ཕྱུག་པོ་འགའ་ལ་ཞེ་ལོག་ཉེན།
མ་ཚིམ་ཆོག་ཤེས་ཚོད་ཀྱིས་མ་ཟིན་ན།།
མ་ཐེག་རྒྱུས་རྐང་ཧྲང་དུ་མ་ཐེག་ཟོས།།
མ་རུང་འདོད་རྔམ་ཆེ་བའི་ཕྱུག་པོ་དེ།།
མ་ལུས་མ་ཟད་བར་དུ་ཡིད་ཚིམ་དཀའ།།
ཕྱུག་པོའི་བུ་ལ་འདོད་སེམས་རྫོགས་དུས་མེད།།
འདོད་ཡོན་ནོར་གྱིས་ཁེངས་ཀྱང་ཚིམ་དུས་མེད།
མི་དབང་སྤྲང་པོའི་ནོར་ལ་རྒྱང་ཤེལ་གཏད།།
མི་འགྱང་སྤྲང་ཟས་ཟ་བའི་ཟ་ཁ་གདངས།།
དབུལ་པོའི་ནོར་ལ་ཟ་ཁའི་འགྲམ་ཆུ་ཤོར།།
སྤྲང་པོའི་ཟས་ལ་རྨྱིད་པའི་ཡིད་སྒོ་འབྱེད།།
རང་ཟས་ནོར་ལ་སེར་སྣའི་མདུད་པ་དམ།།
གཞན་རྒྱུ་ཟ་ཚོད་མེད་པ་ཕྱུག་པོའི་གཤིས།།
དྲི་ཆེན་ཁྱི་ཡི་མདུན་དུ་བློས་ཐོང་དཀའ།།
དྲི་ཆུ་བདུད་རྩི་འཛིན་པའི་ལྟ་བ་མཁྲེཊ།།
གདེང་འཇོག་ཆེ་སྟེ་ཡོད་ཚད་རིན་ཆེན་བལྟ།།
སེར་པོ་གསེར་གྱིས་ཁེངས་ཀྱང་ངོམ་དུས་མེད།།
དེང་གི་མགོ་གཉིས་པ་དེ་ཕྱུག་པོའི་བུ།།
དེང་གི་མཐོ་དད་ཆེ་བ་ཕྱུག་པོའི་བུ།།
དེང་གི་སྣང་བ་མཐོན་པོ་ཕྱུག་པོའི་བུ།།
ངོ་གཉིས་འཁྲབ་རྒྱུ་ཆེ་བ་ཕྱུག་པོའི་གཤིས།།
ཁ་ཁོག་བཤད་གཡམ་མ་མཚུངས་ཕྱུག་པོའི་བུ།།
ཕ་མཁར་རྫིག་པོ་མཚན་སྙན་མིང་གིས་བརྒྱན།།
ལོང་ཁའི་ལྟོ་ཁོག་པད་ཚལ་རྒད་པོས་བཀང་།།
ཕུཊ་ཁྱིམ་སྣུམ་པོ་སྙན་གྲཊ་མཆོད་པར་བཤམས།
ཉེར་གཅིག་འཕེལ་ཁ་རྒྱས་པའི་དུས་འདི་ལ།།
མི་ཚེའི་སྡོད་གནས་རྒྱ་མཐོངས་ཐོག་ཏུ་བསྐྱལ།།
ཇ་ཐང་ཁུ་ནག་འཐུང་བའི་ཕྱུག་པོ་འགའ།།
ང་ཡིས་འཚར་ལོངས་ཁྲོད་ནས་མཐོང་མྱོང་ཡོད།།
རྫོང་ཁྲོམ་འགྲིམ་དུས་གྲོན་ཆུང་ཟས་ལ་སྤྱོད།།
རང་ཁྱིམ་སྡོད་དུས་རྩམ་རྐྱང་འཚོ་བར་བརྟེན།།
ཟ་ལ་མི་དགའ་གསོག་ལ་དགའ་བ་དེ།།
འབྱོར་ལྡན་ཕྱུག་པོའི་བུ་ཡི་མཚན་ཉིད་འཛིན།།
ཕྱུག་པོའི་བུ་དེ་མིག་ལ་གཟན་གཟན་ཞིག།
ཕྱུག་པོའི་བུ་དེས་གཡོ་སྒྱུ་འཁྲབ་འཁྲབ་ཅིག།
ཕྱུག་པོའི་བུ་དེས་ངོས་དགའ་ལྐོག་ལབ་ཅིག།
མ་བྱས་མ་འཁྲབ་མེད་པར་བཙན་ལང་ཤོར།།
༢༠༡༤-༤-༥-ཁྱུང་བསོད་བློ་ནས།
