ངོས་བཟུང་མེད་པའི་དྲན་འཆར།

གདུལ་བྱའི་ཞལ་ལ་དཀར་ནག་ཅི།།

ཕྱི་མ་བསྒྲུབ་པའི་རྣལ་འབྱོར་ལ། །

ད་འོང་འཕེལ་རྫས་མི་དགེའི་རྒྱུ།།

བསླབ་གསུམ་ལྡན་པའི་བཙུན་ཚོགས་ལ། །

ཕ་གཞིས་ཁྱིམ་ཆེན་ཅི་ལ་མཁོ། །

གྲྭ་པ་མང་སའི་དགོན་པ་ལ། །

བཙུན་མའི་ཁྱུ་ཚོགས་བཙུན་པའི་དགྲ།

དད་པ་མེད་པའི་ཡོན་བདག་ལ། །

ཐེམ་མདུད་བཀའ་རྟགས་ཅི་ལ་མཁོ། །

གཟུགས་དབྱིབས་ལུས་ཕྲའི་མཛེས་མ་ལ། །

མཁུར་ཚོས་དཀར་དམར་བརྒྱན་མི་དགོས།།

བདག་པོ་མང་བའི་སྒོ་ཟོག་ལ།།

གཏན་ཁེལ་ཕྱུག་ར་ཅི་ལ་མཁོ།།

སྟོབས་རྩལ་རྫོགས་པའི་ཕོ་རྒོད་ལ།།

དཔུང་སྒྲིལ་མཉམ་རོགས་ཅི་ལ་དགོས།།

གཞོན་རྩལ་འཛུམ་པའི་མོ་འཛངས་ལ།།

ཚུལ་འཆོས་ཨོ་ཟོབ་ཅི་ལ་དགོས།།

མ་བཅོས་ལྷུན་གྲུབ་སྣང་འཛིན་ལ།།

མ་དག་སྣང་བའི་མ་སླད་པ།།

སོ་སོར་སྤུ་རིས་གཅོད་པ་དེ།།

སྟོང་ཉིད་དགའ་བའི་སྒོམ་པ་མཆོག།

དམ་ཆོས་དོན་གྱི་དགོངས་པ་ལ།།

ཚིག་གསར་མཆན་འདོག་མི་དགོས་པ།།

རྫོགས་ཆེན་ཐེགས་པའི་ལྟ་བ་ལ།།

བྱེད་པོས་རྩོལ་བ་ཅི་ལ་དགོས།།

མ་བཅོས་རང་འབབ་སྐྱོངས་བ་ལ།།

ཀུན་རྫོབ་སྣང་བ་མི་དགོས་པ།།

ཀུན་རྫོབ་བརྟག་ནས་མ་རྙེད་ན།།

རང་མཚན་དོན་དམ་ཅི་ལ་དགོས།།

རྟོག་པའི་མ་སྒྲིབ་མངོན་མཐོང་ན།།

རྟགས་ཅན་རྗེས་དཔག་ཅི་ལ་དགོས།།

རང་ཚུག་ཟིན་པའི་བུ་རྒོད་ལ།།

ཕུ་ནུ་ནང་དཀྲུག་ཅི་ལ་དགོས།།

འཇིག་རྟེན་འཁོར་བའི་བྱ་བ་ལ།།

དོན་གྱི་སྙིང་པོ་མེད་པ་བཞིན།།

རྣམ་གཡེང་སྒྱུ་མའི་གྲོང་ཁྱེར་ལ།།

བརྟག་ན་སྙིང་པོ་དེ་བས་དབེན།།

རིགས་རུས་མིང་གི་བླ་མ་ལ།།

ཐོས་བསམ་གོམ་པ་མེད་པ་བཞིན།།

དེང་སང་བླ་སྤྲུལ་ཁག་གཅིག་ལ།།

བྱམས་བརྩེའི་རྨང་གཞི་ཡེ་ནས་མེད།།

སློབ་ཆེན་མིང་ཆེན་ཁག་གཅིག་གིས།།

སློབ་སྦྱོང་རྒྱ་གྲོང་གསེང་དུ་གཏོར།།

བཙུན་པའི་ཁྱུ་ཚོགས་ཁག་གཅིག་གི།

དམ་ཚིག་མི་མངོན་དབྱིང་སུ་ཐིམ།།

དབྱར་རྩ་དགུན་འབུའི་ཕོ་གསར་ལ།།

མ་འོངས་ཕྱིར་བསམ་མི་དགོས་བཞིན།།

ཁེར་རྐྱང་བློ་བདེའི་གྲྭ་རྐྱང་དེ།།

རང་མགོ་ཐོན་པའི་འཚོ་བ་སྤྲོ།།

གནས་སྐབས་བདེ་བའི་སྐྱེས་བུ་ལ།།

ཆེན་པོའི་བདེ་བ་ཐོབ་མི་སྲིད།།

ཆགས་པ་ཆུང་བའི་སློབ་ཕྲུག་དེས།།

ཕུག་གི་བདེ་བ་ལོན་རྟགས་རེད།།

རང་སྐད་ཡིག་བཟང་སྦྱོང་འདོད་དེ།།

རང་དོན་འགྲུབ་པའི་རང་རྟགས་རེད།།

རང་གཞན་ཀུན་གྱི་བདེ་བའི་རྒྱུ།།

རང་སེམས་རྒྱལ་པོ་ངོ་ཤེས་དགོས།།

༢༠༡༣-༥-༡༣   བསོད་བློ་ནས།།