རིན་ཆེན་གཏེར་ཁ་སྣུམ་གྱི་ཕྱུག་པའི་བྲག་དམར་རིན་ཆེན་འབར་བའི་རྩེར།།

ན་བུན་ཁ་རླང་གཡས་སྐོར་ལྡིང་ལྡིང་ཟིགས་མའི་སྦྲང་ཆར་ཟིམ་སེ་ཟིམ།།

ཕར་ཀའི་རི་ཡི་རི་དམར་དབང་ལྷའི་མཛེས་པའི་ཉམ་འགྱུར་དེ་རིང་མཛེས།།

ཚུར་ཀའི་རི་ཡི་སྟག་རྒོད་འབར་བའི་སྟག་ཁྱུ་དཔུང་སྒྲིལ་སྒྲ་བླ་འཛོམས།།  

བར་གྱི་ལྔ་རིག་སློབ་གླིང་འདི་ཡི་འཆད་རའི་བར་གསེང་ཆར་ཟིམ་ཟིམ།།

མདུན་གྱི་ལྡུམ་རའི་ན་མར་སྟེང་དུ་ཨུད་དཔལ་མེ་ཏོག་གསར་བཞད་བཞད།།

སྨད་ཀྱི་རྒྱ་གྲོང་མཐའ་སྐོར་མཚམས་ནས་ཁང་གསར་གྲངས་མེད་གསར་བསྐྲུན་བསྐྲུན།།

དེ་རིང་ཞིག་ལ་སྟོད་སྨད་བར་གསུམ་འདི་ན་མཛེས་པའི་ཆར་ཟིམ་ཟིམ།།

དེ་རིང་ཞིག་ལ་ཆར་པ་ཟིམ་ཟིམ་ཁྱོད་ཀྱིས་ཚོར་སྣང་ཟིམ་ཟིམ་ཞིག།

ལུས་ཅན་ང་ཡི་ལུས་ཕུང་ཡོངས་རྫོགས་ཟིམ་ཟིམ་བདེ་བའི་གྲོགས་སུ་བཀུག།

ཟིམ་ཟིམ་ཟེར་བའི་ཚོར་སྣང་འཕར་མ་མི་འདོད་མཁན་ཞིག་ཡོད་རྒྱུ་དཀོན།།

དབྱར་གྱི་རྩི་དང་འོ་ཞོ་མངར་མོ་ཟིམ་ཟིམ་ཆར་གྱིས་མགྲོན་བརྡ་བཏང་།།

ཆར་པ་ཟིམ་ཟིམ་ས་ལ་འཐོར་བས་འབྱུང་བའི་དྭངས་མ་དེ་ལ་འཚོགས།།

ཆར་པ་ཟིམ་ཟིམ་ས་ལ་བབས་པས་ས་འོག་ལྗང་རྩེ་མཁའ་ལ་ཐར།།

ཆར་པ་ཟིམ་ཟིམ་ས་ལ་བབས་པས་གསེར་མདོག་ར་ཅོའི་ས་གཞི་ཁེངས།།

ཆར་པ་ཟིམ་ཟིམ་ཀུན་གྱི་འབྱུང་རྩ་སྐྱེ་སྒོ་དང་པོ་ཁྱོད་ལ་ཐུག།

 ༢༠༡༣-༥-༡༩ཉིན་མོར་སྔ་དྲོ་འཆད་རའི་རྩོད་གྲྭ་གྲོལ་སྐབས་ཆར་ཟིམ་ཟིམ་བབས་གསེང་དུ་ཁྱུང་ནག་བློ་གྲོས་ནས་བྲིས།།