ཁྱུང་པོ་སྟེང་དགོན་གྱི་རང་གཤིས་དཔེ་རྒྱན་སོ་གསུམ་གྱིས་དྲངས་པ་སྨྱུག་མའི་མདའ་དྲང་།།
བསོད་ནམས་བློ་གྲོས།།
༡རང་བཞིན་དཔེ།
ལྟ་བ་མཐའ་བྲལ་གཉུག་མའི་རང་གཤིས་སྐྱོང་། །
སྒོམ་པ་ལྷད་མེད་བརྟན་པའི་ཏིང་འཛིན་གསལ། །
སྤྱོད་པ་རང་བས་གཞན་གཙོ་སེམས་དཔའི་ཟླ། །
ལྟ་སྒོམ་སྤྱོད་གསུམ་རྒྱ༵་མཚོ༵འི་ནོ༵ར་བུ༵་མཆོག
།
༢ བོན་དཔེ།
མཁས་གྲུབ་གཉིས་ལྡན་རྒྱ༵ལ་འཕ༵གས་རྣམ་གཉིས་ཀྱི།
།
སྐུ་མཆོག་བརྟན་ཞིང་ནང་ཁྲིམས་གསེར་ལས་གཙང་།།
གདམ་དོན་རྒྱ་མཚོའི་ངོས་ལས་གཏིང་ཞིང་ཟབ།
།
ཐུགས་ཉིད་རིས་མེད་ནམ་མཁའི་ཐིག་ལེའི་དྲང་།
༣
དངོས་པོའི་དཔེ།
མཛེས་ཚོན་རྣམ་བཀྲའི་ཕུ༵ན་ཚོ༵གས་བང་མཛོད་བསྐྲུན།
།
རིན་ཆེན་འབྱོ༵ར་རྒྱ༵ས་གཞལ་ཡས་ཁ༵ང་ཆེན་འཁུ།
།
ཡིད་འོང་ཆ་ཤས་རྫོགས་པའི་འཛུམ་རླབས་ནི།
།
གསེར་ཀ་གཡུ་གདུང་ཅན་གྱི་དཔེ་ཟླ་འོས།
།
༤ ཟློག་པའི་དཔེ།
དག་ཞིང་གཡུང་དྲུང་སེམས་དཔའི་ཐུགས་བརྩེ་བཞིན།
།
ཁྱུ་ཚོགས་དམར་སེར་འདུས་སྡེས་འགྲོ་ལ་བརྩེ།
།
རང་བས་གཞན་དོན་གཙོ་རུ་བྱས་པ་ལྟར།
།
སྐྱེ་འགྲོའི་ཆེད་དུ་རང་སེམས་སངས་རྒྱས་བསྒྲུབ།
།
༥ ཕན་ཚུན་དཔེ།
མང་འདུས་དབུས་དཔའ་བ༵ར་ཐ༵་དབུ་ཡི་གསུང་། །
རྣམ་བཀྲའི་དབྱར་སྐྱེས་དར་མའི་གདང་ཀྱིས་མཚོན། །
སྐད་གསང་མཐོན་པོ་གཡུ་འབྲུག་དར་མའི་སྒྲ། །
སྟེང་དགོན་བ༵ར་ཐ༵་དབུ༵་མཛ༵ད་གདང་ལྟར་གྲགས།
།
༦
ངེས་པའི་དཔེ།
སོ་ཐར་བསླབ་གསུམ་ཕྱུག་པའི་ཡོངས་འཛིན་བས།
།
འདུལ་སྟོན་ཁྲི་གཙུག་རྒྱལ་བའི་ངང་ཚུལ་འགོག
།
བསླབ་གསུམ་ཡང་དག་ཕྱུག་པའི་མཚུངས་དཔེ་གཞན།
།
འཛམ་གླིང་གོ་ལ་ཟླུམ་པོའི་ཁམས་འདིར་དབེན།
།
༧ ངེས་མེད་དཔེ།
ཡེ་མཁྱེན་གཤེན་ལྷའི་སྐུ་མདོག་དཀར་པོའི་མདང་།།
