མདུན་ལམ་གོམ་འགྲོས་མེད་སྟེ།།
མ་འོངས་ཕྱི་བསམ་མི་ཤེས།།
ལོ་གཅིག་འཚོ་བའི་འགྲོ་སོང་།།
ག་ལེར་ག་ལེར་མེད་པ།།
ཡ་ཕྲུག་ཡ་ཧོ་འགའ་ཡི།།
དབྱར་རྩ་དགུན་འབུ་རྙེད་འདྲ།།
སྐོམ་པའི་ཆུ་ལ་རྔམ་རྔམ།།
ཞལ་མཆུ་ཡར་རྒྱག་མར་རྒྱག།
ཁ་ནས་བཤད་དུ་མ་ཕོད།།
ཁོག་ཏུ་དམ་དྲག་ཚ་བ།།
ག་ལེར་ག་ལེར་མེད་པ།།
གྲྭ་པས་མནའ་མ་བཞག་འདྲ།།
ཉི་མ་གཅིག་གི་སྡུག་འབྲས།།
དེ་རིང་གསེར་མདོག་རྭ་ཅོ།།
དེ་དགོང་སྡོམ་ཁ་གཡར་ཏེ།།
ཡོན་བདག་མོས་པ་མེད་ཀྱང་།།
ག་ལེེར་ག་ལེར་མེད་པ།།
བཙུན་གཟུགས་འབུ་སྡོམ་བྱོན་འདྲ།།
དགོས་པའི་དགེ་བ་མི་ཤེས།།
མི་དགོས་ཡོད་ཚད་ཤེས་མཁན།།
གྲོང་ཁྱེར་རྒད་པོ་འགའ་ཡིས།།
བཟའ་ཚང་གཟིམས་པའི་དངུལ་ལོ།།
ག་ལེར་ག་ལེར་མེད་པ།།
མ་ལྕང་བག་ལ་བརྗེས་འདྲ།།
ཡོད་ཚད་མགོ་བོ་བསྐོར་བསམ།།
རིག་ཚད་ཚོང་ལ་བསྒྱུར་བསམ།།
མཐོང་ཚད་ཉོ་ཚོང་བྱས་ནས།།
མགོ་སྐོར་ཧམ་སེམས་ཆེ་བ།།
ག་ལེར་ག་ལེར་མེད་པ།།
ཚོང་དཔོན་གསར་པའི་ཚོང་འདྲ།།
གྲངས་མང་ལོ་ཡི་སྦྱང་བྱ།།
གཞུང་ལུགས་རྒྱ་མཚོའི་དཀའ་གནད།།
ཟླ་བ་རེ་གཉིས་ཞིག་ལ།།
ཤེས་དགོས་ཧམ་སེམས་ཆེ་བ།།
ག་ལེར་ག་ལེར་མེད་པ།།
བསྡུས་གྲྭ་གསར་པའི་སྦྱང་འདྲ།།
དེ་རིང་ཉི་མ་རིང་རིང་།།
དེ་དགོང་རེ་སྒུག་བྱས་བྱས།།
ཨ་གསར་འཛུབ་ཁུག་གང་དེ།།
རྫོགས་མཚམས་མ་སླེབས་བར་དུ།།
ག་ལེར་ག་ལེར་མེད་པ།།
ཕོ་གསར་མནའ་གསར་བཞག་འདྲ།།
༧
འབྱོར་མེད་ཁྱིམ་ཚང་ཞིག་དུ།།
ཞག་བཞུགས་བྱེད་ཐག་གཅོད་ཀྱང་།།
ཞལ་པར་ཨང་གྲངས་རྫིག་པའི།།
རྒྱ་མོའི་གསུང་སྐད་ཐོས་ཐག།
ཟླ་གམ་ཕྲག་ཏུ་བསྣམ་ནས།།
ག་ལེར་ག་ལེར་མེད་པ།།
རྒྱ་བླའི་རྒྱ་མོ་རྙེད་འདྲ།།
མཚན་མོ་མཚན་སྙན་མི་བརྗེད།།
བསམ་བློ་སྟེང་འོག་དགུ་བསྒྱུར།།
སེམས་པས་རྒྱལ་ཁམས་སྐོར་སྐོར།།
མི་ཚོགས་ཁྲོམ་ཚོགས་དཀྱིལ་དུ།།
སྔོན་མགྱོགས་བང་རྩལ་ངོམ་རེས།།
ག་ལེར་ག་ལེར་མེད་པ།།
རུས་བླས་སེར་འཕྲེང་སྒྲིག་འདྲ།།
དང་པོ་རུམ་དུ་འཛུལ་ཀྱང་།།
ད་དུང་རིང་སྐྱོན་ཆེ་དོགས།།
ཕྱིས་སུ་ལ་ལུང་བསྐལ་ཀྱང་།།
ད་དུང་ཉེ་དོགས་དྲགས་པའི།།
སྲིད་པ་རྒད་པོ་ཞིག་གི།
འཛངས་མས་རྒད་མོ་ཕུད་པའི།།
གཏམ་གླེང་ལོ་རྒྱུས་ཡིད་ཞོག།
བྱ་བ་བཟང་ངན་གང་ཡིན།།
དང་པོ་ཨ་གསར་མ་བྱེད།།
ཡུན་རིང་འདྲིས་ཟབ་ཆེ་རིམ།།
བཟང་རྟགས་ངན་རྟགས་ཐོན་ཡོང་།།
རང་འདྲའི་ལོ་ཆུང་རྣམ་པ།།
སྤྲེལ་ལད་འཁྲབ་རྒྱུ་མང་ན།།
བལྟ་འདོད་ཡེ་ནས་མེད་ཀི།།
༢༠༡༣-༦-༢༠-ཉིན་མོར་འཁོར་དུས་༩ནས་༡༢བར་ཆབ་མདོ་སྨན་ཁང་ནང་སྨན་ཁབ་རྒྱག་ཚེ་ཉི་མ་མ་སོང་ནས་ཆོ་མེད་འདི་བྲིས།།
