མ་འདྲིས་བྱད་གཟུགས་ལོ་རྒྱུས་རིང་།

                        ཁྱུང་བསོད་བློ།

ཡིད་གཏད་གཅིག་གིས་བློ་གཏད་བྱས་ན་མི་འགྱུར་དོགས་པ་སེལ་མ་ནུས།།  

རྩེ་གཉིས་སེམས་ཀྱི་གསང་བ་ཐེ་ཚོམ་ཕྱི་ལ་མ་མངོན་ནང་དུ་ཉར།།

ངོ་བསྟོད་ཚིག་གིས་བསྟོད་ར་འཐེན་བཞིན་ཤིང་ལོ་ཡར་བྱུག་མི་ཚེ་ཟད།།

ཐད་ཀའི་གཏམ་དེ་ངོ་གནོང་མེད་པར་ངོས་ལ་བསྒྲགས་རྒྱུ་གལ་ཆེ་བས།།

བདེན་པ་ཡོད་ཀྱང་ལྐོག་ལབ་ཚིག་གི་བདེན་དཔང་མི་ཐུབ་བརྒྱ་ཆ་བརྒྱ།།

ཐད་ཀར་མ་བསྒྲགས་རང་གི་གྱོང་གུད་རང་གིས་སྤྲད་པ་སུ་ཡིས་མཐོང་།།

དེ་དུས་ཕྲག་གི་སྡུག་གྱོང་ཁུར་པོ་འབད་མེད་རང་ཤུགས་བརྡོལ་ཉེན་འདུག།

མ་འདྲིས་གོང་ནས་ཨ་གསར་མི་དགོས་མ་མྱོང་གོང་གི་མྱི་གསར་རེད།།

ཇེ་འདྲིས་སོང་རྗེས་ཇེ་ངན་མ་འགྲོ་བོང་བུ་ཚ་བོ་འགྱུར་ཉེན་ཡོད།།

དུས་རྒྱུན་ཞིག་ཏུ་དབུ་མའི་ལམ་ཆེན་ཡོ་འཁྱོག་མེད་པར་བསྒྲོད་གལ་ཆེ།།

བྱ་བ་ཆུང་ཆུང་ཕྲག་ཏུ་བཀལ་རྗེས་སྒྲུབ་ཏུ་མ་ཕོད་འདི་འདྲ་དྲན།།

༢༠༡༣-༡༠-༡༢-དགོང་མོར་བྲིས།།