བུ་ཡུག་དཀར་པོ།
ཁྱུང་བསོད་བློ།
སྟོན་རླུང་ཞིག་གིས་མགྲོན་བརྡ་གཏོང་ནས་ཆར་རླུང་བུ་ཡུག་དཀར་པོ་བསུས།།
འབའ་འབུར་གཤའ་གཤོང་ཐང་དུ་བརྡལ་ནས་ལྷིང་འཇག་གངས་ཀྱི་རང་མདངས་ངོམ།།
དྭངས་བའི་རེག་བྱ་བསིལ་ལྡན་དཀར་པོ་འབྲུ་དྲུག་སྙེ་མའི་གཤེར་དུ་སླེབས།།
སང་ཉིན་ལོ་ཡི་ཞིང་ས་གྱོང་པོ་སྟོན་ཆར་བསིལ་མས་རླན་ཞིང་སྣུམ།།
ས་འོག་སྟོན་ཆར་བཅུད་ཀྱིས་གཏམ་ན་སང་དཔྱིད་ས་བོན་འཕེལ་ཁ་བཙན།།
རླན་གྱི་དྭངས་མ་སྔོན་དུ་འབེལ་ན་སེར་པོའི་རྭ་ལག་འདུ་ཁ་བཙན།།
སུམ་པ་གླང་གི་སྒང་སྟོད་འདི་ན་སོས་ཆར་ཟེགས་མ་ཟིམ་མེ་ཟིམ།།
དི་རིང་ཁ་སང་དུས་ཀྱི་རྒྱལ་མོས་ཞལ་རས་རང་མདངས་ཕྱི་ལ་ངོམ།།
དཀར་པོ་དངུལ་ལས་མདངས་ཁ་བཙན་ཏེ་ནག་པོ་སོལ་བའི་མ་སླད་པ།།
དི་རིང་གངས་ཀྱི་རང་མདངས་དབྱིབས་རིས་སྤུ་ཁ་བཙན་ཏེ་བཀོད་པ་མཛེས།།
ཁ་དབུགས་དྭངས་མའི་བསིལ་བ་རེ་རེ་སེར་པོ་གསེར་ལས་འགངས་ཆེན་ཞིག།
བསིལ་ལྡན་མེ་ཏོག་གངས་ཅན་ལྗོངས་སུ་ཟིལ་པ་ཁྲོམ་མེར་བཞད་ནས་ཡོད།།
༢༠༡༣-༡༠-༢༥-དགོང་མོར་བྲིས།
