བལྟས་བཞག་ན་གྲྭ་རྐྱང་ཇེ་སྐྱིད་རེད།
ཁྱུང་བསོད་བློ།
ལས་དབང་བརྩེ་བའི་རྒྱ་མདུད་ཨ་གསར་གྱིས་མ་རྒྱག།
པང་ཁུག་ཚྭ་དྲི་རྒད་མོའི་རྐུབ་གཡོག་ཏུ་མ་གྱུར།།
ལྤགས་རྩག་རལ་པའི་གསེང་གི་རུལ་དྲི་དེ་མ་གོས།།
སྣང་བས་རྒྱང་གླུ་ལེན་པའི་གྲྭ་རྐྱང་དེ་སྐྱིད་པ།།
ཐལ་སྐྱ་ཁྲ་ཁྲ་བྱུགས་པའི་མཁུར་ཚོས་དེས་མ་བསླུས།།
ཆུ་དང་འཁྱག་པ་ཟེར་བའི་བརྩེ་བ་དེ་མ་བསྲེས།།
སྣ་རལ་ཁ་ཤ་བུག་པའི་ལྐོག་མོ་དེ་མ་འཕྲད།།
གར་སང་རྗེས་དེད་མེད་པའི་གྲྭ་རྐྱང་དེ་སྤྲོ་བ།།
སྙལ་མགོ་ཕྱོཊ་བཅུར་གཏད་ཀྱང་རང་དབང་གི་བདག་པོ།།
འཆད་རྩོད་ཐལ་འགྱུར་རིག་པའི་དགོད་སྒྲ་དེ་འགྱིང་མཁས།།
སྒོ་གསུམ་རིག་པའི་རྣོ་སོ་ཤེས་རིག་ལ་གྱུ་བའི།།
ལྔ་རིག་གཤོཊ་ཟུང་རྒྱས་པའི་གྲྭ་རྐྱང་དེ་སྐྱིད་པ།།
མི་འདོད་འཁོར་བའི་མ་ཡུམ་བཟའ་ཟླ་དང་ལྷན་དུ།།
ཁྲེལ་མེད་ལས་དབང་བཙན་གྱིས་བསྐོས་བཞག་དུ་མ་བཙུགས།།
མུ་མེད་མཁའ་དབྱིངས་གཤགས་པའི་གླིང་སྐོར་གྱི་བདག་པོ།།
སྣེ་གཉིས་ཕྱིར་བསམ་མི་དགོས་གྲྭ་རྐྱང་དེ་སྐྱིད་པ།།
ལང་ཚོའི་དཔྱིད་ཀྱི་དཔལ་ཡོན་ཆར་རླུང་དེས་མ་བཅོམ།།
ན་ཚོད་ལྕང་ལོའི་སྡོང་པོ་ལྷག་རླུང་དེས་མ་བཀུག།
རྒས་ཚོད་ན་ལོ་ཡོལ་ཀྱང་འཆི་བ་ལ་མི་དོགས།།
ལས་འབྲས་བདེན་ཁའི་ལམ་གྱི་གྲྭ་རྐྱང་དེ་སྐྱིད་སོང་།།
སྒྲིག་ཟས་འཚོ་བས་གྲྭ་ཆུང་ལྟོ་ཆུང་དེ་འགྲངས་ལ།།
གསོག་འཇོག་སྣུམ་ཁ་བསྐང་བའི་ཕུག་བསམ་དེ་མི་དགོས།།
གདེངས་འཇོག་ལུང་རིག་བང་ཁ་ཤེས་རིག་ཐང་བསྐྱོད་པའི།།
རིམ་དགུ་ཐེག་པ་བགྲངས་བའི་གྲྭ་རྐྱང་དེ་མཐོ་སོང་།།
༢༠༡༤-༦-༡༢-རྣམ་སྲས་ཇ་ཁང་ནང་དུ་བྲིས།
