མི་དབང་མི་མགུ་མེད་པའི་ཚངས་སྲས་མ།།
དྲང་བདེན་ལམ་གྱི་མདའ་ཁ་དཀྱུས་བཙན་པ།།
མཐོ་དམན་དབྱེ་དཀྲུག་འབྱེད་ལ་མཁས་པ་དེ།།
ཀུན་དགའ་དོན་འགྲུབ་སྟེང་དུ་ནམ་ཡང་འཚོགས།།
དགེ་ལ་ཕྱི་བཤོལ་བྱེད་པའི་རྗེས་ལུས་པ།།
སློབ་ལ་ལེ་ལོ་བསླབ་པའི་དགེ་རྒན་འདྲ།།
མི་ཚེ་རྣམ་གཡེང་གཏོང་བའི་གཏེ་ཧོ་དངོས།།
ཀུན་དགའ་དོན་འགྲུབ་སྟེང་དུ་ཅི་མི་ཚང་།།
གཅིན་ཚེ་བློ་དགུ་འཁྲབ་པའི་སྐྱང་གྲུང་འཛོམས།
ལས་འབྲས་རྡོག་བརྫིས་གཏོང་བའི་ཕུང་རྒན་དངོས།།
ཡིན་མིན་ཁ་ཚོན་གཅོད་པའི་དྲང་བདེན་རྫུན།།
དོན་འགྲུབ་ཀུན་དགའི་འཁྲབ་སྟོན་ཡ་རེ་མཚར།།
མཐོ་བའི་སྤྱི་དཔོན་རྒྱལ་པོ་མན་ཆད་དང་།།
དམའ་བའི་ར་རྫི་སྐྱ་ངོ་ཡན་ཆད་ཀྱི།།
ཡིད་སྨོན་ཤོར་སའི་འདོད་ཡོན་མིག་གི་ཟས།།
ཀུན་དགའ་དོན་འགྲུབ་སྟེང་དུ་ཡོད་ཚད་འཚོགས།།
ཤ་ལ་མི་དགའ་བ་ཡི་ཞི་མི་དང་།།
རྒྱུ་ལ་མི་དགའ་བ་ཡི་ཕྱུག་པོ་ཞིག།
འཛིན་མའི་གོ་ལ་འདིའི་སྟེང་མི་འདུག་སྟེ།།
ཀུན་དགའ་དོན་འགྲུབ་ཀུན་ལ་མཛེས་མ་ཡིན།།
བྱ་བ་ཀུན་གྱི་བསྒུལ་སྤྱོད་དཔུང་དུ་སྒྲིལ།།
སྟག་ཁྱུ་དར་མས་གར་སྟབས་རྔམ་རྫིག་འགྱིང་།།
ཕྲ་མྱུར་ལྡེམ་མའི་སྐད་འགྱུར་གྲེ་དབྱངས་འཐེན།།
མཉམ་འཛོམ་དགའ་སྟོན་ལྟད་མོ་ཁྱོད་ཀྱིས་བཤམ།།
བ་སྤུ་ཟིང་ཟིང་རྒྱུ་བའི་ཚོར་བདེའི་མ།།
རྣམ་རྟོག་མྱུར་མགྱོགས་དྲག་པའི་གར་མཁན་མ།།
སྒྱུ་རྩལ་དམངས་ཁྲོད་འཚོགས་པའི་ལྡེམ་མྱུར་དེ།།
ཀུན་དགའ་དོན་འགྲུབ་ཁྱོད་ལ་ནམ་ཡང་འཁོར།།
ཨ་ཞང་མགོ་ཟླུམ་འགའ་ཡི་འགྲོ་དོན་དང་།།
ལུས་ངན་ཨ་མཆོད་སྤྲང་པོའི་མཆོད་དབྱངས་གཉིས།།
མཛེས་པའི་མིང་གི་བརྒྱན་པ་མ་མཚུང་ལས།།
དམིགས་པ་ཀུན་དགའ་དོན་འགྲུབ་ཅི་ལ་ཁྱད།།
གསོན་ན་གསོག་སེམས་འཁོར་སའི་ཨ་མ་འདྲ།།
ཤི་ན་ཕྱི་མིག་བསྒྲད་སའི་ཨ་ཕ་འདྲ།།
དུས་རྒྱུན་སྤུན་མཆེད་བས་ཀྱང་གཅེས་སྤྲས་ཆེ།།
ཀུན་དགའ་དོན་འགྲུབ་ནམ་ཡང་ཨེ་མ་ཧོ།།
ཁྱོད་རང་མེད་ན་ལམ་སྟོན་གང་གི་ཞུ།།
ཁྱོད་རང་མེད་འཚོ་རྟེན་སུ་ཡི་བྱེད།།
ཁྱོད་རང་མེད་ན་འཕེལ་རྒྱས་སུ་ཡི་གཏོང་།།
ཀུན་གྱི་གྲོགས་པོ་ཀུན་དགའ་དོན་འགྲུབ་རྒྱལ།།
༢༠༡༣-༧-༡-ཉིན་བྲིས།།
