རིག་པ་སྨྲ་བའི་སྟངས་སྟབས།

                                          ཁྱུང་བསོད་བློ།

མེས་པོ་སེམས་དཔའ་ཞིག་གིས་ཀི་ཞིག་བཏབ།།

རྣམ་དཔྱོད་རིག་སྨྲ་ཞིག་གིས་ལན་ཞིག་ཕུལ།།

ལུང་རིག་ལག་རྒྱུན་དྲོད་མོའི་སྲོལ་ཞིག་དོད།།

  དེ་ནི་ཚད་མ་སྨྲ་བའི་སྟངས་སྟབས་ཤིག།

 ཚོས་ཆེན་གྲུམ་ཙེ་སེར་པོའི་ཁྲི་གཞོང་ཐོག།

རྣམ་རྟོག་ཐེ་རུ་མ་ཚོམ་དམ་ཞིག་བཅས།།

ཕན་ཚུན་དཔང་པོ་བཟང་པོས་དབྱེ་འབྱེད་ཅིག།

དེ་ནི་ཚད་མ་སྨྲ་བའི་ལུགས་རྒྱུན་ཞིག།

དཔྱད་གསུམ་ཚད་མ་རྣོན་པོས་གྲོས་ཤིག་བཏོན།།

ཚུལ་གསུམ་ཡང་དག་རལ་གྲིས་ཐག་ཅིག་བཅད།།

གྲོས་ཆོད་སེར་པོ་གསེར་གྱི་བཅུད་ཅིག་ལོན།།

    དེ་ནི་ཚད་མ་སྨྲ་བའི་དོད་པོ་ཞིག།

ཁེར་ཤག་གྲུ་བཞིའི་དཀྱིལ་དུ་ཙུག་པུར་སྡད།།

གོར་གྱི་མིག་ཟླུམ་དཔེ་ཐོག་ཧྲིག་ཏུ་བགྲད།།

བློ་འཛིན་དཔེ་ཆའི་པོད་ཁ་མཐོ་རུ་བརྩེགས།།

དེ་ནི་ཚད་མ་སྨྲ་བའི་འོས་འགན་ཞིག།

ཉིན་གཅིག་མ་ཡིན་མི་ལོ་བཅུ་ཕྲག་ལྷག།

ཐེངས་ཤིག་མ་ཡིན་འཚོཌ་ཐེངས་གྲངས་མེད་དེ།།

གྲང་ཆེན་གཞུ་མོ་རྒྱུན་འདྲའི་དཀའ་བ་འབུམ།།

དེ་ནི་ཚད་མ་སྨྲ་བའི་ཁུར་པོ་ཞིག།

མཁུར་ཚོས་གདོང་གི་དམར་ལོ་མག་མོག་གྱུར།།

ལུས་ཅན་ལང་ཚོའི་སྡོང་པོར་ནག་དྲེགས་ཆཌ།།

དཀའ་ཚེགས་བརྒྱ་ཁྲི་བརྒྱུད་པའི་ལམ་ཞིག་དོད།།

 དེ་ནི་ཚད་མ་སྨྲ་བའི་ལས་དབང་ཞིག།

མེས་ཆེན་མི་བོ་གཤེགས་པའི་གཤེན་དགོན་དུ།།

བཀའ་ལུང་བདེན་ཁ་བདར་བའི་ཉིང་བཅུད་དེ།།

མགོན་ཆེན་ལྷ་སྲུང་དགྱེས་པའི་མཆོད་སྤྲིན་ཕུལ།།

དེ་ནི་ཚད་མ་སྨྲ་བའི་དགེ་མཚན་ཞིག།

        སྤྱི་ལོ་༢༠༡༥/༧/༡༧/ཉིན་བྲིས།