ཁྱད་འཕགས་ཀྱི་མཐོ་སྒང་།
ཁྱུང་བསོད་བློ།
མཐོང་ཡངས་དགུང་གི་ཤར་མཐའི་རི་རྩེ་དམར་སྨུག་མཚམས་སྤྲིན་ན་བཟས་སྤུད།།
བར་འདོམ་སྨྲིག་རྒྱུ་ཆུ་འཛིན་དཀར་དམར་ཟིམ་ཟིམ་འཁྱུག་སའི་མཐོ་སྒང་སྟེ།།
ཁ་དབུགས་ཁྲུས་གཙང་ཆབ་བསིལ་དྭངས་མའི་རེག་རྡུལ་རིམ་པ་སྟོང་བརྩེགས་ཆགས།།
ངུར་པ་སེར་པོས་ངང་འགྲོས་འཆམ་བཞིན་འཇོལ་མོའི་ཁུ་བྱུག་གཉིས་ཆར་བསྡེབ།།
ཡངས་སྟེང་དགུང་དུ་སྐད་གསང་ཐོས་འཛིན་དགའ་བ་འབུམ་གྱི་འཁྱུད་པ་བསྒྲགས།།
གངས་རིའི་ལྗོངས་ཀྱི་གོ་ལ་འདི་ནི་མཐོ་སྒང་ནང་གི་མཐོ་སྒང་ཞིག།
གསེར་མདོག་རྭ་ཅོའི་མ་ལག་གཞིས་ཀྱི་ཀླུ་རྒྱལ་གཙུག་གི་མཛོད་ཕུག་ཞིག།
འབུར་དུ་དོད་པའི་རི་རབ་ཡོད་དོ་རིན་ཆེན་སྣ་ལྔའི་གྲམ་དཔུང་ཞིག།
ལུགས་སུ་བླུགས་པའི་ནོར་འཛིན་སྒེག་མོ་འགངས་ཆེན་གསེར་གྱི་ཨ་ཐང་ཞིག།
ལུས་ཁམས་བདེ་བའི་ལྭ་བའི་གྱོན་ཆས་སྤུད་བཟང་སྣམ་བུའི་ཐོན་ཁུང་ཡངས།།
སེམས་ཁམས་བདེ་བའི་ས་མཐོའི་ཆུ་གཙང་བསྙོག་མེད་གཏེར་ཆུ་བཞུར་རུ་རུ།།
མ་བཅོས་རང་བྱུང་ལྷུན་གྱི་གྲུབ་པའི་གངས་རིའི་ཏི་སེ་ལོ་རྒྱུས་རིང་།།
མ་བཀོད་རང་བྱུང་བཀོད་པ་མཛེས་ཏེ་ཡིད་འོང་མཛེས་མའི་ཁོར་ཡུག་གཅིག།
༢-༡༤-༡-༡༠- ཁྱུང་བསོད་བློ།
