གྲྭ་པ་གྲྭ་རྐྱང་།
ཁྱུང་བསོད་བློ།
བྱིན་གྱི་ཐེམ་མདུད་དམ་པའི་གསང་གནས་དང་།།
རྨིག་རྗེས་བྲག་ལ་དོད་པའི་བྲང་ཁ་རུ།།
ཏིང་འཛིན་རི་བོ་ཆེན་པོའི་རབ་བྱུང་བ།།
ངན་རྟོག་སེམས་ལ་དག་པའི་ལྷོད་ཅིག་ཡོད།།
གནའ་རྫས་བཅུ་རིག་སྡོང་པོའི་གྲིབ་བསིལ་འོག།
ཤེས་རིག་དཔག་བསམ་ལྗོན་པའི་ཡལ་ག་རྒྱས།།
ཚུལ་ཁྲིམས་དྲི་བསུང་འཐུལ་བའི་གྲྭ་རྐྱང་ལ།།
ཆུང་མས་ཟུར་འདོན་མེད་པའི་སྐྱིད་ཅིག་ཡོད།།
བཀའ་ལུང་ཚད་མས་བགྲོ་བའི་རི་ཁུག་དང་།།
དགག་སྒྲུབ་མེ་དཔུང་འབར་བའི་ཐབ་རྩ་ནས།།
ཤེས་རབ་མེ་ལྕེ་འབར་བའི་གྲྭ་རྐྱང་ལ།།
མདོ་སྔགས་སེམས་ལ་བྱང་པའི་སྐྱིད་ཅིག་ཡོད།།
འདུས་མང་ཡོ་ལངས་མཛེས་པའི་མ་ཡུམ་དང་།།
སྣ་མང་བཅུ་རིག་བཞད་པའི་དགའ་ཚལ་དུ།།
ལོ་མང་ཧུར་དུ་བརྩོན་པའི་དཔེ་ཆ་བ།།
གལ་གནད་གོ་བ་རྙེད་པའི་ཉམས་ཤིག་ཡོད།།
བྱིན་གྱི་བརྩེ་བ་དམར་མོ་ཐུགས་ཀྱིས་བསྐྱངས།།
རླབས་ཀྱི་གདམས་ངག་ཟབ་མོ་གསུང་གིས་གནང་།།
མི་ཚེའི་ལམ་སྒྲོན་མཛད་པའི་སློབ་དཔོན་དེ།།
ནམ་ཡང་སེམས་ཀྱི་དཀྱིལ་ལ་ཝ་ལེར་ཡོད།།
༢༠༡༦/༤/༢༥/ཉིན་བྲིས་སོ།།
