ཀ་རྩོམ་ཞང་ཞུང་མ།
ཀ་ལི་གསལ་བྱེད་ཟེ་འབྲུའི་འདབ་རྒྱ་གྲོལ།།
ཁ་བ་དབུ་ནག་རྒད་པོས་དགོད་སྒྲ་སྒྲོགས།།
ག་ས་གངས་ཅན་ལྗོངས་སུ་ཀ་ཁས་ཕྱུག།
ང་ཡི་ཕ་ས་ཞང་ཞུང་ཨེ་མ་ཧོ།།
ཅ་སྐལ་ལྷ་ལ་འདུན་པའི་སྐྱབས་སྡོམ་གཙང་།།
ཆ་མཐུན་གདུངས་ཤུཊ་དྲག་པོས་ལྷན་དུ་སྡེབ།།
ཇ་ཆང་སྐྱེམས་ཕུད་ཟེཊ་མའི་མཆོད་པ་གཙང་།།
ཉ་གང་འབུམ་འགྱུར་དུས་ཆེན་རྒྱུན་དུ་བཀུར།།
ཏ་ཐའི་རིག་པ་འཛིན་གྱི་སྡེ་སྣོད་དེ།།
ཐ་ཤལ་ཚོད་དཔག་རྒད་པོས་ཉམས་མི་ལོན།།
ད་རྟེན་དགེ་ལ་བསྐོར་བའི་དབང་རྣོན་པས།།
ན་རག་སྐྱེ་སྒོ་ཆོད་ནས་བདེ་སར་བསྙེགས།།
པ་ཏྲའི་རི་མོ་བཀྲ་བའི་ཁང་སེང་དུ།།
ཕ་རོལ་དགྲ་ལ་བྱམས་པའི་བརྩེ་བརྒྱ་བས།།
བ་ག་བོན་ཉིད་ཆེན་པོའི་ཞིང་ཁམས་སུ།།
མ་གྱུར་འགྲོ་བའི་ཉམ་ཐག་མ་ལུས་བསུ།།
ཙ་ཉོན་དུག་གི་བ་མོའི་འཁོར་ལམ་བརྒྱུད།།
ཚ་སྲེག་རིག་དྲུག་ལས་སྣང་ཚན་པོ་ཆེ།།
ཛ་དྲག་མེ་འོབས་སྡུག་ཡུན་མ་མྱོང་བར།།
ཝ་མཛེས་ལྕཊ་ཀྱུའི་ཐུགས་རྗེས་ཞི་བར་འཐེན།།
ཞྭ་དཀར་སྲིད་པ་གཤེན་གྱི་རྒྱལ་མཚན་སྒྲེང་།།
ཟ་གོས་དྲང་སྲོང་ཁྲིམས་ཆེན་ན་བཟའ་སྤུད།།
འ་ཅག་རྒྱལ་བ་གཉིས་པ་གཙུག་ཏུ་བཀུར།།
ཡ་ཀི་བོན་སྲུང་མ་གཡེལ་བསྟན་ལ་རེམ།།
ར་བ་ཞང་ཞུང་རྒད་པོའི་གཞིས་ས་ཕྱུག།
ལ་སྟོང་རི་ཁྲི་མཐའ་མཚམས་ཞང་སྐད་འབྲེལ།།
ཤ་རུས་ཟུང་ཁྲག་གཅིག་པའི་གཤེན་སྐད་སྒྲོཊ།།
ས་རྡུལ་བྱེ་མའི་གྲངས་ལས་མཐའ་ཡས་པའི།།
ཧ་ལེགས་བརྒྱད་ཁྲི་སྟོང་གི་གྱེར་ས་ཟུང་།།
ཨ་དཀར་གཡུང་དྲུང་བསྟན་པ་རྟག་བརྟན་ཤོག།
༢༠༡༤-༣-༢༤-དམ་བཅའ་གྲོལ་མ་ཐག་ཏུ་ཁྱུང་བསོད་བློ་ནས་བྲིས།