གངས་དཀར་རྟ་བདུན་འབུམ་གྱི་འཁྱུད་པ་འདྲ།
།
དེར་མཚུངས་དཀར་པོའི་སྣང་ཆ་གཞན་སྲིད་ཚེ།
།
ཉིད་ཀྱི་དཔེ་ཟླ་བསྟེགས་ལ་ངལ་བ་ཅི།
།
༨ བསྡུས་པའི་དཔེ།
སྙན་པའི་དབང་ཕྱུག་སྒྲ་དབྱང་རྒྱལ་མོའི་མཚན།
།
རྣ་བའི་དཔྱིད་དུ་གྱུར་པ་ཁོ་ན་ཡིས།
།
ངག་རིགས་གཞན་གྱི་འགྱུར་ཁུག་འཕྲོག་མིན་ཏེ།
།
སྲིད་ཞི་ཀུན་གྱི་མཐིལ་དུ་བླ་རུ་འཕགས།
།
༩
ཕུལ་བྱུང་དཔེ།
གཞུང་ལུགས་གདམ་པ་ཤར་བའི་ཡོངས་འཛིན་དང་།
།
རིས་མེད་བསིལ་ཟེར་འཕྲོས་པའི་ཟླ་གསར་གཉིས།
།
ཁྱད་པར་ཡེ་ཤེས་སྤྱན་དང་རི་དྭགས་གཟུགས།
།
ལྡན་མིན་ཁྱད་པར་ཙམ་ལས་གཞན་མ་འཆིས།
།
༡༠
རབ་བཏགས་དཔེ།
ཡ་མེད་མགོ་ཟླུམ་ངུར་སྨྲིག་རྒྱན་མཛེས་ཞེས།
།
ཨུད་དཔལ་དམར་པོའི་དཔལ་ཡོན་སྙེམས་མི་འཚལ།
།
ལང་ཚོ་རྣམ་པར་བཀྲ་བའི་དབྱང་ཅན་མས།
།
ངུར་སྨྲིག་རྒྱན་གྱི་འཇོ་སྒེག་འཕྲོག་པར་ནུས།
།
༡༡
རྨད་བྱུང་དཔེ།
ཆོལ་གསུམ་བོན་སྦྱིན་གཏེར་བའི་བང་མཛོད་ཅན།
།
གང་འདོད་ཀུན་འབྱུང་རྒྱ༵་མཚོ༵འི་ནོ༵ར་བུ༵་ལ།
།
རིས་མེད་འགྲོ་ལ་བརྩེ་བའི་སེམས་རྒྱུད་ཕྱུག
།
དག་ཞིང་གཡུང་དྲུང་སེམས་དཔའི་སྐུ་ཟླ་འོས།
།
༡༢
རྨོངས་པའི་དཔེ།
དགུང་སྐར་ཐང་ལ་འཕོས་འདྲའི་གླིང་ཤག་ལ།
།
རྣམ་མང་རྒྱ་གྲོང་འཚོགས་པའི་དཔལ་དུ་འཁྲུལ།
།
ཕུ༵ན་ཚོ༵གས་འབྱོ༵ར་རྒྱ༵ས་ཁ༵ང་གི་སྒོ་ཆེན་ན།
།
སློབ་ཚོགས་བྱེ་བས་བསྒུལ་སྤྱོད་མངོན་ལ་གཡེང་།
།
༡༣ ཐེ་ཚོམ་གྱི་དཔེ།
མགོ་ཟླུམ་ངུར་སྨྲིག་སྤུད་པའི་སྣང་བ་ཅན།
།
ནེའུ་གསེང་ཨུད་དཔལ་དམར་པོའི་ཁེངས་པ་འམ། །
འདུས་སྡེ་བྱེ་བའི་རྒྱན་གྱི་སྤྲས་པ་གང་། །
བློ་ཡིས་གཞིག་ཀྱང་སེམས་ཉི་བཟློག་མ་ནུས།
།
༡༤གཏན་འབེབས་ཀྱི་དཔེ།
