དྲིན་ཆེན་དགེན་གྱི་དྲིན་དེ་ཡང་ཡང་དྲན།
ཁྱུང་བསོད་བློ།
འཚོ་གོས་བཀའ་དྲིན་སྐྱོང་བའི་དགོན་སྡེ་དང་།།
སྨྱུག་རྩེའི་གོམ་ཁ་བསླབ་པའི་དགེ་རྒན་དང་།།
སོར་རྩེས་ཐལ་མོ་སྦྱར་སའི་ཡོངས་འཛིན་མཆོག།
ང་ཡི་མདུན་ལམ་སྟོན་པའི་སྒྲོན་མེ་དངོས།།
འཆད་རྩོད་ཐལ་སྒྲ་སྒྲོག་པའི་རིག་ལམ་པ།།
ནུས་བརྩོན་ཧུར་གྱིས་བསྐྲུན་པའི་དམ་བཅའ་བ།།
དཔྱད་གསུམ་སྲང་ཁ་མཐོ་བའི་དཔང་པོ་མཆོག།
ང་ཡི་དོགས་གནད་འདྲི་སའི་ལོ་ཙ་བ།།
སྒོ་གསུམ་དགེ་ལ་བཀུར་བའི་ཕ་མ་དང་།།
འཇུངས་གེགས་སླད་ཀྱི་མ་བཅིང་སྤུན་ཟླ་ལྔ།།
མཐུན་རྐྱེན་སྒྲོ་ལོ་གནང་བའི་ནང་མི་ཚོ།།
ང་ལ་ཟད་མེད་སྤྲིང་བའི་སྦྱིན་བརྒྱ་པ།།
སྨྱུག་རྩེར་མྱུར་མགྱོཊ་ཅི་ཡོད་དགེན་གྱིས་དྲིན།།
དབྱངས་གསལ་སུམ་བཅུའི་སྟངས་སྟབས་དགེན་གྱིས་དྲིན།།
ཚིག་བཅད་ལྷུག་མའི་མཛེས་ཉམས་དགེན་གྱིས་དྲིན།།
ང་ལ་ཡོད་ཚད་ཐམས་ཅད་དགེན་གྱིས་དྲིན།།
རང་ཁ་བདག་གིས་གསོ་བའི་ཡོང་འབབ་མེད།།
འདོམ་ཁ་འཇམ་གྱི་ཐུམ་པའི་རྒྱན་གོས་མེད།།
ཕྱི་གོས་ནང་རིག་བསྩལ་བའི་དཔོན་གསས་དང་།།
དགེ་རྒན་ཕ་མ་སྤུན་མཆེད་བཀའ་དྲིན་ཆེ།།
ཆད་མེད་སློབ་ཁྲིད་སྐྱོང་བའི་དགེན་ཆེན་མོ།།
རིས་མེད་སློབ་བུ་སྐྱོང་ལ་བར་ཆད་མེད།།
གེགས་མེད་གཡུང་དྲུང་སྲུང་མས་སྡོང་གྲོགས་མཛོད།།
འགྱུར་མེད་སེར་ཆེན་ཁྲི་ལ་བཞུགས་པར་སྨོན།།
༢༠༡༤-༦-༡༤-དབྱར་སྐྱིད་ཐུགས་སྤྲོ་ཉིན་ལྔ་པར་བྲིས།
