གྲྭ་རྐྱང་ཚོ་ལ་དཔལ་འབྱོར་ནམ་ཡང་དཀོན།
ཁྱུང་བསོད་བློ།
ཕྱི་ཡི་སྣང་བ་བསླུ་མཁས་ལ།།
ནང་གི་རྣམ་རྟོག་འགྱུར་སླ་བས།།
བདག་ཡིད་མགུ་བའི་རྫས་མང་ཀྱང་།།
གྲྭ་རྐྱང་ལག་ཏུ་ནམ་ཡང་དཀོན།།
ཡོད་པའི་བློ་རིག་དཔེ་ཆས་འཕྲོག།
མེད་པའི་ཀུན་དགའ་བཙལ་མ་ཁོམ།།
ཚན་རྩལ་མཐུན་རྐྱེན་ཁྱབ་ཆེ་ཡང་།།
གྲྭ་རྐྱང་ལག་ཏུ་ནམ་ཡང་དཀོན།།
སྣ་བརྒྱ་འཛོམས་པའི་ཟས་མཐོང་ཀྱང་།།
མཐུན་རྐྱེན་ཞན་པའི་ཞལ་ཁ་དེ།།
ནམ་ཡང་ཡོན་བདག་རྒད་པོའི་གཡོག།
གྲྭ་རྐྱང་ལག་ཏུ་ནམ་ཡང་དཀོན།།
ཕྱི་ནི་ཆོས་རྒྱལ་བས་ཀྱང་རྫིག།
ནང་དུ་ཀླུ་རྒྱལ་བས་ཕྱུག་ཀྱང་།།
ཡོན་བདག་སེར་སྣ་ཅན་འཕྲད་རྗེས།།
གྲྭ་རྐྱང་ལག་ཏུ་ནམ་ཡང་དཀོན།།
མཐོང་ཚད་མི་ལེན་སྡོམ་པས་བཅིང་།།
ཡོད་ཚད་མི་དབང་ཁྲིམས་ཀྱིས་བཅིང་།།
སྐྱེ་བ་ཕྱུག་པོའི་བུ་ཡིན་ཀྱང་།།
གྲྭ་རྐྱང་ལག་ཏུ་ནམ་ཡང་དཀོན།།
མཛེས་པའི་གཟུགས་ལ་བལྟ་མ་ཕོད།།
སྙན་པའི་སྒྲ་ལ་གསན་མ་ཕོད།།
ཡིད་འོང་ལང་ཚོའི་འབྱོར་བ་དེ།།
གྲྭ་རྐྱང་ལག་ཏུ་ནམ་ཡང་དཀོན།།
ཞིམ་པའི་རོ་ལ་རོལ་མ་ཕོད།།
འཇམ་པའི་རེག་ལ་མྱོང་མ་ཕོད།།
འདོད་ཡོན་སྒྱུ་མའི་བདེ་བ་དེ།།
གྲྭ་རྐྱང་ལག་ཏུ་ནམ་ཡང་དཀོན།།
༧དཔལ་འབྱོར་མི་དགོས།
སྣང་བ་འདི་ལ་སེམས་མ་ཆགས།།
སྟོང་པ་འདི་ལ་བློ་མ་ལོག།
སྣང་སྟོང་ཟུང་འབྲེལ་ངོ་འཕྲོད་པའི།།
གྲྭ་རྐྱང་འདི་ཕྱི་གཉིས་ལ་སྐྱིད།།
དགོས་པའི་དགེ་བ་དངོས་སུ་འགྲུབ།།
མི་དགོས་དུག་ལྔ་ཤུགས་ཀྱིས་ནོན།།
འདོན་ཡོན་སྣང་བའི་མ་བསླུས་བའི།།
གྲྭ་རྐྱང་འདི་ཕྱི་གཉིས་ལ་སྐྱིད།།
མཐོང་ཚད་ལག་ཏུ་མི་ལེན་ལ།།
ཡོད་ཚད་དགོས་མདོག་ཡེ་ནས་སྤངས།།
རན་ཚོད་རང་གི་ཚོད་ཟིན་པའི།།
གྲྭ་རྐྱང་འདི་ཕྱི་གཉིས་ལ་སྐྱིད།།
ཕྱི་ཚུལ་གོས་དྲུག་ན་བཟས་སྤུད།།
ནང་ཚུལ་བསླབ་གསུམ་སྡོམ་པས་བརྒྱན།།
གསང་བ་ཀུན་གཞི་ངོ་འཕྲོད་པའི།།
གྲྭ་རྐྱང་འདི་ཕྱི་གཉིས་ལ་སྐྱིད།།
འཆད་ན་གཞུང་བརྒྱ་ཤ་ར་ར།།
རྩོད་ན་ལོག་རྟོག་ཤིགས་སེ་གཤིགས།།
རྩོམ་ན་དབྱངས་སྙན་ཉི་ལི་ལི།།
གྲྭ་རྐྱང་འདི་ཕྱི་གཉིས་ལ་སྐྱིད།།
མི་དབང་ནོར་ལ་སེམས་མ་ཆགས།།
མ་བྱིན་རྒྱུ་ལ་ལག་མ་བརྙབ།།
གང་འཚམས་འདོད་ཆུང་ཆོག་ཤེས་ཀྱི།།
གྲྭ་རྐྱང་འདི་ཕྱི་གཉིས་ལ་སྐྱིད།།
ཆུང་དུས་དགའ་རོགས་མ་ཚུད་དུས།།
ཆེ་དུས་སྡུག་རོགས་ག་ལ་ཡོད།།
འདི་ཕྱིའི་མདུན་ལམ་མ་འཆུག་པའི།།
གྲྭ་རྐྱང་འདི་ཕྱི་གཉིས་ལ་སྐྱིད།།
ཐུགས་ལྷོད་དུ་བབས་པའི་གྲྭ་རྐྱང་ཚོ།།
དཔྱད་རྒྱག་ན་སངས་རྒྱས་གསོན་པོ་རེད།།
འདུག་ཤེས་ན་རང་ཁ་རང་སོས་རེད།།
འདུག་མ་ཤེས་རྒད་མོའི་རྐུབ་གཡོག་རེད།།
༢༠༡༤-༡-༡༩-ཉིན་ཁྱུང་བསོད་བློ་ནས་བྲིས།
