རྩམ་དཀར་ལུ་ཡོད་ན་ཁེར་འདུག་ཕེར།།
རྗེ་ཁྲི་རྒྱལ་ཁུག་པའི་ཧུ་སྒྲ་ལས།།
རིགས་རིན་ཆེན་འབྲུ་ཡི་ས་བོན་འཁྲུང་།།
ཕ་མེས་པོའི་ཞིང་ས་གཤིན་པོའི་དཀྱིལ།།
ཡག་སྙེ་མའི་མགོ་ལྕོག་ལྡེམས་སེ་ལྡེམ།།
དེའི་ཀློང་ནས་སྦྲང་དཀར་རྩམ་པ་འཁྲུང་།།
གདོང་རྒད་པོའི་ཕ་ཟས་གྲུང་མ་ཡིན།།
ཟོས་གཞག་ན་ལུས་དབང་གསོ་བའི་རྩི།།
དཔུང་གཞག་ན་ཞལ་གསོའི་ཕྱེ་མར་ཡིན།།
སྟོབས་ཆེ་ཡང་ཁོག་པ་བཤལ་སྲོལ་མེད།།
འདྲིས་ཆེ་རིམ་རང་མདངས་ཇེ་གསལ་ཡིན།།
གཞིས་འཚོ་བ་གཞན་ལ་རེ་མི་དགོས།།
རྩམ་དཀར་ལུ་ཡོད་ན་ཁེར་འདུག་ཕེར།།
འགྱིག་རྒྱུ་ལས་གྲུབ་པའི་ཁ་ཟས་མིན།།
ལྗང་སྨྱུག་ཤད་རྒྱས་པའི་སོན་བཟང་ཡིན།།
རྫུན་སྦྱར་བྱུང་སྦྱོར་བའི་ཟས་སྙིགས་མིན།།
རིག་རང་བྱུང་བརྡོལ་བའི་དམ་རྫས་ཡིན།།
ནད་སྣ་བརྒྱ་འཁྲིད་པའི་ཚལ་གསར་མིན།།
སྣུམ་ཤ་ཤེད་རྒྱས་པའི་སྙིང་པོ་ཡིན།།
སྦུབས་བྲང་ཁོག་གཏོར་བའི་ཕོ་ནད་མིན།།
ནང་འཕྲོད་རྟེན་གཙང་བའི་ཕ་ཟས་ཡིན།།
དབྱངས་གྲེ་བ་གཏོར་བའི་རྫས་རྒྱོག་མིན།།
གསུང་དབྱར་སྐྱེས་དར་མའི་ཁ་ཟས་ཡིན།།
གཞིས་འཚོ་རྟེན་གཞན་ལ་རེ་མི་དགོས།།
རྩམ་དཀར་ལུ་ཡོད་ན་ཁེར་འདུག་ཕེར།།
སྐོལ་མི་དགོས་རང་བྱུང་ཆུ་ཁོལ་ཡིན།།
སྐམ་མི་དགོས་རླན་གཤེར་རང་སྐམ་ཡིན།།
རྨིང་རུས་པའི་རྩ་བཞི་རྐང་ཕྱུག་ཡིན།།
སྤྱོད་ཆེ་རིམ་འཕྲོད་རྟེན་ཇེ་འཕེལ་ཡིན།།
རྒྱུ་ཐ་མའི་འགྱིག་ཤ་མ་ཡིན་ལ།།
ཟས་ཐ་མ་སྟབས་བདེ་ཐུག་པ་མིན།།
ཁྲོམ་ཁོར་ཡུག་གཙང་བའི་རྩི་འབྲས་ཡིན།།
ཡུན་རིང་དུ་སྤྱོད་དགོས་གདོང་དམར་ཚོ།།
གནད་ཆོག་ཤེས་དགོས་པའི་སྤུན་ཟླ་ཚོ།།
སྤྱིར་འཚོ་ཟས་རན་ཚོད་གཟབ་རྒྱུ་དེ།།
ཚེ་ཡུན་རིང་བརྟན་པའི་བརྟན་གྲོགས་དང་།།
ནད་མུག་གེ་མེད་པའི་མཐུན་རྐྱེན་ཡིན།།
དྲིན་ཨ་མའི་གནང་བའི་རྩམ་དཀར་ཁྱོད།།
ངའི་ལྟོ་ཆུང་འགྲང་བའི་འགྲང་རོགས་ཡིན།།
ངའི་གོམ་ཁ་བགྲོད་པའི་བགྲོད་རོགས་ཡིན།།
ངས་ལ་ཆེན་བརྒལ་བའི་ལམ་ཟས་ཡིན།།
ངའི་ཕ་ཟས་སྦྲང་དཀར་རྩམ་པ་ཁྱོད།།
ཟོས་ཆེ་ན་དྲི་མ་ཏིག་ཙམ་ཡོད།།
དེ་གཟབ་རྒྱུ་རྩམ་དཀར་བུ་ཡིས་འགན།།
གཞན་མི་མཐུན་འགལ་ཟླ་སྤུ་ཙམ་མེད།།
༢༠༡༤-༤-༢༣-བདུན་ཕྲག་ངལ་གསོ་ཉིན་མོ་ཞོགས་ཇ་འཐུང་ཞོར་དུ་ཁྱུང་བསོད་བློ་ནས་བྲིས།