ཡལ་ག་ལོ་འདབས་མཛེས་པའི་གཡུ་ཤུག་འདི།།
དྲི་མཆོག་ཇི་ལྟར་ཞིམ་ཀྱང་ཙན་དན་མིན།།
མི་འདོད་ནད་ཀྱི་གཉེན་པོ་སོང་བས་ན།།
ཉོན་མོངས་ནད་བརྒྱ་འཇོམ་པའི་བཟང་དྲུག་ངེས།།
༡༥ སྦྱར་བའི་དཔེ།
རིས་མེད་སློབ་ཚོགས་མགྲོན་གྱི་རྒྱུ་ལམ་ཡང་།
།
མཐོ་འཕར་གྲངས་དུ་བགྲང་ལ་ངེས་པ་མེད། །
མུ་མེད་ལྷ་ལམ་ངང་གྱི་སྒྱུ་སྐར་འགའ། །
གློ་བུར་མི་རྟག་དོགས་ལ་གཤེགས་དང་མཚུངས།
།
༡༦
མཉམ་ཉིད་དཔེ།
དོན་གྱི་སྣུམ་པའི་རྒྱ༵་མཚོ༵འི་ནོ༵ར་བུ༵་ཞབས།
།
ཀུན་འབྱུང་ནོར་གྱི་བདག་པོ་གཙུག་ན་བཞིན།
།
སྦྱིན་བརྒྱ་གཏོང་ལ་ཟད་མེད་དབུལ་དབེན་པས།
།
བློ་གྲོས་རྒྱ་མཚོའི་གདིང་གི་གཞལ་བ་དཀའ།
།
༡༧ སྨད་པའི་དཔེ།
རིན་ཆེན་ཆགས་ལྡན་རྒྱན་སྤྲས་དུག་ལྔའི་ཁེངས།
།
པད་མོའི་ཟེ་འབྲུ་འདོད་ཅན་སྦྲང་མའི་ཟས། །
བཅུ་དྲུག་ལང་ཚོའི་རླབས་ཞག་འཛུམ་བརྩེའི་གཏེར།
།
ཕྱུག་ཚུལ་མཚུངས་ལས་རྔམ་ཞིང་ཁྱད་པར་འཕགས།
།
༡༨ བསྔགས་པའི་དཔེ། །
མཐའ་ཀླས་འཆི་མེད་རྫིང་རིང་ཉི་ཟླའི་ཞིང་།
།
ཐིག་ལེའི་མ་མ་སྔོན་པོ་ནོར་བུའི་མཛོད།
།
རྣམ་འདྲེན་སྐྱེས་མཆོག་འོད་ཟེར་སྦྱིན་པའི་ཐུགས།
།
རྣམ་ཀུན་དེ་དང་ཡང་དག་འདྲེན་ནུས་སུ།
།
༡༩ བརྗོད་འདོད་དཔེ། །
ཤེས་བྱའི་ལུང་རིག་མཛོད་ཀྱི་ཕྱུག་པ་འམ། །
བེམ་པོའི་ཡིག་གཟུགས་ཆེམ་མེར་བཀོད་ཀྱང་རུང་།
།
གཞོན་ནུ་ཁྱེད་བློ་དེང་རབས་གློག་ཀླད་དང་།
།
མཚུངས་ཞེས་བརྗོད་འདོད་བདག་གི་ཡིད་ལ་འཆང་།
།
༢༠ འགལ་བའི་དཔེ།
བསིལ་བའི་ཟེར་བརྒྱ་ལྡན་པའི་ཐིག་ལེ་དང་།
ཐུགས་རྗེ་འགྲོ་ལ་སྐྱོང་བའི་ཡོངས་འཛིན་ཚོགས།
།
རིས་མེད་ཀུན་ལ་འཕྲོས་པ་མཚུངས་མོད་ཀྱང་།
།
ཁྱོད་གཉིས་གནས་གཞི་གཅིག་སྟེང་འགྲུབ་པ་དཀའ།
།
