་ཅེས་གླེང་དགོས་བྱུང་། མཐར་མཇུག་ཨ་ཕ་རྡོ་ལོ་དང་ཨ་མ་གཡུ་ལོ་གཉིས་པོ་ཤི་མཐའ་བསྐྱེལ་མཁན་ཕྲུ་གུ་སྔོ་རྡོ་རང་ལས་གཞན་སུ་ཞིག་མ་རྙེད་དེ་ཕྲུ་གུ་ཟླ་བས་ནི་ཕྱིར་ལྟས་ཙམ་མ་བྱས་སོ། ཨ་ཕ་རྡོ་ལོ་དང་ཨ་མ་གཡུ་ལོ་གཉིས་འཆི་རན་ཁ་ཕྲུ་གུ་ཟླ་བ་ལ་སུན་ཐག་ཐེངས་དགུ་ཆོད་ནས་ཤི་དགོས་བྱུང་ངོ་།།

 སྤྱི་ལོ་༢༠༡༧/༡༠/༡༤/ཉིན་དྲོ་གཞུང་ཁྱུང་བསོད་བློ་འབོད་པས་བྲིས་སོ།།།