མངོན་མེད་གློག་གིས་སྐྱེ་འཇིག།
ཡལ་ཡོལ་གྱི་རྒས་དར་ན་སོ།།
འགྱ་འགྱུར་གྱི་གཤོག་རླུང་གསེང་ཏུ།།
མངོན་མེད་ཀྱི་སྐྱེ་འཇིག་སྲིད་པས།།
འཇམ་བརྡར་གྱིས་ཟུར་ཁ་བུག་གྲབས།།
རེ་བ་ལ་ཕྱིར་འཐེན་མེད་ཆེ།།
དྭོགས་པ་ལ་སྔོན་རྒྱུག་བང་ཆེ།།
བཙན་ཤུགས་ཀྱི་ལས་དབང་རྒད་པོས།།
ལུས་ཟུངས་འདིའི་ལང་ཚོ་འཕྲོག་ཐལ།།
ཚན་རྩལ་ལ་ཚོད་འཛིན་མ་བྱས།།
འགུལ་སྤྱོད་ཀུན་འཕྲུལ་ཆས་སྤྱོད་དྲགས།།
རིན་ཐང་གི་དལ་འབྱོར་གསེར་ཕུང་།།
གསོན་དུར་དུ་བཙན་གྱིས་སྦས་ཉེན།།
དབུ་ནག་གི་མགོ་ལོ་རྒོད་ཀྱང་།།
ཡར་ཐོད་ཀྱི་གདོང་གཉེར་ལྡེབ་རིས།།
མར་མགུལ་གྱི་ཨོག་རྩིད་ནག་པོ།།
སྐྱེ་འཇིག་གིས་བཙན་གྱིས་བཙུགས་ཤག།
འདུག་བསམ་པོ་སྡོད་དབང་མེད་པར།།
འགྲོ་བསམ་ཡང་ཕྱིར་འཐེན་ཐག་པ།།
གློ་བུར་གྱི་སྐད་ཅིག་ཞགས་པ།།
དབང་མེད་དུ་རྐེ་ལ་དབྱུག་ཉེན།།
སློབ་ཚོཊ་ནས་མདུན་མ་སྒུག་སྒུག།
མི་ཚོཊ་ནས་ངོ་ཚ་འཛེམས་འཛེམ།།
ཁྲིམས་ཚོཊ་ནས་ནག་ཉེས་སྐྲག་སྐྲག།
གློ་བུར་དུ་བགྲེས་ས་འཕང་སོང་།།
ཕྱིར་མིག་གིས་མདངས་ཤིག་རྒྱག་ཀྱང་།།
ཡིད་གཏད་ཀྱི་ངེད་ཤེས་རྙེད་དཀའ།།
ཚེ་ཚད་ཀྱི་ཐིག་ཚད་བརྒལ་ཡང་།།
འཇིགས་མེད་ཀྱི་བློ་སྟོབས་མ་རྫོགས།།
ཧང་སང་སང་ཧོད་ཅིག་བལྟས་ཚེ།།
སྐྲ་འཇག་གི་འདབ་ལོ་དཀར་ཉེ།།
ནག་ཐིག་གིས་མཁུར་ཚོས་སྒྲིབ་ཚར།།
མེ་ལོང་མས་མི་རྟག་དྲན་བསྐུལ།།
སྒོ་གསུམ་མདུན་དཔེ་ཆས་གསེབ་ཀྱང་།།
རྒྱང་མཐོང་གི་ལན་ཀ་དྭངས་མས།།
བསམ་གཞིག་གིས་ལྐོག་དོན་མ་དཔོག།
གསོན་ལྤཊ་འདི་ནག་པོ་བསྒྱུར་སོང་།།
ལུས་ངག་དེ་སློབ་ལ་འཁོར་མདོག།
འཛུབ་ལག་དེས་བྲི་ལ་འཁྱུག་ཚེ།།
འགངས་ཆེན་གྱི་ཚེ་སྲོག་ཐག་པ།།
སྐྱེ་འཇིག་གིས་ཐུང་ཐུང་བཏང་གཞག།
སྐྱེ་འཇིག་ལ་ནམ་ཡང་གུས་ཀྱང་།།
ཡར་བལྟས་ཀྱི་མགོ་བོ་བསྒྱེལ་དུས།
བཅུ་ཚན་གྱི་ལོ་ན་དུ་མའི།།
རྒྱབ་ལོགས་སུ་ཤུགས་ཀྱིས་འཕངས་ཚར།།
སོས་དལ་དུ་ལྷོད་ཕབ་མི་སྲིད།།
མགྱོཊ་འཚུབ་ཀྱི་བྲེལ་རླབས་དྲགས་པའི།།
སྙིཊ་དུས་ཀྱི་འཕོ་འགྱུར་འདིའི་གསེང་།།
དོན་ཆེན་གྱི་བདེ་བ་ལོན་དཀའ།།
དྲེད་པོ་ཡི་མི་རྟག་སྐྱེ་འཇིག།
བདུད་པོ་ཡི་སྐྱེ་བ་མིན་ན།།
གོ་ཟླུམ་གྱི་ཁམས་གསུམ་གསེང་ནས།།
བདུད་ནག་པོའི་མཚན་གཞི་སུ་འཇོག།
༢༠༡༤-༥-༢༨-བདུན་ཕྲག་ངལ་གསོ་ཉིན་གྱི་ཕྱི་དྲོ་ཁྱུང་བསོད་བློ་ནས་བྲིས།