དགག་པའི་དཔེ།
མིང་ཚིག་སོ་སོར་བརྗོད་པ་དང་བྲལ་བའི།།
དུས་བཞི་དཔྱིད་ཀྱི་རྒྱལ་མོའི་འགྱུར་ཁུག་གིས།།
འདི་ཕྱིའི་བདེ་བ་ཀུན་གྱི་འབྱུང་བའི་ཁུངས།།
འཆད་རྩོད་ལྔ་རིག་དབྱངས་ལ་ནམ་ཞིག་འགྲན།།
༢༢
ངོ་བསྟོད་དཔེ།
ཉི་དབང་ཕེབས་པའི་ཚབ་སྤྲུལ་ཡོངས་འཛིན་མཆོག
།
རྒྱལ་བ་གཤེན་གྱི་བསྟན་བདག་དངོས་ཡིན་ཀྱང་།
།
རྒྱལ་བ་གཉིས་པ་དངོས་དང་རྒྱལ་ཚབ་ཁྱད།
།
སོ་སྐྱེའི་ཐ་སྙད་ཚད་མའི་རྟོགས་ཡུལ་འདས།
།
༢༣ དེ་ཉིད་ཀྱི་དཔེ།
འདི་ནི་སུམ་གླང་ཤོད་ཀྱི་དབྱར་དུས་ཏེ། །
ལྷ་མོའི་རྩེ་དགའ་རོལ་བའི་ལྷ་ཡུལ་མིན། །
དགོས་འདོད་རྒྱན་གྱི་སྤྲས་མིན་རང་བྱུང་གི
།
ནོར་བུ་དཀར་དམར་འདྲིལ་བའི་དཔལ་མངའ་འོ། །
༢༤
ཐུན་མིན་དཔེ།
འདུས་སྡེའི་མཚོ་གནས་ཕུན་སུམ་ཚོགས་མངའ་བ།
།
བཙུན་ཚོགས་བདེ་བའི་དཔལ་ལ་རིང་འདས་པའི།
།
རིས་མེད་འདོད་རྒུ་འཚོགས་པའི་གླིང་ཁ་འདིར།
།
འདི་མཚུངས་དཔེ་འོས་རང་ཉིད་ལས་གཞན་མེད།
།
༢༥ འབྱུང་མིན་དཔེ།
འཛམ་གླིང་བླ་མ་ཀུན་གྱི་དགོང་པའི་བཅུད། །
གཅིག་ཏུ་བསྡུས་འདྲའི་ཁྱད་འཕགས་བློ་རིག་གིས།
།
རྒྱལ་ཁམས་དང་ལེན་བརྟག་པའི་རིག་སྨྲ་བ། །
ནོ༵ར་བུ༵འི་མིང་གི་མཚན་ཅན་བསྟན་འགྲོའི་རྒྱན།
།
༢༦ སྲིད་མིན་དཔེ།
བཤད་སྒྲུབ་མེད་པའི་འདུལ་ཚོགས་རྒྱས་པ་དང་།
།
ས་བོན་མེད་བཞིན་སྨྱུ་གུ་འཁྲུངས་པ་ནི།
།
གཏན་ནས་སྲིད་པ་མེད་བཞིན་འདུས་སྡེའི་དཔུང་།
།
མེད་པའི་དགོན་ཆེན་ཡར་རྒྱས་ཡོད་སྲིད་དམ།
།
༢༧ མང་བའི་དཔེ།
མི་གཙང་སྤྱོད་དང་རྫུན་ལས་ལྐོག་གཡོ་དང་།
།
ཕ་མར་མགོ་བསྐོར་ཆང་རག་དུག་ཐལ་སྤྱོད། །
ནང་འགལ་ཚུལ་འཆོས་གཟབ་པའི་དགེ་བྱེད་འགའ།
།
རང་དང་རང་དགོན་གཉིས་ཀ་ཕུང་བའི་རྒྱུ། ། ༢༨
