བདེ་བ་ཙམ་དང་འགྱུར་ལྡོག།
ཁྱུང་བསོད་བློ།
སྲིད་པ་རྒད་པོས་ཐོང་གཤོལ་ཕྲག་ཏུ་ཁྱེར།།
ཞིང་ས་གཤིན་པོ་འབྲུ་དྲུག་སྟོང་གི་ཁེངས།།
ཕ་ཞིང་ཆུ་མ་ཕ་བཟང་བུ་ཡིས་བདག།
དབྱངས་ཅན་ཁུ་བྱུག་མགྲོན་དུ་བསུ་གྲོས་བྱས།།
ཀུན་འབྱུང་དཔྱིད་ཀྱི་རྒྱལ་མོ་ཨེ་མ་རྨད།།
རྒྱ་ཞིང་སྙེ་མའི་མགོ་ལྕོག་ལྡེམ་སེ་ལྡེམ།།
བརྒྱ་ལོ་དམར་པོའི་རྔམ་ཁ་ཕྱུ་རུ་རུ།།
ལྷ་འབྲི་སྟོང་གི་འོ་མཚོ་འཁྱིལ་སེ་འཁྱིལ།།
གཡང་དཀར་ལུག་ཁྱུའི་འབའ་སྒྲ་ལྡི་རི་རི།།
སྤྲོ་སྐྱིད་དབྱར་གྱི་རྒྱལ་མོ་ཨེ་མ་རྨད།།
སྦྲང་དཀར་རྩམ་པའི་སྙིང་བཅུད་རྔ་བརྡུ་འཚུབ།།
འབྲས་ལྡན་ཐིག་ལེ་སྒྲིབ་མེད་དགུང་ནས་འཆར།།
ཀུན་ལ་ཀུན་དགའ་འཚོགས་པའི་དུས་བཟང་སྟེ།།
ཁུག་མ་མ་ལུས་ཡོང་འབབ་ནོར་གྱི་ཁེངས།།
སྟོན་ཟླའི་སྐྱ་རེངས་ནམ་ཡང་བསུ་འགྱུར་ཅིག།
རང་བྱུང་ལྷུན་གྲུབ་དབུ་ཡི་རྨོག་དཀར་མཛེས།།
རང་བྱུང་གཏེར་ཁ་བརྡོལ་བའི་ཁམས་ཡུལ་ལ།།
རང་བྱུང་འབྱུང་ཆེན་ཆུ་ཡིས་དར་དཀར་འཐེན།།
བསིལ་ལྡན་བདེ་བ་སྟོང་གི་ཉམས་ཕྱུག་པ།།
དགུན་དུས་རྒྱལ་མོའི་གྲང་ངར་རྒྱས་འགྱུར་ཅིག།
༧ འགྱུར་ལྡོག་ནི།
སྣང་བ་མི་རྟག་རྩ་མགོའི་ཟིལ་པ་འདྲ།།
དུས་བཞི་མི་རྟག་འབྱུང་བཞི་རེས་མོས་ལྡང་།།
གཟུཊ་བཞི་མི་རྟག་འབྱུང་བའི་རྟེན་འབྲེལ་ཙམ།།
ཕྱི་སྣོད་མི་རྟག་དུས་ཆེན་སྟོབས་ཀྱིས་འཇིག།
ནང་བཅུད་མི་རྟག་ནད་མུག་མཚོན་གྱི་སྟོང་།།
སྐྱིད་སྡུག་མི་འདྲ་དབྱར་དགུན་གྲང་དྲོད་བཞིན།།
ལས་ཉོན་ལས་འབྲས་སྨིན་པའི་སྲིད་པ་ཚོ།།
ནམ་ཡང་འགྱུར་མེད་རྟག་ཏུ་རེ་མ་བཅའ།།
འགག་འཕྲང་དབུག་ཐག་ཆད་པའི་ཉིན་མོ་ལ།།
འགྱོད་མེད་བློ་ཆོད་རྒོད་པའི་སྟ་བོན་སྒྲུབ།།
འདས་པའི་དུས་ཚོད་ཤི་བའི་བེམ་རོ་འདྲ།།
མ་འོངས་དུས་ཚོད་བཟང་ངན་ངེས་མེད་ཞིག།
ད་ལྟའི་དུས་ཚོད་གསེར་གྱི་རི་རྒྱལ་འདི།།
ཆོ་མེད་རྣམ་གཡེང་གསེང་དུ་མ་བོར་བར།།
དོན་གྱི་གསེར་ངོ་ཤེས་མིན་རག་ལས་སོ།།
༢༠༡༣-༩-༢༤-དགོང་མོར་བྲིས།།
