དེང་རབས་ཀྱི་ཕོ་གཞོན་མོ་གཞོན་འགའ་ལ་ལྟོས་དང་།
ཀ་ལིའི་སྐྲ་ལོ་དེ་ཕོ་འདྲ་དང་ལྟག་པའི་སྐྲ་ལོ་བྱིའི་རྔ་འདྲ།།
དབུ་ཡི་མཐའ་མཚམས་ཟླུམ་པོ་འདྲ་དང་སྟེང་དུ་སྐྲ་འཇག་ལྷབ་ལྷུབ་བཞག།
རྣ་གཡས་གྲོ་ག་ལྕགས་ཀྱིས་གཟེར་ནས་རྣ་གཡོན་ཐོས་འཛིན་ལྗིག་གིས་གཟེར།།
ཞལ་རས་སྐྱ་བོའི་རྫས་ཀྱི་ཐུམ་ནས་སྨིན་མ་གོང་འོག་གཉིས་བརྩེགས་བཟོ།།
མེས་པོའི་བོད་དྲི་ཡེ་ནས་ཡལ་ཏེ་བོད་ལྭ་གྱོན་རྒྱུ་རྣམ་རྟོག་བརྩི།།
བྲང་ཤ་མ་ཐུམ་རྐེད་ཤ་མ་ཁེབས་ལྭ་བ་གསར་པའི་མཛེས་མཛེས་གཏོད།།
གཡང་གི་སྒྲ་བླའི་དྲི་མ་མེད་པའི་དེང་གི་ཕོ་གསར་ཧྲེང་ཧྲེང་འགའ།།
རྐུབ་ཤ་དམར་རྒྱན་སྒོ་ལ་ངོམ་ནས་སྟག་ཤར་ཕོ་རྒོད་ཡིན་མདོག་མདོག།
ཨ་མ་རྒད་མོའི་ཆས་ལུགས་མ་ཟིན་ཉིན་རེ་ཆ་ལུགས་བརྗེ་ལེན་མང་།།
ཨ་གསར་ཆེ་བའི་གཞོན་གསར་མ་འགའི་གོམ་སྲོལ་གསར་པ་གཏོད་མདོག་ཞིག།
རིན་ཆེན་གཟི་བྱུར་མགོ་ནས་ཕུད་ནས་ལྕགས་ཐུར་ལྗིག་ཐུར་དབུ་ལ་བརྒྱན།།
དུས་རབས་གསར་པའི་རྗེས་འབྲེང་ཡིན་མདོག་སྐྲ་ལོ་ཨོ་འགུག་ལྟག་ཏུ་བཅིང་།།
ལྷན་སྐྱེས་ཞལ་རས་འཁུར་ཚོས་ཐོག་ཏུ་ཐལ་སྐྱ་དཀར་དམར་ཚུབས་སེ་ཚུབས།།
མི་སྟོན་གདོང་པ་ཁྱི་སྟོན་ཉ་རྐང་ཁ་ཤའི་ཡུག་ཕྱོགས་རས་ཀྱི་ཐུམ།།
གོམ་པ་ཆེ་ཆེ་སྤོ་ཐབས་མེད་པའི་གོམ་འགྲོས་འཆམ་པའི་གོས་ལྭ་གྱོན།།
ངོ་ཚ་ཁྲེལ་མེད་ཤ་རྒྱན་ངོམ་བཞིན་གངས་རིའི་མཛེས་མ་ཡིན་མདོག་མདོག།
༢༠༡༤-༡-༡༦-ཞོགས་པ་དུས་ཚོད་-༨-སྟེང་དུ་ཁྱུང་བསོད་བློ་ནས་བྲིས།