རྣམ་འགྱུར་དཔེ།
དམར་སེར་ངང་ཁྱུ་ཚོགས་པའི་འདུས་སྡེ་འདི།
།
རྐང་དྲུག་འདབ་རྒྱའི་བཅུད་ལ་དཔུང་པ་བཞིན།
།
ཟོལ་མེད་ཐོས་བསམ་བུ་ཡིས་དབྱངས་སྒྲ་འདི།
།
སྦྲང་རྒན་མགྲིན་པའི་གློང་ནས་འཕྱུར་དང་མཚུངས།
།
༢༩ ཕྲེང་བའི་དཔེ།
ཀ་ཁའི་དབྱངས་རྟ་གྱེར་ནས་ཚག་བསྡུམ་འཐེན།
།
དེ་མཐུས་མིང་གཞི་བརྡ་སྤྲོད་སྙན་ངག་དང་།
།
འཆད་སྒྲུབ་སྒོམ་པའི་སྒོ་རིམ་མཐར་ཕྱིན་ན།
།
བསླབ་པས་ཐོས་བསམ་སྒོམ་འབྲས་རིམ་སྨིན་ངེས།
།
༣༠ ངག་དོན་དཔེ།
བརྩེ་གླིང་འདི་ན་རྩེ་གྲོགས་བློ་གསར་ཚོས།
།
རང་གི་རིག་གནས་ཀློག་པའི་དབྱངས་རྟ་འདི།
།
ཚང་ཚིང་དབུས་ནས་འདབས་ཆགས་སྣ་ཚོགས་ཀྱིས།
།
རང་སོར་སྐད་དུ་གྲེ་འགྱུར་འཐེན་བཞིན་མཛེས།
།
༣༡ ཟླ་དངོས་དཔེ།
ས་དགེ་རྙིང་སོགས་གྲུབ་པའི་མཐའ་མང་ཡང་། །
གྲུ༵བ་མཆོ༵ག་གཡུ༵ང་དྲུ༵ང་བོ༵ན་དང་མཉམ་ནུས་སུ།
།
བླ་གཟུགས་སྤྲུལ་ལོ་སེར་པོ་གྲངས་མང་ཡང་།
།
ཁྱུ༵ང་ཡུ༵ལ་སྒྲོ༵ན་མེ༵་ཁྱེད་ལ་འགྲན་ནུས་སུ། །
༣༢
མཚུངས་སྦྱོར་དཔེ།
བོན་བསྟན་རྒྱས་པའི་གླིང་ཞེས་ཁྱུ༵ང་དཀ༵ར་དགོ༵ན།
།
ཁྱུང་གི་རྒྱ༵་མཚོ༵་ཁྱུང་ཡུལ་མཐིལ་ན་བརྗིད།
།
གོང་གི་སྙན་གྲགས་མཐོ་སྒང་ཡང་རྩེར་འགྲན།
།
གཅིག་ཤོས་གདུལ་བྱ་ཡོངས་ཀྱི་སྐྱབས་གནས་གྱུར།
།
༣༣ རྒྱུ་ཡི་དཔེ།
རྒྱལ་བ་རྒྱ༵་མཚོ༵འི་ཐུགས་ཉིད་ནོ༵ར་བུ༵འི་མཛོད།
།
སྦྱིན་པ་ཕངས་མེད་མཛིན་མའི་དཔལ་ལ་འཚོགས། །
རིས་མེད་ཀུན་སྙོམས་རྟ་བདུན་རྒྱལ་ཁམས་བསྐོར། །
གང་དགོས་ལྷུན་གྲུབ་དོན་གྱི་ནོར་བུ་འགྲན།
།
སྟེང་དགོན་མཛོད་འཛིན་གྲྭའི་སློབ་གཉེར་བ་མཁར་པ་བསོད་ནམས་བློ་གྲོས་ནས་ སྤྱི་ལོ་ ༢༠༡༣ ཟླ་ ༣ ཚེས་ ༢༨
ཉིན་མཇུག་རྫོགས་པར་བྲིས། །
