ཁྱུང་ཡུལ་འགྲོ་བའི་སྒྲོན་མེ།
ཁྱུང་བསོད་བློ།
མཚན་བཟང་མེ་ཏོག་ཁྱུང་དཀར་ཡུལ་བཞད་རྒྱལ་བ་གཉིས་པའི་རྒྱལ་ཚབ་ཕེབས།།
བཅུ་རིག་མེ་ཏོག་ཁྲ་དགོན་དཀྱིལ་དུ་མཉེས་པ་གསུམ་གྱིས་ཡོངས་འཛིན་བརྒྱན།།
མཛད་འཕྲིན་མཚན་སྙན་ཡངས་སྟེང་དགུང་དུ་རྔ་གསང་འབྲུག་མོ་རྡིར་རྡིར་གྲགས།།
ཐབས་ཇུས་འབྲེལ་བའི་བསླུ་བ་མཁས་ཏེ་རིས་མེད་གྲུབ་མཐའི་ལམ་བུ་སྐྱོང་།།
ཀ་དག་མདུད་པའི་དྲྭ་རྒྱ་ཁྲོལ་ཏེ་ཀུན་བཟང་དགོང་པའི་ཡངས་བཅུད་ལོན།།
བླ་མེད་ཐེག་པའི་རྒྱལ་ས་ཟིན་ཏེ་ཁམས་གསུམ་འགྲོ་བའི་སྐྱབས་ཀྱི་མགོན།།
མཐའ་ཁོབ་ཞན་པའི་ལུང་ཀྱོག་ཡོངས་ལ་བོན་བསྟན་སློབ་གསོའི་འབྲེལ་བ་ཟབ།།
མ་འོངས་ཤེས་རིག་མདུན་ལམ་གཏོད་ཚུལ་རྣ་བའི་གསེར་གདམ་རྒྱས་སེ་རྒྱས།།
སྲིད་པའི་བརྡ་དར་མཁའ་ལ་བསྒྲེང་བཞིན་བཀའ་བརྟེན་དཔེ་རྙིང་ཉི་ལི་ལི།།
རང་གཞན་གཉིས་དོན་བཤད་སྒྲུབ་སྒོམ་གསུམ་འདུས་སྡེའི་རྒྱ་མཚོ་འཁྱིལ་སེ་འཁྱིལ།།
ཞྭ་དཀར་གཡུང་དྲུང་བོན་བསྟན་གསོན་པོ་བཀའ་འགྱུར་དག་མ་བསྐྲུན་ལ་ཉེ།།
མ་གྱུར་འགྲོ་བའི་གཙུག་ཏུ་བཀུར་སའི་སངས་རྒྱས་གསོན་པོ་ཁེ་རུ་མ།།
ཁྱུང་ཡུལ་ཞིང་གི་བསྟན་པའི་སྒྲོན་མེའི་མཚན་སྙན་སྲིད་པ་གསུམ་དུ་གྲགས།།
དཀའ་ཚག་དཀོན་རྒྱུ་དཀའ་བ་དྭངས་བླང་བསྟན་འཛིན་ནང་གི་བསྟན་འཛིན་ཞིག།
འགངས་ཆེན་སྐུ་ལ་བར་ཆད་མེད་པར་སྐུ་ཁམས་བདེ་བའི་ཁ་གཡང་འབོད།།
བོན་བསྟན་དོན་ལ་མཛད་འཕྲིན་སྐྱོངས་བཞིན་མི་འགྱུར་ཡུན་རིང་བཞུགས་པར་སྨོན།། ༢༠༡༣-༡༢-༢༥- ཁྱུང་བསོད་བློ་ནས།
