སྐྱབས་སུ་མཆི།
གོང་མ་ལྷ་ཡིས་བསྐོས་པའི།།
གཡུང་དྲུང་བོན་གྱི་བདག་པོ།།
སངས་རྒྱས་གཤེན་གྱི་སྲས་པོ།།
རྒྱལ་བ་སྨན་རིའི་ཚང་གི།
མཁན་སློབ་རྣམ་གཉིས་མཁྱེན་ནོ།།
རྒྱལ་བ་གཤེན་གྱི་རྗེས་བཞག།
རྒྱལ་བསྟན་ཚུལ་བཞིན་སྐྱོང་སྟེ།།
རྒྱལ་བ་གཉིས་པའི་རྒྱལ་ཚབ།།
རྒྱལ་བ་སྨན་རིའི་ཚང་གི།
མཁན་སློབ་རྣམ་གཉིས་མཁྱེན་ནོ།།
ཚང་སྤྱོད་ཚུལ་དང་མཐུན་པར།།
ཡང་དག་དགེ་བཅུ་སྤྱོད་བཞིན།།
གདུལ་བྱའི་ལམ་སྣ་འཁྲིད་མཁན།
རྒྱལ་བ་སྨན་རིའི་ཚང་གི།
མཁན་སློབ་རྣམ་གཉིས་མཁྱེན་ནོ།།
ཤི་ན་ལམ་སྟོན་ཞུ་ཡུལ།།
གསོན་ན་རེ་མདུན་བཅོལ་ས།།
འགྲོ་བ་ཡོངས་ཀྱི་སྐྱབས་གནས།།
རྒྱལ་བ་སྨན་རིའི་ཚང་གི།
མཁན་སློབ་རྣམ་གཉིས་མཁྱེན་ནོ།།
ཕ་ས་གཅིག་གི་ཡུལ་ལ།།
འཚར་ལོངས་མཉམ་དུ་བྱུང་བའི།།
ཤ་རུས་ཁྲག་རྩ་གཅིག་པའི།།
རྒྱལ་བ་སྨན་རིའི་ཚང་གི།
མཁན་སློབ་རྣམ་གཉིས་མཁྱེན་ནོ།།
བོན་འབངས་ཡོངས་ཀྱི་ལྷ་སྐལ།།
སུམ་བཅུའི་མཚན་བཟང་བཞད་པའི།།
སྐུ་ཚེ་ལྷ་ལས་རིང་བར།།
རྒྱལ་བ་སྨན་རིའི་ཚང་གི།
མཁན་སློབ་རྣམ་གཉིས་མཁྱེན་ནོ།།
སེར་པོ་གསེར་གྱི་ཞལ་རས།།
མྱུར་དུ་མཇལ་བའི་སྨོན་ལམ།།
ཡང་ཡང་སྐལ་བཟང་སྒུག་པ།།
རྒྱལ་བ་སྨན་རིའི་ཚང་གི།
མཁན་སློབ་རྣམ་གཉིས་མཁྱེན་ནོ།།
གསུང་ཚད་ཐམས་ཅད་གདམ་དོན།།
མཛད་འཕྲིན་ཐམས་ཅད་བསྟན་དོན།།
ཕེབས་ཚད་ཐམས་ཅད་འགྲོ་དོན།།
རྒྱལ་བ་སྨན་རིའི་ཚང་གི།
མཁན་སློབ་རྣམ་གཉིས་མཁྱེན་ནོ།།
ལོང་བའི་མུན་ཁང་ནང་དུ།།
གཤེན་བསྟན་སྒྲོན་མེ་སྤར་མཁན།།
གཤེན་གྱི་མཛད་འཕྲིན་སྐྱོངས་མཁན།།
རྒྱལ་བ་སྨན་རིའི་ཚང་གི།
མཁན་སློབ་རྣམ་གཉིས་མཁྱེན་ནོ།།
རང་ལྟ་མཆོག་ཏུ་འཛིན་ནས།།
གྲུབ་མཐའི་མཐའ་ལ་མ་ལྷུང་།།
རིས་མེད་མགོན་དུ་བཞུགས་མཁན།།
རྒྱལ་བ་སྨན་རིའི་ཚང་གི།
མཁན་སློབ་རྣམ་གཉིས་མཁྱེན་ནོ།།
འཆད་ན་གཞུང་ལུགས་རྒྱ་མཚོ།།
རྩོད་ན་རིག་པའི་ཐོག་མདའ།།
རྩོམ་ན་སྡེ་སྣོད་ཚིག་མཛོད།།
རྒྱལ་བ་སྨན་རིའི་ཚང་གི།
མཁན་སློབ་རྣམ་གཉིས་མཁྱེན་ནོ།།
བོན་སྒོ་བརྒྱད་ཁྲི་བཞི་སྟོང་།།
ཐུགས་ལ་ཆེམ་མེར་བཀྲ་བའི།།
ཐུགས་རྗེས་བྱིན་རླབས་མ་ཆུང་།།
རྒྱལ་བ་སྨན་རིའི་ཚང་གི།
མཁན་སློབ་རྣམ་གཉིས་མཁྱེན་ནོ།།
སྐུ་ཚེ་བར་ཆད་མེད་པར།།
སྐུ་སྲོག་བྲག་ལས་སྲ་བར།།
སྐུ་ལུས་གསེར་ལས་གཙང་བའི།།
རྒྱལ་བ་སྨན་རི་ཚང་གི།
སྐྱབས་རྗེ་མཁན་སློབ་རྣམ་གཉིས།།
སྐུ་ཚེ་བསྐལ་བརྒྱར་བཞུགས་སྨོན།།
༢༠༡༣-༦-༡༩ ཉིན་དུས་ཚོད་༣་པའི་ཐོག་ཆབ་མདོ་སྨན་ཁང་ནང་ནས་རང་ཉིད་ནད་ཀྱི་འཇིག་པ་སེལ་བའི་ཆེད་དུ་གསོལ་བ་རྩེ་གཅིག་ཏུ་བཏབ་བཞིན་བསོད་ནམས་བློ་གྲོས་ནས་བྲིས།།
