ཀུན་ཕན་གསེར་གྱི་ཉི་མ།
ཁྱུང་བསོད་བློ།
ཡང་སྲིད་ཐག་པས་མ་འཐེན་ལ།།
ཆོས་སྲིད་རྫུན་མས་མ་བསྐོས་པའི།།
དོན་གྱི་ཁྲི་འཛིན་སོ་གསུམ་ཁྱེད།།
མཁའ་སྤྱོད་ཞིང་ནས་ལྷ་ཡིས་མངཌ།།
མཚན་དཔེ་ཤར་གྱི་རི་ལ་བཞད།།
མཛད་འཕྲིན་ལྷོ་གླིང་ཅལ་ནས་སྐྱོང་།།
མཉམ་མེད་གསེར་ཁྲི་སེར་པོའི་དཀྱིལ།།
སྐུ་བསོད་སྔར་ལས་རྒྱས་པར་བཞུགས།།
ཉེར་གཅིག་སྙིགས་མ་ལྔ་བདོ་ལ།།
བསྟན་འགྲོའི་དོན་ཆེན་རྒྱུན་དུ་སྐྱོང་།།
ལམ་སྟོན་སྡོངས་གྲོགས་ཤུཌ་སུ་གནང་།།
གཡུང་དྲུང་བསྟན་པའི་སྒྲོན་མེ་མཛད།།
ཡོངས་རྩེ་རྫོགས་ཆེན་བསྟན་པའི་ཏོག།
ལུང་རྟོགས་གསེར་གྱི་ཉི་མ་ཁྱེད།།
བརྩེ་ཆེན་འོད་ཟེར་ཕྱོཌ་བཅུར་སྤྲོས།།
མ་གྱུར་འགྲོ་བའི་སྡོངས་སུ་བྱོན།།
རིག་པའི་རབ་འབྱམས་བྱེ་བའི་གཏེར།།
ཁྱེད་ཀྱི་བཀའ་དྲིན་ཀློང་ནས་བརྡོལ།།
སངས་རྒྱས་ཁྱེད་ཀྱི་ཚུལ་ཁྲིམས་དེའི།།
དྲི་བསུང་གངས་ཅན་ལྗོངས་སུ་ཁྱབ།།
ཐུཌ་རྗེ་གྲིབ་བསིལ་སྣུམ་པོའི་འོག།
བཤད་སྒྲུབ་ཉི་མའི་འོད་ཟེར་དེ།།
མ་ཡུམ་གཤེན་དགོན་ཡོངས་ལ་ཕོག།
བསླབ་གསུམ་འདུས་སྡེའི་མེ་ཏོག་བཀྲ།།
བྲག་རོང་གཡང་གི་མཐའ་མཚམས་དང་།།
མདའ་གྲི་སོ་པའི་མདུང་བར་ནས།།
མཉམ་མེད་ཚང་གི་བསྟན་དོན་དུ།།
ཕྱིར་ནུད་མེད་པར་ཁྱེད་ཉིད་ཕེབས།།
ལྷོ་གླིང་ནགས་ཀྱི་རི་གསེབ་ཏུ།།
སྒོ་བཞི་མཛོད་ལྔའི་གསས་ཁང་བཞེང་།།
ཐེག་པ་དགུ་ཡི་ཐབ་ལྷ་གསོས།།
གཤེན་བསྟན་དོད་དུ་བཤད་སྒྲུབ་བཙུཌ།།
ཧི་མ་ལ་ཡའི་རི་རྒྱུད་ནས།།
བོན་བསྟན་ཆེད་དུ་གྲྭ་ས་འགྲིམས།།
ཁྱེད་ཀྱིས་འདུས་སྡེའི་གཅེས་སྐྱོང་དེ།།
བསྐལ་བ་བརྒྱ་ལ་བརྗེད་དུ་དཀའ།།
བུ་སློབ་བྱེ་བའི་གདང་ཐག་འཐེན།།
གཤེན་བསྟན་སྐྱོང་བའི་བཀའ་དྲིན་འདི།།
འཛམ་གླིང་ནོར་གྱིས་མི་ཁུག་ལ།།
ལྷོ་གླིང་འགྲོ་བས་ཐེག་ཏུ་དཀའ།།
ཀུན་གསལ་གསེར་གྱི་ཉི་མ་ཁྱེད།།
བཀྲིས་འཛམ་གླིང་སོག་ཁ་རུ།།
བདེ་ལེགས་སྐྱིད་ཀྱི་ཉི་མ་འཆར།།
ཕུན་སུམ་ཚོགས་ཤིང་བཞུགས་པར་སྨོན།།
༧སྤྱི་ལོ་༢༠༡༥/སྤྱི་ཟླ/༧/༢/བོད་ཟླ་/༥/༡༥/ཉིན་༧སྐྱབས་རྗེ་རྒྱལ་བ་སྨན་རིའི་ཁྲི་འཛིན་སོ་གསུམ་པ་/ལུང་རྟོགས་བསྟན་པའི་ཉི་མ/རིན་པོ་ཆེ་ཡི་འཁྲུངས་སྐར་ཉིན་གྱི་ཞོགས་པར་དད་པའི་སོར་བཅུའི་མཇལ་ཕྱག་སྤྱི་གཙུག་ཏུ་ཟླུམ་བཞིན་ཕུལ།།
