ཡ་མཚར་བའི་མཛེས་སྡུག

ཁྱུང་བསོད་བློ།

དབུ་རྩེ་གནམ་དུ་བཀན་པའི་ཉག་ཀ་ནས།།

ཟར་ཅན་གཡུང་དྲུང་ཤུག་པའི་ཡན་ལག་དོད།།

སྨུག་སྤྲིན་ལིང་ལིང་རྒྱུ་བའི་ལེབ་མོ་རུ།།

གནམ་འདེགས་བྲག་གི་ཀ་ཆེན་འདི་ན་འདུག།

སྨྲ་ལྕེའི་ལབ་གླེང་རྒོད་པའི་ཚོར་བའི་གསེབ།།

རྟོག་འཕྱུ་འཕུར་ལྡིང་རྒྱས་པའི་སྒང་གཤོང་དུ།།

དྲག་གཏོར་གནམ་དུ་བཤམས་པའི་དབལ་རི་དེ།།

རྒྱལ་ཁམས་འགྲུལ་པོའི་མིག་གི་ཁམས་ཟས་གྱུར།།

བརྗིད་པའི་ལྕི་ཚད་ལྷུན་པོའི་རི་ལ་འགྲན།།

བཀན་པའི་རྔམ་ཚད་རྩ་གསུམ་ལྷ་ལ་བརྙབ།།

བརྟན་པའི་རྐང་རྩ་ཀླུ་རྒྱལ་བྲག་ལ་ཟུག།

ཉམས་ཅན་འཛུམ་གྱི་དར་དཔྱང་མི་ཡུལ་འཐེན།།

གྱད་ཆེན་འབྱུང་བ་བསྡེབས་པའི་གཡོ་འགུལ་ཁྲོད།།

ལེབ་ཅན་འདབ་མའི་ཡན་ལག་མ་གྲུག་ལ།།

ལྡེམ་མཉན་གྲ་ཡི་སྤུ་ཁ་མ་ཡལ་བའི།།

ཡ་མཚན་བྲག་གི་སྡོང་པོ་མིག་གི་སྐྱིད།

སྡོང་རྩ་ཆབ་ཀྱིས་བངས་ནས་མ་འགྱེལ་ལ།།

སྲིད་གསུམ་སྐོས་རྗེས་བཙན་གྱིས་མ་བཙུཌ་ཀྱང་།།

མ་གྲོས་སྲིད་པའི་རྟེན་འབྲེལ་མ་བརླགས་པས།།

འབྱུང་ལྔའི་ཁབ་རྩེ་དོད་ནས་ཁྱོད་ཉིད་ཆགས།།

སྲ་ཆེན་རྡོ་ལས་བརྡོལ་བའི་དཀར་པོ་བྲག།

ས་ཆེན་གྲིབ་གཟུཌ་བཞེངས་པའི་བྱེད་པོ་དང་།།

ཉམས་ཅན་གཟུགས་ལ་དཔྱོད་པའི་བྱ་ར་བ།།

སྣང་བ་སྐྱིད་སར་རྩེད་པའི་མཛེས་སྡུག་ཅིག།

རྡུལ་ཕྲན་འབྱོར་བའི་འཕྲུལ་གྱིས་མ་བཟོས་ལ།།

བཞུ་བརྡུང་བཟོ་པས་ཆེད་དུ་མ་བཅད་ཀྱང་།།

འབད་མེད་རང་བྱུང་གར་དུ་བཞེངས་པ་ཡི།།

རྩི་་ཤིང་བརྡོལ་བའི་བྲག་ཆེན་ཨེ་མ་ཧོ།།

༢༠༡༦/༣/༢༩/ཉིན་གྱི་ངལ་གསོའི་ལེའུ་གཉིས་པ།