ཁེར་ཤག་ནང་གི་བྲོ་བ།
ཁྱུང་བསོད་བློ།
ཟད་ན་སེར་སྣ་མེད་ལ།།
ལྷག་ན་སེམས་ཆཌ་མེད་པའི།།
གྲྭ་རྐྱང་ཁེར་ཟས་དཀར་པོ།།
ཁེར་ཤག་ནང་དུ་ཡོད་རེད།།
ཕྲུ་གུས་འ་འུར་མེད་ལ།།
བཟའ་ཟླས་ཟུར་འདོན་མེད་པའི།།
གྲྭ་རྐྱང་ཞོགས་ཇ་ཞིམ་པོ།།
ཁེར་ཤག་ནང་དུ་ཡོད་རེད།།
ལུས་ལ་སྤོས་དྲི་བྲོ་ལ།།
ངག་ལ་རྩོམ་དྲི་བྲོ་བའི།།
སྤྱན་མིག་གྲུང་པོའི་གྲྭ་རྐྱང་།།
ཁེར་ཤག་ནང་དུ་ཡོད་རེད།།
ཕྱི་ཡི་སྐྱི་མོ་ནག་ཀྱང་།།
ནང་གི་ལྷག་བསམ་དཀར་བའི།།
བྱམས་དང་བརྩེ་བའི་གྲྭ་རྐྱང་།།
ཁེར་ཤག་ནང་དུ་ཡོད་རེད།།
"ལག་པར་དངུལ་ལོ་མེད་ཀྱང་།།"
"ཀླད་པར་ཤེས་བྱས་གང་བའི།།"
མདོ་སྔཌ་སེམས་ཀྱི་གྲྭ་རྐྱང་།།
ཁེར་ཤག་ནང་དུ་ཡོད་རེད།།
ལོངས་སྤྱོད་ཟས་ཀྱི་ཐ་མ།།
སྟབས་བདེའི་ཐུག་པ་འདི་ལ།།
རྩམ་སྐྱ་སྤོད་པའི་གྲྭ་རྐྱང་།།
ཁེར་ཤག་ནང་དུ་ཡོད་རེད།།
དཔལ་འབྱོར་ཚ་དམ་ཡ་གཅིག།
ལོངས་སྤྱོད་ཟླ་གམ་རལ་པོས།།
མི་ཚེ་ཕེར་བའི་གྲྭ་རྐྱང་།།
ཁེར་ཤག་ནང་དུ་ཡོད་རེད།།
འཆད་ན་གཞུང་བརྒྱ་ཤར་ཤར།།
རྩོད་ན་གློག་ཞཌ་འཁྱུག་འཁྱུག།
རྩོམ་ན་ཚིག་མཛོད་གྲྭ་རྐྱང་།།
ཁེར་ཤག་ནང་དུ་ཡོད་རེད།།
ལྟ་བ་མདོ་སྔཌ་སེམས་གསུམ།
སྤྱོད་པ་ཐབས་ཤེས་ཟུང་འབྲེལ།།
འབྲས་བུ་སྐུ་གསུམ་བགྲོད་མཁན།།
ཁེར་ཤག་ནང་དུ་ཡོད་རེད།།
༢༠༡༦/༣/༡༥/ཉིན་ངལ་གསོ་ཉིན་མོ་ཞོགས་ཇ་འཐུངས་ཞོར་བྲིས།
