གྲྭ་རྐྱང་གི་ལོ་གསར།
ཅང་ཤེས་རྟ་ཕོའི་འཚེར་སྐད་རྒྱང་ནས་ཆས།།
གཡང་དཀར་ལུག་ཁྱུས་འབའ་སྐད་ཉེ་རུ་གཏོང་།།
ལུས་ངག་ཡིད་གསུམ་ལྷས་ཀྱི་གླིང་ཁ་རུ།།
ལྷོད་བབས་བདེ་ཐང་འཛོམས་པའི་ལོ་གསར་བསུ།།
ཕྱུག་པོ་འདྲ་ལའི་རྒྱས་སྤྲོས་བྱེད་བསམ་མེད།།
སྤྲང་པོ་འདྲ་ལའི་འབྱོར་བས་སྟོངས་བསམ་མེད།།
བཟའ་བཏུང་མངར་ཆུ་རང་ལ་རན་ཚོད་བསྒྲིཊ།།
གྲྭ་རྐྱང་བདག་གི་ལོ་གསར་འདི་ཙམ་ཡིན།།
ཡར་ཀའི་ལྷ་དང་སྲུང་མས་མཆོད་རོཊ་ཀྱིས།།
མར་ཀའི་འདྲེ་དང་གླུད་ལ་བསྔོ་རོཊ་ཀྱིས།།
བར་གྱི་སྤུན་གྲོཊ་རྣམ་པས་བཞེས་རོཊ་ཀྱིས།།
དགའ་ཉེ་སྤུན་གྱི་གྲོགས་ཚོ་ཕེབས་རོཊ་ཀྱིས།།
བཏུང་ན་བྲང་གི་ཕོ་མཆིན་སྙུང་ས་མེད།།
མྱིད་པ་གྲེ་སྲིན་མགོ་ལ་ཕོག་ས་མེད།།
ཤ་རོ་རྙིང་པའི་སྒྱུ་ལྷག་སྐྱེ་དོགས་མེད།།
དགའ་བའི་ཐལ་མོ་བརྡབ་བཞིན་ལོ་གསར་བསུ།།
བརྩེ་དུང་ཟེར་བའི་མདུད་པ་མ་རྒྱབ་པས།།
ལས་དབང་ཟེར་བའི་གཏམ་གླེང་ག་ལ་ཕོད།།
ཟློས་གར་འཁྲབ་པའི་བྱང་ཆ་མ་ཆེ་ཡང་།།
སྐྱིད་པའི་རྡོག་བྲོ་འཁྲབ་བཞིན་ལོ་གསར་བསུ།།
ཆུང་དུས་དགའ་བའི་ཟུར་མིག་མ་འཕང་ལ།།
ཆེ་དུས་སྡུག་གི་ཟིང་ཆ་དེ་བས་མེད།།
རང་ལུས་ཤོང་སའི་རང་ཤག་གྲུ་བཞིའི་ནང་།།
སྣང་བས་རྒྱང་གླུ་ལེན་བཞིན་ལོ་གསར་བསུ།།
བཀྲིས་གསེར་གྱི་ཉི་མ་འཆར་ཁ་ཡང་།།
བདེ་ལེགས་དུང་གི་ཟླ་བ་ལན་ཀ་གསལ།།
ཕུན་སུམ་ཚོཊ་པའི་གཟའ་སྐར་ཚེས་བཟང་འཛོམས།།
གནམ་ས་དགོད་སྒྲས་ཁེངས་བཞིན་ལོ་གསར་བསུ།།
སྤྱི་ལོ-༢༠༡༥-༢-༡༩-ལོ་གསར་ཚེས་གཅིག་ཉིན་ཁྱུང་བསོད་བློ་འམ་མཁར་པ་བསོད་ནམས་བློ་གྲོས་ནས་བྲིས་སོ།།
