བྱིས་དུས་ཀྱི་རྩེད་ར་དྲན་པ།

ཁྱུང་བསོད་བློ།

སྲོག་སྐུད་ལྟེ་ཁྲག་འཕོས་སའི་གྱང་ཁུག་དང་།།

བྱིས་པ་འདུར་དུ་རུག་སའི་དྲོད་ཁྱིམ་གྱི།།

གཅེས་ཕྲུག་གཟན་ལ་རོལ་སའི་ཐབ་རྩ་ཡི།།

བྱམས་ཀྱི་མངར་མོའི་འོ་མ་ལན་གཅིག་དྲན།།

ཡན་ལག་ཧྲག་ཏུ་རྒྱས་པའི་ལང་ཚོའི་ཁྲོད།།

ཚོཌ་འདོན་བློ་རུ་བཤར་སའི་ཁང་ཐོག་སྟེ།།

ཨ་དཀར་འུར་འདོན་བྱེད་སའི་ཉིན་ཁུག་དང་།

ཀ་ཁ་རྐན་ནས་གྱེར་བའི་བྱིས་དུས་དྲན།།

རྫི་གྲོཌ་ཟུང་དུ་བསྡེབས་ནས་རི་ལ་ཆས།།

ནོར་ལུག་སྤང་ལ་བཀོད་ནས་ཀི་ཞིག་བཏབ།།

འབྲུ་ཡོས་ཁྲ་བོ་སོ་ཡིས་བལྡད་ཉིན་མོའི།།

ལེབ་ཅན་རྫ་སྤང་མཚམས་ཀྱི་རྫི་ཇ་དྲན།།

གསོང་སྐད་སེང་དུ་ཤོང་བའི་མྱིད་པ་དང་།།

དོན་ལྔ་སྣོད་དྲུག་བཤམས་པའི་ལྟོ་ཆུང་ནང་།།

འཚོ་རྟེན་སྤགས་རིལ་འདེད་པའི་སྐྱོར་ཡ་སྟེ།།

སྤོད་ཀྱི་སྲན་འདེག་གར་མོ་ལན་གཅིག་དྲན།།

སྣ་སྦུག་རྣག་གིས་གང་ཀྱང་ངོ་ཚ་མེད།།

འོག་སྒོར་རྟུག་དྲི་ཐོག་ནས་དྲི་ངན་ཚུབས།།

ལག་རྒྱབ་ཤུར་མ་ནག་པོའི་ཤུན་པཌ་ཅན།།

གྱང་རྒྱབ་ཐལ་དུ་རྩེད་པའི་བྱིས་དུས་དྲན།།

འོད་ཐིག་རྫ་རྩེར་ཕོག་པའི་ཞོགས་པ་ལ།།

ཕར་ལམ་ལྷས་ཀྱི་བེའུ་ལུག་རི་ལ་བཀྲམ།།

ཚུར་ལམ་འདུར་དུ་ཆས་བཞིན་ལྕི་བ་བཏུས།།

ཨ་མས་ཞོགས་ཇ་བཀོལ་བའི་བྱིས་དུས་དྲན།།

འཚོ་བ་ཞིག་གི་འཆར་གཞི་མི་ཞོག་ཀྱང་།།

སྡེ་བ་འཁྲུཌ་པའི་ཕྲག་དོག་མི་དགོས་ལ།།

ཡན་ལག་ཐལ་རྩེད་ཚུབས་ཚུབ་ཉི་མ་བསྐྱེལ།།

བྱིས་དུས་འཚོ་བ་དེ་ལས་སྐྱིད་ཅིག་མེད།།

༢༠༡༦/༣/༢༢/ཉིན་ངལ་གསོའི་ལེའུ་ཞིག་བཀོ