ད་དུང་མ་ལྡོག་པའི་ལས་སྣང་།
ཁྱུང་བསོད་བློ།
བན་བུན་གྱི་སྣང་བ་འདི་ནི་བསིལ་བུ་རྟོག་རླུང་དུ་མས་ཁྱེར།།
ཚོར་འདུ་ཡི་སྲུབ་ཀའི་ཁྲོད་དུ་ལས་སྣང་བ་མོའི་ཕྲ་རྡུལ་ཆགས།།
སྲིད་པ་ཡི་ལུས་ཅན་དེ་ཚོ་ཉོན་ཡིད་ཕྲ་མོས་ནེམ་ནེམ་བྱས།།
སྐྱེ་སྲིད་ཀྱི་དམུ་ཞགས་གོར་མོས་དར་ལུང་འཐེན་པ་ད་ཙམ་མིན།།
སྨྲ་ལྕེ་ཡིས་ལབ་གླེང་འོག་ཏུ་སྐྱིད་སྡུག་ཚིག་གི་མངར་ཁ་དོད།།
སྐྱ་ཐིག་གི་ལམ་བུ་ནང་དུ་བདེ་བའི་ཆེད་དུ་བང་རྒྱུགས་དིར།།
ཀུན་པོ་ཡིས་གོམ་ཁ་བསྟར་ནས་ང་དང་ཁྱོད་ཅེས་གླེང་མོལ་བསྡེབས།།
སྲོག་ཐག་གི་ལང་ཚོ་ཅན་ཚོས་མི་ཚེ་ཡོལ་བ་སུས་མ་ཚོར།།
ལང་ཚོ་ཡི་ལྟེ་ཁྲག་དམར་པོ་ས་ཆེན་བྲང་དུ་འཐོར་བ་དང་།
ཤ་འུ་ཡིས་དྲི་བསུང་འཐུལ་ཏེ་ན་ཆུང་སོ་སྒོ་དོད་པ་ནས།།
ཆ་མེད་ཀྱི་མགྲོན་པོ་དག་མས་འཆི་སྲིད་ནག་པོ་དོར་མ་ནུས།།
ཐོག་མེད་ཀྱི་སྲིད་པས་དེད་པའི་དུ་ཁའི་ཁྲོད་ཀྱི་འཁོར་པ་སྐྱོ།།
འུར་ཟིང་གི་འཁོར་བའི་བྲང་དུ་ཅལ་འདྲོཌ་བསྡེབས་པའི་དབུ་ནག་ཚོ།།
འཕར་ལྡིང་གི་རྣམ་རྟོག་ཕྲ་མོ་ཞེ་ཆགས་སྲེད་པའི་འོད་ལ་འཁྲས།།
སྲེད་ལེན་གྱི་རྣམ་ཤེས་ཕྲ་མོས་ཁམས་གསུམ་མདོ་རུ་བསྐྱར་སྐོར་མང་།།
དུག་ལྔ་ཡི་རླུང་བུ་ནག་པོས་སྨྲེ་ངག་རྫོབ་དཔུང་འཐུག་པོར་བྱས།།
བྲེལ་ཟིང་གི་སྲང་ཀ་ནག་པོར་ང་དང་ཁྱོད་ཅེས་བང་ཁ་འགྲན།།
འཆར་ཅན་གྱི་འཚོ་བ་སྣུམ་པོ་རན་ཚོད་ཙམ་ལས་བགོམ་མ་ནུས།།
འུར་ལོང་དུ་ཆ་རུ་བསྡེབས་པའི་རིཌ་དྲུག་བཤར་སའི་རི་ངོགས་ནས།།
ཆོག་ཤེས་ཀྱི་ཞེ་ཐག་དམར་པོས་བློ་ཆོད་དམ་བཅའ་དཀའ་སར་གྱར།།
འཕར་ལྡིང་གི་སྣང་བ་སྐྱ་མོ་འཛིན་ཞེན་ངད་ཀྱི་རླུང་བུས་སྒུལ།།
འདོཌ་བྱེད་ཀྱི་རྟོག་བློས་མ་བཏཌ་ཡན་གར་གྲུབ་ལ་བདེན་ཁ་ཡངས།།
རིཌ་དྲུག་གི་སྲེད་པའི་མདོ་ལ་ཨ་ལོང་དགུ་ཡིས་བསྐྱར་བསྐོར་བྱས།།
སྐྱེ་སྲིད་ཀྱི་ཐོག་མ་དོད་ནས་ཉོན་མོངས་ཐ་མ་ད་དུང་ལུས།།
༢༠༡༦/༥/༡/དགོང་མོ་སློབ་ཚན་གྲོལ་མ་ཐག་ཏུ་བྲིས།
