བཀའ་དྲིན་ཡིན་པ་ངོ་ཤེས་དགོས།
མཁར་པ་བསོད་ནམས་བློ་གྲོས།
སློབ་གསོ་ཞིག་གིས་བསྒུལ་བསྐྱོད་གཏོང་།།
བསམ་བློའི་ཁ་ཕྱོགས་ཡང་དག་ལམ།།
བདེ་བཀོད་དགེ་རྒན་དྲིན་ཆེན་དེ།།
ནམ་ཡང་མ་བརྗེད་སློབ་ཕྲུག་ཚོ།།
འཛུབ་སྟོན་གཅིག་གི་ཤུལ་རྗེས་ནས།།
དོགས་གནད་མང་པོའི་རྒྱ་མདུད་དཀྲོལ།།
འདི་ཕྱི་མདུན་ལམ་སྟོན་ལ་མཁས།།
བསམ་བཟང་དགེ་རྒན་མ་བརྗེད་དགོས།
ཁོང་དུ་ཆུད་པའི་རིག་གནས་དེ།།
ཁུར་ན་མི་ལྕི་བལ་བས་ཡང་།།
རྒྱུག་ན་མི་གྱེས་ངོ་བོ་གཅིག།
བསྡད་ན་རྟེན་གྱི་འཚོ་རྟེན་མཆོག།
འབྲས་རྟགས་ལོན་པའི་སློབ་མ་དེ།།
གཞན་ཚོགས་གསེང་དུ་མཐོ་ཟིང་ཟིང་།།
ཁེར་རྐྱང་བསྡད་ན་བརྟན་རླིང་རླིང་།།
དགེན་དྲིན་ཡིན་པ་ངོ་ཤེས་དགོས།།
སློབ་ཚོགས་བྱེ་བའི་འདུ་ར་ནང་།།
ཕྱི་ལ་བསྒྲགས་ན་འཚེ་བ་མེད།།
ནང་དུ་དཔྱད་ན་དོན་གནད་ཁྲོལ།།
དགེན་བཟང་དྲིན་དེ་མ་བརྗེད་རྒྱུ།།
བྱིས་དུས་ཨ་མས་སྐྱོང་སྐྱོང་དང་།།
གཞོན་དུས་དགེན་གྱི་བསླབ་བསླབ་ཞིག།
དར་དུས་ཨ་ཕས་ཞལ་ཏྭ་གསུམ།།
དྲིན་གྱིས་སྐྱོང་བའི་དྲན་རྟེན་གྱིས།།
སློབ་གྲྭ་བ་ཡི་མདུན་ལམ་དང་།།
དགེ་སྦྱོང་བ་ཡི་འདི་ཕྱི་གཉིས།།
དགེ་རྒན་བཟང་པོའི་དམིཊ་ཡུལ་ཡིན།།
སྐྱོང་བ་ནམ་ཡང་མ་བརྗེད་རོགས།།
སློབ་ཁྲིད་གསེང་གི་སློབ་གསོ་དང་།།
དཔེ་ཁྲིད་གསེང་གི་དོགས་དཀྲོལ་སོཊ།།
ཀླུ་གཙུག་རིན་ཆེན་ཡིན་ཀྱང་རུང་།།
ཉོ་ཚོང་མེད་པ་ངོས་ཟིན་དགོས། །
དཀར་པོ་དངུལ་གྱི་མ་སླད་ལ་།
སྔོན་པོ་ལྕགས་དང་མ་འདྲེས་པའི།།
སེར་པོ་གསེར་གྱི་གདམ་ངག་དེ།།
དོན་གྱི་གསེར་ངོ་ཤེས་པར་གྱིས།།
༢༠༡༣-༩-༡༢-ཉིན་གྱི་ཕྱི་དྲོ་དུས་ཚོད་༦-ཐོག་རྒྱ་ནག་ཁྲིན་ཏུའི་གྲོང་དུ་བྲིས།
ཡོང་ནས་བཀླགས་ནས་ཡིད་ལ་བཅུག་ནས་བསམ་གཞིག་ཀློང་དུ་ཕྱིན་སོང་།