བྱིན་ཅན་གྱི་པོད་དང་ཀ་ཁ།

      མཛེས་གནའ་རྙིང་གི་དཔེ་བརྩེགས་མཐོ་ལ།

     རོགས་འཆམ་མཐུན་གྱི་ལྷིང་འཇགས་ཁྲོད་དུ།།

     སྤུས་དག་བཞེངས་ཀྱི་བཀའ་བརྟེན་བཟང་པོ།།

     གསེར་ཞུན་མ་ལས་རང་མདངས་གསལ་ལོ།།

    ཚིག་སྣག་ཆུང་གི་དབྱངས་གསལ་རྒད་པོ།།

    ཉམས་དཔྱོད་རིམ་དུ་གནའ་དྲི་ཇེ་ཞིམ།།

      ཚོད་དཔག་རིམ་དུ་རྒྱལ་ཁ་མཐོ་བས།།

      བདེན་ཕུགས་རིང་གི་དན་རྟགས་ཆེའོ།།

          རིགས་སྣ་བརྒྱ་ཡི་སྐད་ཡིག་བྱེ་བ།།

        ཕུགས་མི་གཅིག་ལ་སྲོལ་གཏོད་རེ་རེ།།

        ང་ཁྱོད་དང་ཕྱེས་ལབ་གླེང་མང་ཡང་།།

  གཤེན་དབྱངས་གསལ་ལས་སྔ་ཙམ་མ་འཁྲུངས།།

          བརྗོད་སྟབས་བདེ་ཡི་བྱང་ཆ་དོད་པོ།།

      སྲིད་སྣོད་བཅུད་ཀུན་བརྗོད་བྱར་འུབ་ཆུད།།

         དོན་ཐ་སྙད་ཀྱི་གཏན་ཚིགས་རྣོ་ལ།།

       ནད་སྦྲག་སྐད་ཀྱིས་རྡུལ་ཙམ་མ་གོས།།

     གནམ་ས་འཁྲུགས་ཀྱི་འགྱུར་ལྡོག་རྒོད་ཀྱང་།།

       དབྱངས་རླབས་སྒྲ་ཡི་ངག་རྒྱུན་མ་ཆད།།

          གནའ་སྲོལ་སྐད་ཀྱི་གྲེ་བ་མ་འགག།

        དུས་ཉེར་གཅིག་འདིར་སྔར་ལས་གྲགས་སོ།།

         དཀར་ཐར་ཐོར་གྱི་ཞལ་ཚེམས་སྦུག་དང་།།

            གཞི་བརྟན་རླིང་གི་ཡ་ཆུང་དཀྱིལ་དུ།།

           གཤེན་ཀ་ཁ་ཡི་སྒྲ་གདངས་བཅུག་ནས།།

          གནད་དུས་བཟང་ལ་ཏག་ཏག་བཏོན་སོང་།།

         བཀའ་བྱིན་ཅན་འགའ་མེ་བསྲེཊ་ཆུ་གཡུག།

       རྟེན་འགངས་ཅན་རེ་བརྡུང་གཏུབ་འཕྲོག་བཅོམ།།

         དབུ་སྣུམ་ཆེན་འགའ་མགོ་རྟིང་ལོག་ཀྱང་།།

            དབྱངས་གསལ་བྱེད་ཀྱི་མཚོ་མོ་མ་སྐམ།།

          སྲོལ་བརྡ་རྙིང་གི་ཟུངས་ཁྲག་མ་ཉམས།།

           སྲོག་སྒྲ་གདངས་ཀྱི་དྲི་མ་མ་ཡལ།།

           གདོན་དུག་ལྔ་ཡི་ཆབ་ཀྱིས་མ་ནེམ།།

          ཡེ་གདོད་མ་ནས་གཙང་མ་གཙང་རྐྱང་།།

           གཏོ་བཀའ་སྒྲོམ་གྱི་འབྲུ་ལྔའི་ས་བོན།།

        གསེར་སྤར་གང་གི་ལྗང་སྨྱུག་སུམ་བཅུར།།

         གསུང་བྱིན་ཅན་གྱི་འབྲུ་ཡིག་རྡོལ་ནས།།

        བཀའ་བརྒྱད་ཁྲི་ཡི་གཏེར་ཁ་འཁྲུངས་སོ།།

           རིཊ་རུས་འཛིན་གྱི་སྐད་དང་ཡི་གེ།

       ཁྲེལ་སྨོད་གཡམ་དུ་ཁྲོག་བརླག་གཏོང་ནས།།

          ཡིད་ཞེ་ལོག་གིས་སྣ་གཉེར་མ་བསྒྲད།།

       དབྱངས་གསལ་བྱེད་འདི་བེད་སྤྱོད་བྱེད་དགོས།།

            ལྷོ་འཛམ་གླིང་གི་ཤེས་རིག་ས་བོན།།

          མཛེས་བཅུ་རིག་གི་ཡལ་གའི་མེ་ཏོག།

         ལྗོན་དཔག་བསམ་ལ་བཀྲ་དང་མི་བཀྲ།།

          བྱིན་གནའ་རྙིང་གི་ཀ་ཁ་འཛོམས་མིན།།

         གནས་ལྔ་རིག་གླིང་མཁས་བརྒྱས་བགྲོ་དུས།།

         ལེཊ་སྦྱང་འབྲས་ཀྱི་གསེར་གྱི་རྟགས་མ།།

              རབ་རྒྱལ་ཁ་དེ་ལོན་དང་མི་ལོན།།

         དབྱངས་གསལ་བྱེད་ཀྱི་ལྡེམ་མྱུར་ཐོན་མིན།།

         གསུང་བྱིན་ཅན་གྱི་དབུ་འཕང་མཐོན་པོ།།

        གནས་གངས་ཅན་དུ་ཀ་ཁའི་པོད་བརྩེགས།།

           སུས་འགྲན་མེད་ཀྱི་རྒྱལ་ཁ་འདོད་ན།།

      དབྱངས་སུམ་ཅུ་འདིས་རྨིང་གཞི་བརྩེག་དགོས།།

         རིཊ་མི་གཅིག་པའི་རུས་ལས་མ་འཁྲུངས།།

            ཕྱིས་ཐོན་མི་ཡིས་རྐན་ལས་མ་གྲུབ།།

              ཕ་མེས་པོ་ཡི་གཤེན་སྐད་དག་མ།།

          གཤེན་འོལ་གླིང་ནས་སྔ་ཙམ་བསུས་སོ།།

          ལོ་ཁྲི་གོང་གི་དབྱངས་གསལ་ཁྱིམ་གྱི།།

          ཕ་རྒད་པོ་ཡི་པོད་ཆེན་བཀའ་སྒྲོམ།།

         བུ་སྣབས་ལུག་གིས་སྲོལ་གཏོད་འདོད་ན།།

         ལས་རྒྱུ་འབྲས་འདི་འགོ་མཇུག་ལོག་ཉེན།།    

    ༢༠༡༥-༣-༢༨-ཉིན་ཁྱུང་བསོད་བློ་ནས་བྲིས་སོ།།