ཕོད་པ་གསུམ་གྱི་མཁས་དབང་རྗེས་སུ་དྲན་པ།
བསོད་ནམས་བློ་གྲོས།
དྲན་ནས་བདེན་པའི་ཆེད་དུ་ངུ་ཕོད་པ།།
འཐབ་ནས་རྒྱལ་ཁའི་ཆེད་དུ་རྒོལ་ཕོད་པ།།
ལུང་དང་རིགས་པ་ཁྱེར་ནས་འཕུར་ཕོད་པ།།
ཕོད་པ་གསུམ་གྱིས་ཕྱུག་པའི་མཁས་དབང་ཞིག།
ཞང་ཞུང་དྲན་པ་བྱོན་པའི་གནའ་ཤུལ་ནས།།
ཞང་ཞུང་སྙན་རྒྱུད་སྒོམ་པའི་རྒད་པོ་ཞིག།
ཞབས་རྗེས་གངས་ལ་བཞག་པའི་དབུ་རྩེ་ནས།།
ཉམས་ལེན་གཤོག་པ་ཐོགས་ནས་ཁར་རྩང་འཕུར།།
གངས་ལ་དཀར་པོ་འདི་ནས་ཕར་ཞིག་བརྒལ།།
རི་ཆུ་སྟོང་གི་མཐའ་ནས་ཚུར་ཞིག་གཟིགས།།
ཞང་བོད་མེས་པོའི་གདངས་ལ་ལན་ཞིག་ཆགས།།
ཕ་ཡི་གསུང་འབུམ་བུ་ལ་རྗེས་བཞག་མཛད།།
དཀར་པོ་ཞང་ཞུང་རྡོ་ཡི་ཐབ་ལྷ་བཅས།།
པོ་ཏི་སྔོན་པོ་ཞིག་ལ་སྤྱན་དཀྱུས་ཡངས།།
མྱེས་པོ་སྟོང་གི་ལོ་རྒྱུས་རྒྱལ་ཁམས་བསྒྲགས།།
གཡག་ཞར་གདོན་གྱི་རྒོལ་ངན་ཕམ་པར་མཛད།།
འཚོ་བ་ངན་ངོན་ཙམ་ལས་མ་འགྲིགས་ལ།།
ན་བཟའ་ཧྲ་ཧྲུལ་ཞིག་ལས་མ་རྙེད་ཀྱང་།།
ལྟོ་བ་སྐོམ་ལྟོགས་གཉིས་ཀྱིས་མནར་ས་ནས།།
ཞང་ཞུང་རྒད་པོ་ཞིག་གི་ཚུགས་ཀ་བཟུང་།།
ས་མཐའི་ཨ་སྐྱོ་ཞིག་གི་སྐྱེ་བ་དང་།།
མགོན་མེད་དྭ་ཕྲུག་ཅིག་གི་འཚོ་བ་ལས།།
ཞབས་ཕྱི་ཆིབ་འཁོར་སྐུ་བསོད་མ་རྒྱས་ཀྱང་།།
རྒྱལ་སྤྱིའི་གར་སྟེགས་སྒུལ་བའི་རྒད་པོ་གྱུར།།
ཆུ་མགོ་གངས་ལ་གཏུགས་ནས་ཆབ་ཅིག་དྲངས།།
ཆོས་མགོ་བོན་གྱིས་ཕུབ་ནས་འགྲེལ་ཞིག་གནང་།།
མུན་པའི་རུ་དཔུང་བསྟར་བའི་ལྔ་བདོ་ནས།།
སྐད་ཡིག་བླ་ཚེ་བསྲུང་བའི་གོ་ཁྲབ་མཛད།།
འགའ་ཞིག་བགྲོ་སྟེགས་ཐོག་ལ་རྡོ་སྐུ་འདྲ།།
རེ་ཞིག་རྒྱལ་རབས་གླེངས་དུས་སྨྲ་སྒོ་འགག།
མང་ཞིག་ལོ་རྒྱུས་འབྲི་དུས་ལག་རྩ་འཁུམས།།
ཁྱེད་ཉིད་ཤེས་རབ་སྟོང་གིས་ཤར་ཤར་འཁྱུགས།།
ཟུར་ཟའི་མེ་ལྕེ་ནག་པོ་གདོན་གྱིས་སྤུར།།
མདོ་སྔགས་གངས་ཀྱི་འོ་མ་ཐབ་སློག་བྱས།།
གཡུང་དྲུང་བསྟན་ལ་ཁ་མཆུ་རྒྱབ་ཉིན་མོར།།
པོ་ཏི་གསེར་ཞལ་བསྲུང་བའི་མདའ་རྒོད་ཅིག།
བོན་ལ་ནག་དྲེགས་བྱུག་པའི་ཇུས་ངན་བཤམ།།
ཆོས་ཁ་ནང་ལ་གདངས་པའི་གནའ་ཤུལ་ནས།།
གངས་ཀྱི་ཏི་སེ་དཀར་པོའི་ཧྲེ་ཤུལ་ནང་།།
གད་ལ་རྭ་རྩེད་སྒྱུར་བཞིན་ཁྱེད་ཉིད་འགྱིངས།།
རིག་གཞུང་མགོ་བོ་འཐོམ་ནས་རུས་མ་དྲུད།།
ཕྱིན་ཅི་ལོག་ཏུ་སད་ནས་ཆོས་མ་གཡུགས།།
དྲང་བདེན་སྨྲ་བའི་གསེར་གྱི་ཐིག་ཤིང་ཁྱེར།།
ལུང་རིགས་རྒྱབ་ལྗོངས་ཚ་བའི་བུ་རྒོད་མཛད།།
བཟང་ངན་གྲུབ་འཐབ་རྩོད་པའི་གཡུལ་ཤོམ་ནང་།།
བདེན་དོན་སྟོད་གསིག་བྱེད་པའི་གཡུ་རལ་ཅན།།
ཤར་མཐའི་སྤྲིན་སྤུངས་གསེབ་ཀྱི་ངར་སྐད་རེར།།
རྒོལ་ངན་གྲ་ལེགས་ཁྱུ་ཚོགས་འདར་སིག་སིག།
ཟབ་ཚད་གསེར་སྲང་སྟོང་གིས་མི་སོད་ལ།།
རིང་ཚད་ཕོ་འདོམ་བརྒྱ་ཡིས་མི་འཇལ་བའི།།
ལྗིད་ཚད་གངས་ཀྱི་ཤེད་རྡོ་དཀར་པོ་སྟེ།།
གསུང་འབུམ་པོ་ཏི་ལྔ་པོ་གངས་ཀྱི་རྒྱན།།
རྐུབ་སྟེགས་བསྲུང་བའི་ཡང་སྲིད་འཁྲུངས་མི་དགོས།།
བདེན་དོད་འདོད་ན་ཡང་སྲིད་པོད་ཀྱིས་ཆོག།
འགལ་འདུ་བརྒྱ་ཡི་འཐབ་ར་བཅའ་མི་དགོས།།
བརྒྱ་བཤད་སྟོང་བཤད་པོ་ཏི་ལྔ་ཡིས་འགྲིགས།།
༢༠༡༨/༡༠/༥/ཉིན་དྲོ་གཞུང་ཤར་ཤར་འཁྱུག་གོ།
