སྤྱི་གཙུག་གི་གཙུག་རྒྱན་རྣམ་གཉིས།།
ཞྭ་དཀར་བསྟན་པའི་གཙུག་རྒྱན་རིན་པོ་ཆེ།།
ཐོས་བསམ་འཚོ་བའི་དཀའ་ཐུབ་ཁུང་བཙུན་སྡེ།།
མི་དམན་འགྲན་ཟླ་དྲིན་གྱིས་སྐྱོང་མཁས་པ།།
བསྟན་འཛིན་རྣམ་པར་དག་པ་དད་པའི་གཙུག།
མེས་གཤེན་ཞང་གི་གནའ་གཏེར་ནོར་བུ་གསོན།།
དོན་གྱི་ནོར་ངོ་ལོན་པའི་རབ་འབྱམས་པ།།
དལ་འབྱོར་བཅོ་བརྒྱད་ཚང་བའི་དོན་གོ་ཆོད།།
གཡུང་དྲུང་བསྟན་པའི་རྒྱལ་མཚན་མཐོན་པོར་བསྒྲེང་།།
ཕྱི་ལྟར་དགག་སྒྲུབ་གནད་ཀྱི་གཞན་རྒྱུད་ཐུལ།།
ནང་ལྟར་ཐོས་བསམ་གོམ་པའི་རང་རྒྱུད་ཕྱུག།
གསང་བ་གསལ་སྟོང་ཟུང་འཇུག་གསལ་ལྷང་ངེའི།།
གསང་གསུམ་སྤྱི་མགོན་སྲིད་པ་གསུམ་དུ་བརྒྱན།།
ཐུགས་རྒྱུད་དྲི་མེད་ཤེལ་དཀར་གཟུངས་འཇུག་དཀྲིས།།
གོས་དྲུག་ན་བཟའི་སྤུད་སྟེ་དམར་སེར་འཁུ།།
བསླབ་གསུམ་བཅུད་ཀྱི་བུང་བ་ཁྲིམས་ཀྱིས་བཅའ།།
སྲོག་འཛིན་བསྟན་པའི་སྒྲོན་མེ་མགོན་དུ་བཞུགས།།
ཐར་ལམ་རྒྱལ་ས་བགྲོད་པའི་འཕུར་བསྐྱོད་ཅན།།
མྱུར་ལམ་མཁའ་སྤྱོད་གཤགས་པའི་གྲུ་པ་མཆོག།
མགོན་ཆེན་བརྩེ་བརྒྱས་འགྲོ་ལ་བཟོད་བསྲན་སྐྱོངས།།
ནུབ་མེད་བསྐལ་བརྒྱར་གུད་མེད་སྲུང་མས་སྐྱོབ།།
གྲུབ་ཆེན་མི་ལའི་ཡང་སྲིད་རྟགས་མངོན་ཏེ།།
མ་འཆུག་མི་ལའི་དཀའ་ཐུབ་མཛད་བཟང་སྐྱོང་།།
ལྔ་སྙིག་དུས་མཐའ་རྫོགས་ལྡན་བསྐལ་དབང་བསྒྱུར།།
རྣམ་བཞིའི་ཁྲིམས་འཛིན་གྲུབ་ཆེན་ནམ་མཁའ་རྒྱལ།།
ཕྱི་ཚུལ་རྫིགས་ཉམས་དུག་ཅན་པད་མ་འཛིན།།
ནང་ཚུལ་འདུལ་ཁྲིམས་ཁྲི་གཙུག་སྒྲོན་མེའི་བརྒྱུད།།
གསང་གསུམ་བསླབ་གསུམ་བསྟན་པ་གསོ་བྱེད་བ།།
མགོན་ཆེན་བྱམས་བརྩེའི་མངའ་བདག་གང་སར་ཕེབས།།
ཉམ་ཆུང་བཙུན་མའི་འདུ་ཚོགས་དྲིན་གྱིས་བསྐྲུན།།
མ་ནུས་འབྱོར་མེད་རྒས་རྒོག་འཚོ་དྲིན་སྐྱོང་།།
མ་གྱུར་མ་ལྟར་བྱམས་པའི་གཙུག་རྒྱན་མཆོག།
མི་འགྱུར་སེར་པོའི་ཁྲི་ལ་བཞུགས་པར་སྨོན།།
༢༠༡༣-༡-༨ ཁྱུང་བསོད་བློ།
