ཁེར་གླིང་པ།
ཁྱུང་བསོད་བློ།
ཀུན་བརྟག་རིག་པ་ཞིག་གིས་མཐུ་བརྟས་ནས།།
རྣམ་རྟོག་ཟོ་ཆུའི་དར་སྐུད་མ་ཆད་ཀྱང་།།
རི་བོ་གནམ་དུ་བཀན་པའི་བྲང་ཁ་རུ།།
སྤང་བླང་དབྱེ་བཞག་མཛད་བཞིན་ཁྱེད་རང་ཆས།།
ལས་ཉོན་གྲམ་པོ་ཆབ་ཀྱིས་མ་བངས་ཀྱང་།།
འདུ་བའི་ལང་ཚོ་ནད་ཀྱིས་མ་མནར་བར།།
རིས་དྲུག་སྣང་བ་གཤར་སའི་རི་ངོགས་ནས།།
ཁེར་རྐྱང་རྡོག་ཁ་བགོམ་བཞིན་ཁྱེད་རང་ཆས།།
འདོད་ཡོན་ཟ་ཁ་འགུལ་ནས་ཞེ་མ་ཆགས།།
རྟོག་འགྱུ་འཕར་ལྡིང་བྱེད་སའི་འཁོར་ས་སྟོངས།།
ངེས་འབྱུང་སེམས་ཀྱི་ལྷ་ལམ་དཀར་པོ་ནས།།
ཁེར་གླིང་སིང་སིང་འབུས་བཞིན་ཁྱེད་རང་ཆས།།
བདེ་སྡུག་སྲིད་ཞི་བྲང་གི་བཞི་མདོ་རུ།།
བརྩེ་བ་ཞིག་གིས་ཞོཌ་གཉིད་མ་དཀྲོགས་ལ།།
དུང་བ་ཞིག་གིས་ཨ་ལོང་མ་སྦྲེལ་བར།།
ཁེར་གཉིད་ཞིང་ཁམས་འགྲིམ་བཞིན་ཁྱེད་རང་ཆས།།
ལྟག་དགྱེ་བྱེད་སའི་གོ་སར་མ་བརྙབ་ལ།།
རྡོག་བརྫིས་བཏང་སའི་དམན་སར་ག་ལ་འཛུལ།།
ཡང་སྙིང་དབུ་མ་བཙལ་སའི་གན་གཞུང་ནས།།
བདག་འཛིན་དྲུང་ནས་འབྱིན་བཞིན་ཁྱེད་རང་ཕེབས།།
སྲིད་པ་དཀར་ནག་འདྲེས་སའི་གྲུ་ཟུར་དང་།།
སྐྱོ་ཤས་ངེས་འབྱུང་རླུང་གི་དར་སྣེ་ནས།།
སངས་རྒྱས་ན་བཟའ་གདམ་པའི་སེར་མོ་བ།།
ཁེར་རྐྱང་བློ་བདེ་བྱེད་བཞིན་ཁྱེད་རང་ཆས།།
འཇིག་རྟེན་ཞག་གིས་ནེམ་པའི་རྡོག་ལྷམ་གསེབ།།
རྒྱས་སྤྲོས་ལུས་ལ་སྤུད་པའི་ཡོང་འབབས་དང་།།
ཕྱི་མིག་ཤེད་དུ་བཙིར་ས་གང་མེད་ཀྱང་།།
མ་འོངས་མཁའ་སྤྱོད་ཡུལ་ནས་ཁྱེད་རང་ཆས།།
བརྒྱ་ལོ་མཁའ་རུ་ཕྱར་སའི་རི་ཁུག་དང་།།
ལོངས་སྤྱོད་ནོར་གར་རྩེན་སའི་གླིང་ཁ་རུ།།
ཁྱེད་ཀྱི་འབྱོར་བས་གཞན་བློ་མི་ཚིམ་ཡང་།།
ལ་ཆེན་ལ་མོའི་རྒྱགས་ཕྱེ་ཁྱེད་ཉིད་འབེལ།།
ལས་འབྲས་སྤང་བླང་དཔྱོད་པའི་བློ་མིག་དང་།།
བློ་འདས་ཆེན་པོར་བརྟཌ་པའི་ལྟ་བ་སོཌ།།
ནང་རྟགས་ཕྱི་རུ་བསམ་པའི་བུ་ཡིན་ན།།
དགེ་བྱེད་ཁེར་རྐྱང་ཞིག་ལས་སྐྱིད་ཅིག་དཀོན།།
༢༠༡༦/༡/༡༤/ཉིན་ཕྱི་དྲོ་/༥/ཐོག་མངགས་སོ།།
