སྙན་ངག་ལ་དགའ་བའི་ང་།
སྙན་ངག་ལགས།
གླིང་བཞི་གསལ་བའི་མཁའ་དབྱིངས་ཀྱི་
མཁན་སློབ་ཉི་ཟླ་ཟུང་འབྲེལ་གྱི་མདུན།
རླབས་ཆེན་ཟད་པ་མེད་པའི་མཆོད་སྤྲིན་གྱི་སྟོན་མོ་ཡང་ཁྱེད་ཀྱིས་བཤམས་ཆོག་ལ།
སྒོ་གསུམ་གྱི་གཏད་སོ་མེད་པའི་རིག་དྲུག
ལས་སྣང་གི་འཁྱམས་པོ་དེ་ཚོ་
ཐར་པའི་གཞིས་སུ་འཛུབ་ཁྲིད་ཀྱང་ཁྱེད་ཀྱིས་མཛད་ཆོག
ལྷུན་ཆགས་པའི་རི་བོ་ཧི་མ་ལ་ཡའི་རི་སུལ་དུ་འགྱིང་བའི་རྩལ་ཆེན་
གདོང་ལྔ་པའི་གཡུ་རལ་ག་ཚད་མཛེས་ཀྱང་ཁྱེད་ཀྱི་མཛེས་རྒྱན་ཡིན་ལ།
མཁའ་དབྱིངས་ཀྱི་དབྱར་སྐྱེས་དར་མའི་སྐད་གསང་ཇི་ལྟར་མཐོ་ཡང་ཁྱེད་ཀྱིས་གདངས་དབྱངས་ཀྱང་ཡིན། དེ་བས་ཀྱང་ག་ལ་ཚད། ཁ་འབབ་ཆུ་བཞི་ལས་གྱེས་པའི་
རླབས་ཆེན་ཡར་ཀླུང་གཙང་པོའི་གཞུར་སྒྲ་དང་མ་པང་གཡུ་མཚོའི་རླབས་སྒྲ་གཉིས་དེ་
རྒྱུན་རིང་བའི་ཁྱེད་ཀྱི་མིག་དབང་སྲོག་གསུམ་གྱི་ནོར་བུ་གསོན་པོ་ཞིག
སྙན་ངག་ལགས། ཁྱེད་ཀྱིས་བོས་པའི་འབོད་བརྡ་ཤུགས་སུ་མ་གཏོང་ལ་ཕེབས་པའི་
མིག་བརྡ་དབང་པོས་མ་འཕང་བའི་
ཤེས་རིག་གི་མི་བརྗེད་གཟུངས་དང་ལྡན་ལ།
བརྩོན་འགྲུས་ཀྱི་ངང་རྒྱུན་ཆུ་ལས་རིང་བའི་སྐལ་ལྡན་གྱི་སློབ་བུ་དུ་མ་སློབ་ཕྱོགས་སུ་འདུར་རྒྱུག་དིར་དིར་འདི་ཁྱེད་ཀྱི་བཙུགས་པའི་དུངས་བ་ཟབ་མོ་ཞིག་ཅི་ལ་མིན།
སྙན་ངག་ལགས།
ཁྱེད་ནི་ནུས་ཤུགས་ཀྱང་ཆེ་སྟེ་
སྟོང་གསུམ་འཇིག་རྟེན་གྲངས་ཀྱི་མི་ལོང་པ་ངག་གདམས་གཅིག་གིས་མཉམ་ཆགས་མཉམ་འཇིག་ཏུ་བྱེད་ནུས་ལ།
འཁོར་འདས་སྣང་སྲིད་ཀྱི་བསྡུས་པའི་ཤེས་བྱ་ཐམས་ཅད་སྙན་མོ་ངག་གི་འགྱུར་ཁུགས་དང་ལྡེམ་མྱུར་སྒེག་མོའི་གར་སྟབས་སུ་ཁྱེད་ཀྱིས་བཀྱོན་ནུས་སོ།།
སྙན་ངག་ལགས། ཁྱེད་ཀྱི་ཞལ་རས་ཀྱི་
འཛུམས་མདངས་དེ་ཡལ་དུས་མི་འདུག་ལ།
ང་ཡི་སེམས་ཁམས་ཀྱི་བརྩེ་བ་དེ་
རྫོཊ་དུས་མི་འདུག
སྙན་ངག་ལགས། ཁྱོད་ཀྱི་འཛུམ་ཆུང་གི་ཞལ་རས་དང་ང་ཡི་སེམས་ཁམས་ཀྱི་བརྩེ་བ་གཉིས་པོ་དེ་དབྱེར་བ་མེད་པའི་འོ་ཆུ་འདྲེས་མ་ཡང་ཡིན་ལ།
མཉམ་རྒྱུག་མཉམ་བསྡད་ཀྱི་ལུས་ཀྱི་གྲིབ་སོ་ནག་པོ་ཡང་ཡིན་ནོ།
ངས་ཡོད་ཚད་མོས་ས་ཁྱེད་ཡིན་ལ།
ཡོད་དགུ་ཐམས་ཅད་ཁྱོད་ཀྱི་བརྗོད་བྱ་རུ་བསྒྱུར་བའི་འཆར་གཞི་ཡང་ཡོད།
སྙན་ངག་ལགས། ད་ཁྱེད་ཀྱིས་སྙན་མོ་ངག་གི་འགྱུར་ཁུག་དེ་གབ་སྐུང་མེད་པར་ང་ལ་ངོམ་རོགས་གྱིས་དང་།
ང་ཡིས་ཁྲ་ཆུང་མིག་གི་གཏད་སོ་དེ་ཁྱེད་ཀྱི་ཕྱོགས་ནས་དུས་ནམ་ཡང་གྱེས་དུ་མི་འགྲོ་བའི་ཐག་གཅོད་ངས་བྱེད་ཆོག།
༢༠༡༤-༦-༡༩-ཁྱུང་བསོད་བློ་ནས།
