ང་གནས་ཡོད།

                                  ཁྱུང་བསོད་བློ།

ཨ་སྔོན་གོར་མོའི་གདོང་ལ་གཡུ་རྒྱན་སྤུད།།

ནོར་འཛིན་དོག་མོའི་བྲང་གི་ཏི་སེའི་པང་།།

ལྷོ་གླིང་རྐང་གཉིས་འཁྲས་སའི་སྒང་ཟུར་གྱི།།

ངོག་གསལ་སྣང་བའི་མཚམས་སུ་ང་གནས་ཡོད།།

དབུ་རྩེ་དགུང་དུ་བཀན་པའི་དབེན་ཆེན་དང་།།

བཀའ་ཡི་ཉིང་ཞག་ཆགས་པའི་ལྡུམ་ར་སྟེ།།

སུམ་གླང་བྲག་དམར་འབར་བའི་རི་སུལ་གྱི།།

གཤེན་སྡེའི་ཡོ་ལངས་གསེབ་ཏུ་ང་གནས་ཡོད།།

དྲང་སྲོང་མཉམ་མེད་དགྱེས་པའི་བཙུན་ལོ་ཡག།

མགོན་ཆེན་རྩ་བླ་དགོད་པའི་འཆད་ཉན་ཟབ།།

རིག་ཁྱུ་གར་དུ་རྩེད་སའི་འཆད་ར་ནང་།།

རབ་བྱུང་གསེར་ཕྲེང་གྲལ་དུ་ང་གནས་ཡོད།།

མག་མོག་ཐལ་རྡུལ་དག་པའི་འཕུར་ལམ་གཙང་།།

རྫོབ་དཔུང་སྣང་བ་ཟབ་པའི་ཉག་ག་དང་།།

སེམས་ཀྱི་འཁྲི་ཤིང་རྒྱས་པའི་ཡལ་འདབ་འོག།

འཇོལ་མོའི་གྲེ་འགྱུར་གསེབ་ཏུ་ང་གནས་ཡོད།།

དཀར་མེའི་འོད་ཞྭ་འཐུག་པའི་གློག་སྡོང་གསལ།།

བཅུ་རིག་གཞའ་གུར་ཕུབ་པའི་པོད་གསེབ་ཀྱི།།

སག་སིག་རྡོག་སྒྲ་མེད་པའི་རྡོ་སྐས་འགྲམ།།

པོ་ཏི་བློ་བཤར་གསེབ་ཏུ་ང་གནས་ཡོད།།

འོད་ཡུག་ཏི་སེ་དཀར་པོ་ལེན་ཀ་གསལ།།

ངོས་འཇམ་སྤང་གི་རྩི་ཏོག་འདོམས་ཁ་དྲོ།།

ཚར་ཆུང་གྲ་ལོ་རྒྱས་པའི་གྲང་ངོབ་གསེབ།།

ཆབ་རོམ་དར་དཔྱང་སྒང་དུ་ང་གནས་ཡོད།།

གྱེར་བསྟན་སེམས་སུ་བཅང་པའི་ཐུཌ་བསྐྱེད་འོག།

རྨིག་རྗེས་བདེན་མཐའ་གསལ་བའི་ལག་རྗེས་ཞོག།

རྐང་རྗེས་གྲུབ་མཐའ་ཟིན་པའི་སྒོ་མཛོད་འབེལ།།

བོན་གྱི་སྦྲང་ཆར་གསེབ་ཏུ་ང་གནས་ཡོད།།

༢༠༡༦/༢/༢/དྲོ་གཞུང་འཁོར་དུས/༡༢/ཐོག་ཏུ་སྤེལ་ལོ།།