དི་རིང་གི་གྲང་ངར།

དགུན་མཇུག་བརྩེ་མེད་གྲང་བའི་རླུང་གིས་གོག་ཕུང་གཟུཊ་ལུས་གཡོ་ཞིང་འདར།།

མཆུ་སྒྲོས་པད་མོའི་འདབ་ཁ་ཟུམ་སྟེ་ཁུང་རྡུལ་བ་སྤུ་ཟེངས་སེ་ཟེང་།།

ཨ་ཆུས་ཆུས་ཀྱི་ཁ་འདར་ཁོག་རླུང་གྲང་སྐད་སྒྲ་དེ་ཆད་དུས་མེད།།

ཕྱི་འཐུག་ནང་སྦུག་རས་ཡུག་འདི་ལ་བདེ་དྲོད་གསོ་བའི་ཉམས་རྩ་ཞན།།

སྲོལ་གཏོད་མཁན་པོས་གོས་དྲུག་མནབས་སྐབས་གྲང་ངར་འདིར་མཚུངས་མེད་པ་དང་།།

གངས་རླུང་གསེང་གི་འདུལ་ཁྱུ་ཚོ་ལ་སྙིང་རྗེའི་མ་གཟིགས་གང་ཡིན་ནམ།།

ཡ་མེད་ཁེར་རྐྱང་སྡུག་ལ་སྦྱར་བའི་གྲང་བའི་གནས་ཚུལ་འདི་མཐོང་དུས།།

སོམ་ཉི་མ་ལྡོག་སེམས་ཆུང་ངེད་ཚོ་ཁ་སང་ཁ་བས་ཏག་ཏག་བཟོས།།

དུས་བཞི་ཞིག་གི་དགུན་གྱི་ལྷ་མོའི་བྱད་གཟུགས་གངས་དཀར་ཚོན་རྩིས་བརྒྱན།།

ཁ་ཆར་གངས་རླུང་འཚུབས་མ་རེ་རེའི་གྲང་བདེའི་འབྱོར་བ་ཇེ་ཕྱུག་རེད།།

ནམ་མཁའི་ཐིག་ལེའི་བསིལ་ཟེར་རེ་རེའི་ལང་ཚོའི་རང་མདངས་ཇེ་གསལ་རེད།།

དྭངས་གཙང་ཁ་བའི་འདམ་མ་རེ་རེའི་ཁ་དབུགས་རྒྱུ་བ་ཇེ་དྭངས་རེད།།

༢༠༡༤-༢-༡༨-ཁྱུང་བསོད་བློ།