མངར་མོ་འོ་མའི་མ་ལོ།

      ལྟེ་ཁྲག་དམར་པོ་མལ་དུ་ཟཊ་ཉིན།།

       ཤ་འཇམ་ནུ་མའི་ཁུག་ཏུ་རུམ་སྟེ།།

      བརྩེ་ཆེན་འོ་མའི་མངར་ཁ་སྟེར་བའི།།

     ཟུག་གཟེར་བཟོད་པའི་ཨ་མ་དྲན་བྱུང་།།

      མགོ་ཡི་སྐྲ་ལོ་སྨུག་ཏུ་མ་དབང་།།

     ཞལ་གྱི་ཞིམ་ཟས་ཞུ་རུ་མ་བཅུག།

     ལྭ་བའི་རྡོ་ཚར་སྐམ་དུས་མེད་པའི།།

         ང་ཡི་ཨ་མ་ནམ་ཡང་ཤ་ཚ།།

     འཛུམ་གྱི་ལང་ཚོ་མཛེས་སུ་མ་ཁོམ།།

     སྨིན་མའི་རྫི་གཤོག་ངོམ་དུ་མ་ཕོད།།

   དབུ་ལོ་དཀར་ལ་རང་དབང་མེད་པའི།།

     དྲིན་ཆེན་ཨ་མ་ནམ་ཡང་དྲན་ནོ།།

   རིགས་བཟང་འོད་གསལ་ལྷ་ཡི་སྲས་མོ།།

དལ་འབྱོར་བསྐྲུན་པའི་དོན་ཆེན་བདག་མོ།།

    སྲིད་པ་གཡང་གི་མཐའ་ལས་གྲོལ་ནས།།

      ཞི་བ་ཆེན་པོའི་བདེ་སར་བཟུང་སྨོན།།

           ༢༠༡༤-༧-༥-ཁྱུང་བསོད་བློ།