ངོ་ཚ་ཚབས་ཆེན་བཟོས་བཞག།
དུས་རབས་གསར་པའི་ཁུག་སོ།།
འཇིག་རྟེན་ཟང་ཟིང་ཁྲོད་དུ།།
ཡ་མེད་མགོ་ཟླུམ་འགའ་ཡིས།།
ཤམས་ཐབས་ཤིང་ལ་བཀལ་བཞིན།།
སྒོ་དམར་ནང་དུ་འཛུལ་ནས། །
ངོ་ཚ་ཚབས་ཆེན་བཟོས་བཞག།
འཇིག་རྟེན་སྣང་བ་བསླུ་མཁས།།
རྣམ་རྟོག་འགྱུར་ལྡོག་ཆེ་དྲག །
བཙུན་པའི་ཁྱུ་ཚོགས་ཞིག་ལ།།
མཛངས་མ་མཆོད་མཇལ་ཕེབས་དུས།།
བཙུན་པས་སྤྱན་སྐོར་རྒྱག་ནས།།
ངོ་ཚ་ཚབས་ཆེན་བཟོས་བཞག །
དུས་རྒྱུན་འདོད་ཆུང་ཆོག་ཤེས།།
ཕུག་གི་མཚམས་ཆུང་འགའ་ཡི།།
ཞལ་གྱིས་བསྟན་པ་ཞོར་ཉམས།།
མཐོང་བའི་རྐྱེན་ལ་གཟིགས་སྟེ།།
སྣ་མང་སྡོམ་ཁ་གཡར་བཞིན། །
ངོ་ཚ་ཚབས་ཆེན་བཟོས་བཞག །
དཀའ་སྤྱད་སེམས་ཁྲལ་བྱེད་སའི།།
རྔུལ་ནག་ཁྲག་གི་ཐིགས་པ། །
དེ་རིང་གསེར་མདོག་རྭ་ཅོ། །
དཔྱིད་མིག་འབུ་ལ་ཟུག་པའི།།
མགོ་ཟླུམ་ཡ་ཧོ་ཁྱོད་ཀྱིས།།
དེ་དགོང་རེ་སྒུག་བྱས་བྱས།།
ངོ་ཚ་ཚབས་ཆེན་བཟོས་བཞག།
དཔྱིད་མིག་སེར་ལ་ཟུག་ཟུག།
དབྱར་མིག་དཀར་ལ་ཟུག་ཟུག།
སྟོན་མིག་དམར་ལ་ཟུག་ཟུག །
དགུན་མིག་སྔོན་ལ་ཟུག་པའི།།
ཁྲེལ་མེད་མགོ་ཟླུམ་ངེད་ཚོས།།
དྲིན་ཆེན་ལྷ་སྡེ་ཡོངས་ལ།།
ངོ་ཚ་ཚབས་ཆེན་བཟོས་བཟོས།།
ད་ལྟ་མ་གཏོགས་མ་མཐོང་།།
དེ་རིང་མ་གཏོགས་མི་དགོས།
སང་ཉིན་དྲན་རྒྱུ་མེད་པའི།།
སྟོང་སྟོང་གཏེ་ཕྲུག་འགའ་ཡིས།།
འབུ་རྫ་བརྐོ་ལ་ཟིན་རྗེས།།
ཁ་སང་རྫོང་ཀྲམ་ཅི་ཟོས།།
དེ་རིང་ཟ་དགོས་ཟེར་ནས།།
ངོ་ཚ་ཚབས་ཆེན་བཟོས་བཞག།
རང་འདྲའི་བློ་དམན་འགའ་ཡིས།།
ཧི་ཟིན་གྲོང་ཁྱེར་ཁྲོད་དུ། །
གོར་སའི་ས་མིག་བགགས་ནས།།
གང་དྲན་གང་སར་སྤེལ་ནས།།
ངོ་ཚ་ཚབས་ཆེན་བཟོས་བཞག།
༢༠༡༣ ༦་ ཚེས་ ༡༠ ཁྱུང་ནག་བསོད་ནམས་བློ་གྲོས་ནས།
